మరో మతమార్పిడి ఉదంతం బట్టబయలు.
*12వ తరగతి విద్యార్థినుల వ్యవహారంపై హైకోర్టు సీరియస్.
*తమ మతాన్ని ఇతరులపై రుద్దడం ఆందోళనకరం.
* అలహాబాద్ హైకోర్టు తీవ్ర వ్యాఖ్యలు.
అలహాబాద్,మహా.
ఉత్తరప్రదేశ్ రాష్ట్రంలో మతమార్పిడికి సంబంధించి మరో సంచలన విషయం వెలుగులోకి వచ్చింది. ఈసారి ఏకంగా 12వ తరగతి చదువుతున్న పాఠశాల విద్యార్థినులే తమ సహచర విద్యార్థినిపై ఇస్లాం మతంలోకి మారాలంటూ తీవ్ర ఒత్తిడి తీసుకురావడం కలకలం రేపుతోంది. ఈ వ్యవహారంలో తమపై నమోదైన ఎఫ్ఐఆర్ను కొట్టివేయాలని కోరుతూ నిందితులైన విద్యార్థినులు దాఖలు చేసిన పిటిషన్ను అలహాబాద్ హైకోర్టు తీవ్రంగా పరిగణించి, దానిని నిర్ద్వంద్వంగా తోసిపుచ్చింది. “యువత ఇలా తమ మతాన్ని ఇతరులపై బలవంతంగా రుద్దడానికి ప్రయత్నించడం అత్యంత ఆందోళన కలిగించే పరిణామం” అని కోర్టు ఈ సందర్భంగా తీవ్ర వ్యాఖ్యలు చేసింది.
**అసలేం జరిగిందంటే..**
ఉత్తరప్రదేశ్లోని మొరాదాబాద్ నగరంలో గతేడాది (2025) డిసెంబర్లో ఈ ఘటన చోటుచేసుకుంది. బాధితురాలి సోదరుడు పోలీసులకు ఇచ్చిన ఫిర్యాదుతో వ్యవహారం వెలుగులోకి వచ్చింది. తన సోదరిని ఇస్లాంలోకి మారాలని, బురఖా ధరించాలని ఆమెతో పాటు చదువుకుంటున్న ఐదుగురు సహవిద్యార్థినులు తీవ్రంగా ఒత్తిడి చేస్తున్నారని ఆయన తన ఫిర్యాదులో పేర్కొన్నారు. ఆ అమ్మాయిలందరూ ఒకే ట్యూషన్ సెంటర్లో చదువుతున్నారని, ఈ క్రమంలోనే వారు ఏకమై తన సోదరిని లక్ష్యంగా చేసుకున్నారని వివరించారు. ఆ ఐదుగురు అమ్మాయిలు ఉద్దేశపూర్వకంగా ఒక బురఖా కొనుగోలు చేసి, తన సోదరిని బలవంతంగా ధరింపజేయడానికి ప్రయత్నించారని, ఇదంతా స్థానికంగా ఉన్న ఒక సీసీటీవీ కెమెరాలో స్పష్టంగా రికార్డ్ అయిందని ఆయన పోలీసులకు అందజేసిన ఆధారాల్లో తెలిపారు.
**ఆహారం, దుస్తుల విషయంలోనూ ఒత్తిళ్లు..**
కేవలం మతం మారాలని చెప్పడమే కాకుండా, బాధితురాలిపై అనేక రకాలుగా మానసిక ఒత్తిడికి గురిచేసినట్లు పోలీసుల విచారణలో తేలింది. మిగతా అమ్మాయిలంతా ఉద్దేశపూర్వకంగా మాంసాహార వంటకాలు తీసుకువచ్చి తనను తినాలని బలవంతపెట్టేవారని బాధితురాలు స్వయంగా పోలీసులకు వెల్లడించింది. తాను మాంసాహారం తినడానికి నిరాకరించినప్పుడు, కనీసం ఆ కూరలోని గ్రేవీ అయినా తినాల్సిందేనని వారు పదేపదే బలవంతం చేసేవారని తెలిపింది. అలాగే, ఖురాన్ను కేవలం 40 రోజుల్లో చదవవచ్చని, ప్రపంచంలో అదే అత్యుత్తమమైనదని ఇతర అమ్మాయిలు తన మెదడులో నింపే ప్రయత్నం చేశారని వివరించింది. అంతేకాకుండా, బురఖా ధరించడం వల్ల ఎంతో స్వేచ్ఛ ఉంటుందని, ఒక అమ్మాయి బురఖా వేసుకుంటే ఎలాంటి భయం లేకుండా ఎక్కడికైనా వెళ్లవచ్చని చెబుతూ బురఖాను గొప్పగా చిత్రీకరించే ప్రయత్నం చేశారని ఆమె పోలీసుల ఎదుట పేర్కొంది.
**ఎఫ్ఐఆర్ను కొట్టివేయాలని నిందితుల యత్నం..**
బాధితురాలి సోదరుడి ఫిర్యాదు మేరకు పోలీసులు కేసు నమోదు చేయగా, ఈ కేసు నుంచి తప్పించుకునేందుకు నిందితులు న్యాయస్థానాన్ని ఆశ్రయించారు. నిందితులలో ఒకరైన షాబియా అనే విద్యార్థిని, తమపై నమోదైన ఎఫ్ఐఆర్ను కొట్టివేయాలని కోరుతూ అలహాబాద్ హైకోర్టులో పిటిషన్ దాఖలు చేసింది. అయితే, సీసీటీవీ ఫుటేజీ సహా పోలీసుల వద్ద ఉన్న ప్రాథమిక ఆధారాలు మరియు బాధితురాలి వాంగ్మూలాన్ని పరిశీలించిన ఉన్నత న్యాయస్థానం.. ఈ వ్యవహారాన్ని తేలికగా తీసుకోలేమని స్పష్టం చేసింది. ఎఫ్ఐఆర్ను రద్దు చేయడానికి ససేమిరా అంటూ ఆ పిటిషన్ను కొట్టివేసింది.
**బట్టబయలైన వ్యూహాత్మక కుట్రలు..**
ఇటీవల నాసిక్లోని టీసీఎస్ కార్యాలయం వెలుపల దవా (ఇతరులను ఇస్లాంలోకి మార్చేందుకు చేసే ప్రయత్నాలు) రాకెట్ వెలుగులోకి వచ్చి సంచలనం సృష్టించిన విషయం తెలిసిందే. ఆ ఘటన జరిగిన కొద్ది రోజులకే అలహాబాద్ హైకోర్టు నుంచి ఈ తాజా ఉత్తర్వులు వెలువడటం ప్రాధాన్యత సంతరించుకుంది. పక్కా ప్రణాళికతో సమన్వయంగా ఒకరిని లక్ష్యంగా చేసుకోవడం, బలవంతంగా మాంసాహారం తినిపించే ప్రయత్నాలు చేయడం, హిజాబ్/బురఖాను గొప్పగా చూపించడం, ఒక మత గ్రంథాన్ని మాత్రమే శ్రేష్ఠమైనదిగా ప్రదర్శించడం వంటి వ్యూహాత్మక ఎత్తుగడలు ఈ కేసులో స్పష్టంగా కనిపిస్తున్నాయని న్యాయ నిపుణులు విశ్లేషిస్తున్నారు. ఈ తరహా ఘటనలను ఆదిలోనే అడ్డుకోకపోతే సమాజంలో అవాంఛనీయ పరిణామాలు దారితీసే ప్రమాదం ఉందని పలువురు ఆందోళన వ్యక్తం చేస్తున్నారు.
