రాజకీయ పోస్టులు పెడితే కోటి జరిమానా.. పాక్ క్రికెటర్లకు బోర్డు హెచ్చరిక..

• పంజాబ్ సీఎంపై అనుచిత వ్యాఖ్యలు చేసిన నసీం షాకు రూ. 2 కోట్ల ఫైన్.

లాహోర్, మహా.

మైదానంలోనే కాదు, సామాజిక మాధ్యమాల్లోనూ క్రమశిక్షణ తప్పితే ఊరుకునేది లేదని పాకిస్థాన్ క్రికెట్ బోర్డు (పీసీబీ) ఆటగాళ్లకు గట్టి హెచ్చరికలు జారీ చేసింది. రాజకీయపరమైన అంశాలపై నోరు జారితే భారీ మూల్యం చెల్లించుకోవాల్సి వస్తుందని స్పష్టం చేస్తూ కొత్త నిబంధనలను అమల్లోకి తెచ్చింది. తాజాగా స్టార్ పేసర్ నసీం షా సోషల్ మీడియా వేదికగా చేసిన వివాదాస్పద వ్యాఖ్యలే ఈ కఠిన నిర్ణయానికి దారితీశాయి. నిబంధనలను అతిక్రమించి రాజకీయ పోస్టులు పెడితే కనీసం కోటి రూపాయల జరిమానా విధిస్తామని బోర్డు తేల్చిచెప్పింది.

ఇటీవల జరిగిన పాకిస్థాన్ సూపర్ లీగ్ (పీఎస్ఎల్‌) 2026 ప్రారంభ వేడుకలకు పంజాబ్ ముఖ్యమంత్రి మరియం నవాజ్ ముఖ్య అతిథిగా హాజరయ్యారు. ఆ సమయంలో గడాఫీ స్టేడియంలో ఆమెకు లభించిన విపరీతమైన ప్రాధాన్యతపై నసీం షా వ్యంగ్యంగా స్పందించాడు. “ఆమెకు రాణికి ఇచ్చినంత గౌరవం ఎందుకు ఇస్తున్నారు?” అంటూ సోషల్ మీడియాలో పోస్ట్ చేశాడు. దేశంలో ఆర్థిక సంక్షోభం కారణంగా సామాన్య అభిమానులను సైతం స్టేడియంలోకి అనుమతించని తరుణంలో, ఒక రాజకీయ నాయకురాలికి అటువంటి ప్రోటోకాల్ ఇవ్వడాన్ని ఆయన ప్రశ్నించాడు. ఈ పోస్ట్ కాస్తా పాక్ రాజకీయ వర్గాల్లో పెద్ద దుమారమే రేపింది.

ఈ వ్యవహారాన్ని తీవ్రంగా పరిగణించిన పీసీబీ, నసీం షాకు షోకాజ్ నోటీసులు జారీ చేసింది. తన ఖాతా హ్యాక్ అయిందని నసీం వివరణ ఇచ్చినప్పటికీ, బోర్డు క్రమశిక్షణ కమిటీ దానిని తోసిపుచ్చింది. సెంట్రల్ కాంట్రాక్ట్ నిబంధనలను, సోషల్ మీడియా మార్గదర్శకాలను ఉల్లంఘించినందుకు గానూ అతడికి 72,000 అమెరికన్ డాలర్లు (సుమారు రూ. 2 కోట్లు) భారీ జరిమానా విధించింది. దీంతోపాటు అతడి సోషల్ మీడియా వ్యవహారాలను చూసే సలహాదారుడిని కూడా విధుల నుంచి తొలగించి బ్లాక్ లిస్ట్‌లో పెట్టింది. చివరకు నసీం షా తన తప్పును అంగీకరిస్తూ బోర్డుకు బేషరతుగా క్షమాపణలు చెప్పాడు.

ఈ పరిణామాల నేపథ్యంలో ఆటగాళ్ల సోషల్ మీడియా వినియోగంపై పీసీబీ సరికొత్త మార్గదర్శకాలను విడుదల చేసింది. ఇకపై బోర్డు మీడియా విభాగం నుంచి ముందస్తు అనుమతి లేకుండా ఆటగాళ్లు కానీ, వారి ప్రతినిధులు కానీ ఎటువంటి రాజకీయ అంశాలపై పోస్టులు పెట్టకూడదని ఆదేశించింది. నిబంధనలు మీరితే కోటి రూపాయల జరిమానాతో పాటు కాంట్రాక్టు రద్దు వంటి కఠిన చర్యలు ఉంటాయని హెచ్చరించింది. క్రీడాకారులు కేవలం క్రీడలకే పరిమితం కావాలని, అనవసర రాజకీయ వివాదాల్లోకి వెళ్లి బోర్డు ప్రతిష్ఠను దెబ్బతీయకూడదని పీసీబీ స్పష్టం చేసింది.