* 23న హైదరాబాద్లో బీజేపీ భారీ ‘జన్ ఆక్రోష్ పాదయాత్ర’.
* భారతీయ జనతా పార్టీ రాష్ట్ర అధ్యక్షుడు ఎన్. రామచందర్ రావు.
హైదరాబాద్, మహా.
దశాబ్దాల కాలంగా మహిళా రిజర్వేషన్ల అంశాన్ని అటకెక్కించి, నారీ శక్తి ఎదుగుదలను అడ్డుకున్న కాంగ్రెస్ పార్టీ మరియు దాని మిత్రపక్షాల అసలు రంగును ఎండగట్టాల్సిన సమయం ఆసన్నమైందని భారతీయ జనతా పార్టీ రాష్ట్ర అధ్యక్షుడు ఎన్. రామచందర్ రావు ఉద్ఘాటించారు. రాజకీయ ప్రయోజనాల కోసం మహిళా సాధికారతను కాలరాసిన చరిత్ర కాంగ్రెస్దని, ఆ పార్టీ అనుసరిస్తున్న ద్వంద్వ వైఖరిని ప్రజల ముందు ఉంచేందుకు తాము సిద్ధమయ్యామని ఆయన ప్రకటించారు. మంగళవారం పార్టీ కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడుతూ, ప్రధాని నరేంద్ర మోదీ ఎంతో సాహసోపేతంగా ‘నారీ శక్తి వందన్ అధినియమ్’ చట్టాన్ని తీసుకువచ్చి మహిళలకు చట్టసభల్లో గౌరవప్రదమైన స్థానాన్ని కల్పించారని కొనియాడారు. అయితే, దేశవ్యాప్తంగా మహిళలు హర్షిస్తున్న ఈ చారిత్రాత్మక నిర్ణయాన్ని కూడా కాంగ్రెస్ నేతృత్వంలోని ‘ఇండి’ కూటమి అడ్డుకోవడం వారి కపట బుద్ధికి నిదర్శనమని మండిపడ్డారు.
మహిళా సాధికారత పట్ల కాంగ్రెస్ ప్రదర్శిస్తున్న ఈ వ్యతిరేక వైఖరిని నిరసిస్తూ, తెలంగాణ నారీ లోకం గళమెత్తాల్సిన అవసరం ఉందని రామచందర్ రావు పిలుపునిచ్చారు. ఈ నేపథ్యంలోనే రాష్ట్రవ్యాప్తంగా భారతీయ జనతా పార్టీ ఆధ్వర్యంలో భారీ ఎత్తున నిరసన కార్యక్రమాలను చేపడుతున్నట్లు వెల్లడించారు. ఇందులో భాగంగానే ఈ నెల 23వ తేదీన రాష్ట్ర రాజధాని హైదరాబాద్ నడిబొడ్డున ‘జన్ ఆక్రోష్ పాదయాత్ర’ను అత్యంత ప్రతిష్టాత్మకంగా నిర్వహిస్తున్నట్లు ఆయన ప్రకటించారు. ఈ యాత్ర జీహెచ్ఎంసీ ప్రధాన కార్యాలయం నుండి ప్రారంభమై దోమల్గూడ మీదుగా ఇందిరా పార్క్ వరకు కొనసాగుతుందని, ఈ పోరాటంలో వేలాది సంఖ్యలో మహిళలు స్వచ్ఛందంగా తరలివచ్చి తమ ఆక్రోశాన్ని వెళ్లగక్కాలని కోరారు. మహిళా రిజర్వేషన్ల విషయంలో కాంగ్రెస్ చేసిన అన్యాయాన్ని, వారు సృష్టించిన అడ్డంకులను గడపగడపకూ తీసుకెళ్లడమే ఈ యాత్ర ప్రధాన ఉద్దేశమని ఆయన స్పష్టం చేశారు.
నరేంద్ర మోదీ ప్రభుత్వం మహిళల సంక్షేమం కోసం, వారి సామాజిక, రాజకీయ ఎదుగుదల కోసం చేస్తున్న కృషిని వివరిస్తూ, ఈ పాదయాత్ర ముగింపులో భారీ బహిరంగ సభ ఉంటుందని రామచందర్ రావు తెలిపారు. గత పదేళ్లుగా కేంద్ర ప్రభుత్వం ప్రవేశపెట్టిన పథకాలు ఏ విధంగా ఆడబిడ్డల ఆత్మగౌరవాన్ని పెంచాయో, అదే సమయంలో కాంగ్రెస్ పార్టీ ఏ విధంగా వారి హక్కులను కాలరాసిందో ఈ వేదిక ద్వారా ప్రజలకు వివరిస్తామన్నారు. చట్టసభల్లో మహిళలకు ప్రాతినిధ్యం దక్కకుండా అడ్డుపడుతున్న శక్తులకు గుణపాఠం చెప్పేందుకు ఈ యాత్ర ఒక నాంది కావాలని ఆయన ఆకాంక్షించారు. ఈ భారీ ప్రదర్శనలో పార్టీ శ్రేణులతో పాటు, మహిళా సంఘాలు, విద్యార్థినులు, సామాన్య ప్రజలు పెద్దఎత్తున పాల్గొని విజయవంతం చేయాలని, ఆడబిడ్డల ఆత్మగౌరవ పోరాటంలో ప్రతి ఒక్కరూ భాగస్వాములు కావాలని రామచందర్ రావు విజ్ఞప్తి చేశారు. మన సంస్కృతిలో మహిళలకు ఇచ్చే ఉన్నత స్థానాన్ని కాపాడుకుంటూనే, రాజకీయ రంగంలో వారికి దక్కాల్సిన వాటాను సాధించుకునే వరకు బీజేపీ విశ్రమించదని ఆయన ఈ సందర్భంగా పునరుద్ఘాటించారు.
