- కైతలాపూర్లో వెలుగుచూసిన ఘోర దురంతం.
- వరంగల్ జిల్లా వాసిగా గుర్తింపు.. ఆత్మహత్యకు కారణాలపై పోలీసుల ఆరా.
కూకట్పల్లి, మహా.
మహానగరంలో మరో ఘోర దురంతం వెలుగుచూసింది. కన్నబిడ్డలే లోకంగా బతకాల్సిన ఓ తల్లి.. వారిని తన చేతులతోనే కడతేర్చి తాను కూడా తనువు చాలించిన హృదయ విదారక ఘటన కూకట్పల్లి పోలీస్ స్టేషన్ పరిధిలో మంగళవారం చోటుచేసుకుంది. కైతలాపూర్లోని రాఘవేంద్ర కాలనీలో జరిగిన ఈ విషాదం స్థానికులను తీవ్ర దిగ్భ్రాంతికి గురిచేసింది. పచ్చని సంసారంలో ఒక్కసారిగా మృత్యుఛాయలు అలుముకోవడంతో ఆ ప్రాంతమంతా శోకసంద్రంలో మునిగిపోయింది.
పోలీసులు మరియు స్థానికుల కథనం ప్రకారం.. వరంగల్ జిల్లా చెన్నారావుపేట మండలం బోడ మాణిక్యం తండాకు చెందిన ఓ మహిళ తన కుటుంబంతో కలిసి కూకట్పల్లిలోని కైతలాపూర్ రాఘవేంద్ర కాలనీలో నివాసముంటోంది. ఏమైందో ఏమో తెలియదు కానీ, మంగళవారం ఆమె తీవ్ర నిర్ణయం తీసుకుంది. తన ఇద్దరు కుమారులను అతి కిరాతకంగా హత్య చేసి, అనంతరం తాను కూడా బలవన్మరణానికి పాల్పడింది. ఒకే ఇంట్లో ఇద్దరు చిన్నారులతో పాటు తల్లి విగతజీవులుగా పడి ఉండటాన్ని గమనించిన స్థానికులు వెంటనే పోలీసులకు సమాచారం అందించారు.
సమాచారం అందుకున్న కూకట్పల్లి పోలీసులు వెంటనే సంఘటనా స్థలానికి చేరుకుని క్లూస్ టీమ్ సహాయంతో ఆధారాలు సేకరించారు. మృతదేహాలను పోస్టుమార్టం నిమిత్తం తరలించారు. ఆత్మహత్యకు గల కారణాలు కుటుంబ కలహాలా లేక ఆర్థిక ఇబ్బందులా అన్న కోణంలో పోలీసులు లోతుగా దర్యాప్తు చేస్తున్నారు. అప్పటి వరకు ఆడుకుంటూ కళ్లముందే తిరిగిన చిన్నారులు విగతజీవులుగా మారడం, తల్లి కూడా ప్రాణాలు తీసుకోవడంతో మృతురాలి స్వగ్రామమైన బోడ మాణిక్యం తండాలో విషాద ఛాయలు అలుముకున్నాయి. కేసు నమోదు చేసుకున్న పోలీసులు అన్ని కోణాల్లో విచారణ వేగవంతం చేశారు. మనస్తాపంతోనే ఈ ఘోరానికి ఒడిగట్టి ఉండవచ్చని ప్రాథమికంగా భావిస్తున్నారు.
