- నిర్వీర్యం చేసిన సైన్యం.
- జనవాసాల మధ్య బయటపడ్డ రెండు భారీ బాంబులు.
- తప్పిన పెను ప్రమాదం.
టిన్సుకియా, మహా.
అసోం రాష్ట్రంలోని టిన్సుకియా జిల్లాలో రెండో ప్రపంచ యుద్ధం నాటి రెండు భారీ బాంబులు కలకలం సృష్టించాయి. జనవాసాల మధ్య ఇవి బయటపడటంతో స్థానికులు తీవ్ర ఆందోళనకు గురయ్యారు. అయితే భారత సైన్యం సకాలంలో స్పందించి, అత్యంత చాకచక్యంగా ఆ బాంబులను నిర్వీర్యం చేయడంతో పెను ప్రమాదం తప్పినట్లయింది. దీంతో అటు అధికారులు, ఇటు ప్రజలు ఊపిరి పీల్చుకున్నారు. మంగళవారం జిల్లాలోని లెఖాపానీ బర్మా క్యాంప్ ప్రాంతంలో ఓ పౌరుడు తన నివాసం వద్ద గుంత తవ్వుతుండగా, భూమిలో పాతిపెట్టి ఉన్న ఈ పేలని బాంబులు కనిపించాయి.
ఈ సమాచారం అందిన వెంటనే పౌర యంత్రాంగం అప్రమత్తమై భారత సైన్యానికి కబురు పంపింది. ఇండియన్ ఆర్మీకి చెందిన రెడ్ షీల్డ్ డివిజన్ వెంటనే రంగంలోకి దిగి, ప్రత్యేక బాంబ్ డిస్పోజల్ బృందాన్ని ఘటనా స్థలానికి పంపింది. ప్రాథమిక తనిఖీల్లో అందులో ఒకటి జనరల్ పర్పస్ బాంబు కాగా, మరొకటి ఇన్సెండియరీ (మంటలు వ్యాపింపజేసే) బాంబు అని అధికారులు గుర్తించారు. అత్యంత జనసాంద్రత కలిగిన ప్రాంతం కావడంతో, సైన్యం ముందుగా పరిసరాల్లోని ప్రజలను ఖాళీ చేయించి, ఆ ప్రాంతాన్ని తమ అదుపులోకి తీసుకుంది. అనంతరం ఆ బాంబులను అత్యంత జాగ్రత్తగా జనావాసాలకు దూరంగా ఉన్న సురక్షిత ప్రదేశానికి తరలించి, నియంత్రిత పద్ధతిలో పేల్చివేసి నిర్వీర్యం చేసింది.
రెండో ప్రపంచ యుద్ధ సమయంలో లెడో, లెఖాపానీ ప్రాంతాలు సైనిక కార్యకలాపాలకు, మందుగుండు సామాగ్రి సరఫరాకు ప్రధాన కేంద్రాలుగా ఉండేవని రక్షణ శాఖ అధికారులు తెలిపారు. ఈ కారణంగానే అప్పర్ అసోంలోని పలు ప్రాంతాల్లో అప్పుడప్పుడు ఇలాంటి పేలని బాంబులు బయటపడుతుంటాయని వారు వివరించారు. సైన్యం ప్రదర్శించిన వృత్తి నైపుణ్యం, సత్వర స్పందన పట్ల స్థానిక ప్రజలు హర్షం వ్యక్తం చేశారు. పౌరుల భద్రతే తమకు ప్రథమ ప్రాధాన్యమని, ఎటువంటి విపత్కర పరిస్థితుల్లోనైనా ఆదుకుంటామని ఈ సందర్భంగా సైనిక ఉన్నతాధికారులు పునరుద్ఘాటించారు.
