- రూ. 5 లక్షల ఆర్థిక సాయం.. కుమారుడికి హోంగార్డు ఉద్యోగం.. డబుల్ బెడ్రూం ఇల్లు మంజూరు.
హైదరాబాద్, మహా.
హుస్సేన్ సాగర్ (ట్యాంక్బండ్)లో ప్రమాదవశాత్తు లేదా ఇతర కారణాలతో పడిపోయిన వందలాది మంది ప్రాణాలను కాపాడి ‘ప్రాణదాత’గా గుర్తింపు పొందిన శివకు తెలంగాణ ప్రభుత్వం అండగా నిలిచింది. నిస్వార్థంగా ఎంతో మంది ప్రాణాలను కాపాడినప్పటికీ, ప్రస్తుతం కుటుంబ పోషణ భారమై శివ ఆర్థిక ఇబ్బందులు ఎదుర్కొంటున్నారన్న వార్తలపై ముఖ్యమంత్రి ఎ. రేవంత్ రెడ్డి గారు మానవీయ కోణంలో స్పందించారు. మంగళవారం హైదరాబాద్లో శివ కుటుంబ సభ్యులు ముఖ్యమంత్రిని కలుసుకోగా, వారికి ప్రభుత్వం తరఫున రూ. 5 లక్షల ఆర్థిక సాయాన్ని అందజేశారు. కేవలం ఆర్థిక సాయంతోనే ఆగకుండా, శివ కుమారుడు వేణుమాధవ్కు హోంగార్డు ఉద్యోగం కల్పిస్తూ అందుకు సంబంధించిన నియామక పత్రాన్ని ముఖ్యమంత్రి స్వయంగా అందజేశారు.
సాహసోపేతమైన పనులతో నగర ప్రజల మన్ననలు పొందిన శివ కుటుంబానికి శాశ్వత ప్రాతిపదికన అండగా ఉండాలని ముఖ్యమంత్రి నిర్ణయించారు. కొద్ది రోజుల క్రితమే శివ పరిస్థితిపై ఆరా తీసిన ముఖ్యమంత్రి, తక్షణమే అతడికి అవసరమైన సహాయం అందించాలని అధికారులను ఆదేశించారు. ఈ మేరకు అధికారులు తీసుకున్న చర్యల అనంతరం, మంగళవారం జరిగిన భేటీలో శివకు మరిన్ని వరాలను ప్రకటించారు. శివ కుటుంబానికి ఒక డబుల్ బెడ్రూం ఇల్లు మంజూరు చేయాలని అధికారులకు స్పష్టమైన ఆదేశాలు జారీ చేశారు. ముఖ్యమంత్రి చూపిన చొరవతో శివ కుటుంబంలో కొత్త వెలుగులు నిండాయి.
ఇదే సందర్భంలో తన ఉపాధికి సంబంధించి శివ చేసిన విన్నపంపై కూడా ముఖ్యమంత్రి సానుకూలంగా స్పందించారు. ట్యాంక్బండ్ సమీపంలో ఒక స్విమ్మింగ్ పూల్ నిర్మించి ఇస్తే, దాని ద్వారా తన కుటుంబాన్ని పోషించుకుంటానని శివ కోరగా, ఆ దిశగా తగిన చర్యలు తీసుకోవాలని అధికారులను ఆదేశించారు. క్లిష్ట పరిస్థితుల్లో ఉన్న తమ కుటుంబాన్ని స్వయంగా ముఖ్యమంత్రి పిలిపించి మాట్లాడటమే కాకుండా, ఉద్యోగం, ఇల్లు, ఆర్థిక సాయం అందించడంపై శివ కుటుంబ సభ్యులు భావోద్వేగానికి లోనయ్యారు. ముఖ్యమంత్రి గారి సహృదయానికి, సాయానికి వారు హృదయపూర్వక కృతజ్ఞతలు తెలిపారు. ఒక సామాన్యుడి సాహసాన్ని ప్రభుత్వం గుర్తించి గౌరవించడం పట్ల సర్వత్రా ప్రశంసలు వ్యక్తమవుతున్నాయి.
