టీసీఎస్ మత మార్పిడిల వెనుక ‘ఆర్థిక’ కుట్ర.
* నిదా ఖాన్ బ్యాంక్ ఖాతాల్లో మిస్టరీ లావాదేవీలు.
*పరారీలో ‘కీ’ నిందితురాలు నిదా ఖాన్.
* ఖాతాల ప్రక్షాళనకు పోలీసుల నోటీసులు.
* టాటా సామ్రాజ్యంలో మత విద్వేషాల మంట.
* దర్యాప్తు ముమ్మరం చేసిన స్పెషల్ టీమ్.
హైదరాబాద్, మహా.
దేశీయ ఐటీ దిగ్గజం టాటా కన్సల్టెన్సీ సర్వీసెస్ నాసిక్ కేంద్రంలో వెలుగుచూసిన వేధింపులు, మత మార్పిడి ప్రయత్నాల కేసు ఇప్పుడు ఊహించని మలుపు తిరిగింది. ఇప్పటివరకు కేవలం వ్యక్తిగత వేధింపులు, లైంగిక వేధింపుల ఆరోపణలకే పరిమితమైన ఈ కేసు.. ఇప్పుడు భారీ ఆర్థిక కుట్ర వైపు మళ్లింది. ఈ అరాచకాల వెనుక ఏదైనా వ్యవస్థీకృత నెట్వర్క్ ఉందా? నిందితులకు బయటి వ్యక్తుల నుంచి లేదా అంతర్జాతీయ సంస్థల నుంచి నిధులు అందుతున్నాయా? అనే కోణంలో ప్రత్యేక దర్యాప్తు బృందం విచారణను ముమ్మరం చేసింది. ముఖ్యంగా ఈ కేసులో కీలక నిందితురాలు, ప్రస్తుతం పరారీలో ఉన్న హెచ్ఆర్ ఎగ్జిక్యూటివ్ నిదా ఖాన్తో పాటు అరెస్టైన ఏడుగురు నిందితుల బ్యాంక్ ఖాతాలపై సిట్ కన్నేసింది. వీరి జీతాలకు మించి ఖాతాల్లో ఏవైనా అదనపు నగదు జమ అయిందా అనే అంశంపై బ్యాంకుల నుంచి పూర్తి సమాచారం కోరుతూ పోలీసులు నోటీసులు జారీ చేశారు.
ఈ కేసులో వెలుగుచూస్తున్న విషయాలు అత్యంత భయంకరంగా ఉన్నాయి. నాసిక్ బీపీఓ కేంద్రంలో పనిచేస్తున్న ఎనిమిది మంది మహిళా ఉద్యోగులు ధైర్యం చేసి బయటకు వచ్చి ఫిర్యాదు చేయడంతో ఈ రాకెట్ బట్టబయలైంది. బాధితులు తమ ఫిర్యాదులో పేర్కొన్న అంశాలు ఒళ్లు గగుర్పొడిచేలా ఉన్నాయి. కార్యాలయంలో పనిచేస్తున్న మహిళా ఉద్యోగులను బలవంతంగా మత ప్రార్థనలు చేయాలని ఒత్తిడి చేయడం, వారిచేత మత చిహ్నాలు ధరింపజేయడం, చివరికి మాంసాహారం (బీఫ్) తినాలని వేధించడం వంటి చర్యలకు నిందితులు పాల్పడ్డారు. ఒక మహిళా ఉద్యోగికి బలవంతంగా టోపీ ధరింపజేసి ఫోటోలు తీసి వేధించినట్లు వచ్చిన ఆరోపణలు పరిస్థితి తీవ్రతకు అద్దం పడుతున్నాయి. ఈ అకృత్యాలకు అడ్డుకట్ట వేయాల్సిన హెచ్ఆర్ విభాగమే నిందితులకు వత్తాసు పలకడం గమనార్హం. పరారీలో ఉన్న నిదా ఖాన్ ఈ మొత్తం వ్యవహారంలో మాస్టర్ మైండ్గా వ్యవహరించినట్లు పోలీసులు అనుమానిస్తున్నారు.
దర్యాప్తులో భాగంగా సిట్ అధికారులు ఇప్పటికే ఏడుగురు ఉద్యోగులను అరెస్ట్ చేశారు. వీరిలో ఆరుగురు పురుషులు కాగా, ఒక మహిళా ఆపరేషన్స్ మేనేజర్ కూడా ఉన్నారు. డానిష్ షేక్, తౌసిఫ్ అత్తర్, రజా మెమన్, షారుఖ్ ఖురేషి, షఫీ షేక్, ఆసిఫ్ అఫ్తాబ్ అన్సారీ వంటి వారు కటకటాల పాలయ్యారు. వీరి వెనుక ఉన్న ఆర్థిక మూలాలను వెలికితీసేందుకు పోలీసులు వారి ఫోన్ డేటాను, వాట్సాప్ చాట్లను కూడా విశ్లేషిస్తున్నారు. నిందితులకు కేవలం ఉద్యోగం కోసం కాకుండా, మత మార్పిడిలను ప్రోత్సహించేందుకు ఎవరైనా భారీగా డబ్బు ఆశ చూపారా అనే కోణం ఇప్పుడు అత్యంత కీలకంగా మారింది. ఐటీ ఉద్యోగుల ముసుగులో ఈ తరహా దేశ వ్యతిరేక, సమాజ విచ్ఛిన్నకర చర్యలకు పాల్పడటం వెనుక లోతైన కుట్ర ఉందని హిందూ సంఘాలు ఆగ్రహం వ్యక్తం చేస్తున్నాయి.
టాటా సన్స్ ఛైర్మన్ ఎన్. చంద్రశేఖరన్ ఈ ఘటనను తీవ్రమైనదిగా పరిగణించి, కంపెనీ ప్రతిష్టకు భంగం కలగకుండా సమగ్ర విచారణకు ఆదేశించారు. టీసీఎస్ చీఫ్ ఆపరేటింగ్ ఆఫీసర్ ఆర్తి సుబ్రమణియన్ నేతృత్వంలో అంతర్గత విచారణ కమిటీ కూడా పనిచేస్తోంది. అరెస్టైన వారిని కంపెనీ ఇప్పటికే సస్పెండ్ చేసింది. అయితే, ఇన్నాళ్లుగా ఇంత పెద్ద స్థాయిలో వేధింపులు జరుగుతున్నా అంతర్గత వ్యవస్థలు ఎందుకు గుర్తించలేకపోయాయనే ప్రశ్నలు తలెత్తుతున్నాయి. నాసిక్ పోలీసులు పరారీలో ఉన్న నిదా ఖాన్ కోసం గాలింపు చర్యలు ముమ్మరం చేశారు. ఆమె పట్టుబడితే ఈ మత మార్పిడిల వెనుక ఉన్న అసలు సూత్రధారులు, వారి ఆర్థిక మూలాలు బయటపడే అవకాశం ఉంది. ఐటీ రంగంలో నెలకొన్న ఈ విష సంస్కృతిపై ఇప్పుడు దేశవ్యాప్తంగా చర్చ జరుగుతోంది. బాధితులకు న్యాయం జరగాలని, ఇలాంటి శక్తులను కఠినంగా శిక్షించాలని ప్రజలు డిమాండ్ చేస్తున్నారు.
