లక్ష్యాన్ని చేరని ‘సింగరేణి’.. బొగ్గు వెలికితీతలో భారీ తగ్గుదల.

•  తెలంగాణ ఆవిర్భావం తర్వాత తొలిసారిగా విఫలం.
•   76 మిలియన్ టన్నుల లక్ష్యం.. 58కే పరిమితం.
•   అవినీతి ఆరోపణలు, నిర్వహణ లోపాలతో నష్టాల అంచుకు సంస్థ.
•  లాభాల మాట దేవుడెరుగు.. మనుగడపైనే కార్మికుల్లో సందిగ్ధం.

హైదరాబాద్:మహా.

తెలంగాణ రాష్ట్ర ఆర్థిక వ్యవస్థకు వెన్నెముకగా, వేలాది మంది కార్మికుల పాలిట కల్పవల్లిగా విరాజిల్లిన సింగరేణి కాలరీస్ కంపెనీ లిమిటెడ్ (ఎస్‌సీసీఎల్) చరిత్రలో ఎన్నడూ లేని విధంగా గడ్డు పరిస్థితులను ఎదుర్కొంటోంది. రాష్ట్ర ఆవిర్భావం తర్వాత మొదటిసారిగా సంస్థ తన వార్షిక బొగ్గు ఉత్పత్తి లక్ష్యాన్ని చేరుకోవడంలో ఘోరంగా విఫలమైంది. గత ప్రభుత్వాల హయాంలో రికార్డు స్థాయి ఉత్పత్తితో లాభాల బాటలో నడిచిన ఈ మహారత్న సంస్థ, ప్రస్తుత ఆర్థిక సంవత్సరంలో నిర్దేశించుకున్న లక్ష్యానికి దరిదాపుల్లోకి కూడా చేరలేకపోయింది. ఈ పరిణామం సంస్థ మనుగడపైనే కాకుండా, కార్మికుల ప్రయోజనాలపై కూడా తీవ్ర ప్రభావం చూపే అవకాశం కనిపిస్తోంది.

లక్ష్యాల మార్పు.. అందని ఫలితం

ప్రస్తుత ఆర్థిక సంవత్సరానికి (2025-26) సంబంధించి సింగరేణి యాజమాన్యం తొలుత 76 మిలియన్ టన్నుల బొగ్గు వెలికితీతను లక్ష్యంగా పెట్టుకుంది. అయితే, సంస్థలో నెలకొన్న అస్తవ్యస్త పరిస్థితులు, నిర్వహణ లోపాల కారణంగా ఆ లక్ష్యం సాధ్యం కాదని తేలడంతో, మధ్యలోనే దానిని 60 మిలియన్ టన్నులకు తగ్గించారు. తీరా ఏడాది ముగిసే సమయానికి ఆ తగ్గించిన లక్ష్యాన్ని కూడా అందుకోలేక కేవలం 58 మిలియన్ టన్నుల బొగ్గు ఉత్పత్తికే పరిమితమైంది. గత పదేళ్ల ప్రస్థానాన్ని పరిశీలిస్తే.. కేసీఆర్ ప్రభుత్వం ఉన్న సమయంలో సింగరేణి రికార్డు స్థాయిలో 70 మిలియన్ టన్నుల ఉత్పత్తిని సాధించి దేశవ్యాప్తంగా ప్రశంసలు అందుకుంది. కానీ ఇప్పుడు రేవంత్ రెడ్డి నేతృత్వంలోని కాంగ్రెస్ పాలనలో సంస్థ పరిస్థితి అగమ్యగోచరంగా మారిందని కార్మిక వర్గాలు ఆవేదన వ్యక్తం చేస్తున్నాయి.

అవినీతి కోరల్లో ‘సింగరేణి’!

సంస్థలో పెరిగిపోయిన భారీ అవినీతి, అక్రమాలే ఈ దుస్థితికి ప్రధాన కారణమని విమర్శలు వెల్లువెత్తుతున్నాయి. ఉన్నతాధికారుల పర్యవేక్షణ లోపం, కాంట్రాక్టుల కేటాయింపులో చోటుచేసుకున్న అవకతవకలు బొగ్గు వెలికితీతపై తీవ్ర ప్రభావాన్ని చూపాయి. గతంలో లాభాల వెలుగులు విరజిమ్మిన సింగరేణి, ఇప్పుడు నష్టాల అంచుకు చేరుకోవడంతో ఈ ఏడాది కార్మికులకు లాభాల్లో వాటా (బోనస్) వస్తుందా? లేదా? అనే సందిగ్ధం నెలకొంది. సంస్థలో పనిచేస్తున్న వేలాది మంది కార్మికులు, వారి కుటుంబాల భవిష్యత్తు ఇప్పుడు ప్రశ్నార్థకంగా మారింది.

పాలనా వైఫల్యమే కారణమా?

పాలనలో అనుభవం లేకపోవడం, సంస్థాగత నిర్ణయాల్లో జాప్యం సింగరేణిని పాతాళానికి తొక్కుతున్నాయని విశ్లేషకులు అభిప్రాయపడుతున్నారు. ఒకవైపు బొగ్గుకు దేశవ్యాప్తంగా డిమాండ్ పెరుగుతున్నా, సింగరేణి మాత్రం వెలికితీతలో వెనుకబడటం గమనార్హం. గత ప్రభుత్వ హయాంలో ఎంతో క్రమశిక్షణతో, ప్రణాళికాబద్ధంగా సాగిన ఉత్పత్తి ప్రక్రియ.. ప్రస్తుతం రేవంత్ రెడ్డి పరిపాలనలో పూర్తిగా అస్తవ్యస్తమైపోయిందని ప్రతిపక్షాలు మండిపడుతున్నాయి. సంస్థను నష్టాల ఊబి నుంచి గట్టెక్కించేందుకు తక్షణమే దిద్దుబాటు చర్యలు చేపట్టకపోతే, సింగరేణి మనుగడే ప్రమాదంలో పడే అవకాశం ఉందని నిపుణులు హెచ్చరిస్తున్నారు.