కేరళలో పెను విషాదం….

* బాణసంచా కేంద్రంలో భీకర పేలుడు.
* నిప్పుల కొలిమిగా మారిన త్రిస్సూర్.
* ఆరుగురు దుర్మరణం.
త్రిస్సూర్,మహా.
కేరళ రాష్ట్రంలోని ప్రసిద్ధ ఆధ్యాత్మిక కేంద్రం త్రిస్సూర్‌లో పెను ప్రమాదం సంభవించింది. స్థానిక ముండతికోడ్ ప్రాంతంలోని ఒక బాణసంచా తయారీ కేంద్రంలో మంగళవారం మధ్యాహ్నం సంభవించిన భీకర పేలుడు యావత్ రాష్ట్రాన్ని దిగ్భ్రాంతికి గురిచేసింది. ఈ ఘోర ప్రమాదంలో ఇప్పటివరకు ఆరుగురు కార్మికులు ప్రాణాలు కోల్పోగా, సుమారు 40 మందికి పైగా తీవ్రంగా గాయపడ్డారు. పేలుడు ధాటికి ఆ ప్రాంతమంతా ఒక్కసారిగా కంపించిపోయింది. ఆకాశమంతా దట్టమైన నల్లని పొగ అలుముకోగా, బాణసంచా కేంద్రం ఆనవాళ్లు లేకుండా ధ్వంసమైంది. చుట్టుపక్కల నివసించే ప్రజలు ఆ శబ్దాన్ని విని భూకంపం వచ్చిందని భావించి ఇళ్ల నుండి పరుగులు తీశారు. పేలుడు తీవ్రత ఎంతలా ఉందంటే, కిలోమీటర్ల దూరం వరకు ఆ శబ్దం వినిపించిందని ప్రత్యక్ష సాక్షులు భయాందోళనతో వెల్లడించారు.
వచ్చే వారం జరగనున్న జగత్ప్రసిద్ధ ‘త్రిస్సూర్ పూరం’ ఉత్సవాల కోసం ఇక్కడ భారీ ఎత్తున బాణసంచా తయారీ పనులు జరుగుతున్నాయి. తిరువంబాడి దేవాస్వం విభాగానికి సంబంధించి బాణసంచా శాంపిల్స్ సిద్ధం చేసే ప్రక్రియలో ఉండగా ఈ విషాదం చోటుచేసుకుంది. ప్రమాద సమయంలో సుమారు 40 నుంచి 50 మంది కార్మికులు ఆ షెడ్డులో పని చేస్తున్నట్లు సమాచారం. నిల్వ ఉంచిన భారీ పేలుడు పదార్థాలు ఒకదాని తర్వాత ఒకటి పేలడంతో ఆ ప్రాంతం అగ్నిగుండంగా మారింది. పేలుడు ధాటికి కార్మికుల శరీర భాగాలు చెల్లాచెదురుగా పడిపోవడం చూసి సహాయక సిబ్బంది సైతం కంటతడి పెట్టారు. ఘటనా స్థలంలో ఉన్న వీడియోలు సోషల్ మీడియాలో వైరల్ అవుతుండగా, ఆ దృశ్యాలు చూస్తుంటే వెన్నులో వణుకు పుట్టక మానదు. అగ్నిమాపక యంత్రాలు సంఘటనా స్థలానికి చేరుకుని మంటలను అదుపు చేసేందుకు గంటల తరబడి శ్రమించాల్సి వచ్చింది.
క్షతగాత్రులను వెంటనే త్రిస్సూర్ మెడికల్ కాలేజీ ఆస్పత్రికి తరలించారు. గాయపడిన వారిలో ఎనిమిది మంది పరిస్థితి అత్యంత విషమంగా ఉందని, మృతుల సంఖ్య మరింత పెరిగే అవకాశం ఉందని వైద్యులు ఆందోళన వ్యక్తం చేస్తున్నారు. రాష్ట్ర ఆరోగ్య శాఖ మంత్రి వీణా జార్జ్ వెంటనే స్పందించి, బాధితులకు మెరుగైన వైద్యం అందించాలని అధికారులను ఆదేశించారు. అదనపు అంబులెన్సులను ఏర్పాటు చేసి క్షతగాత్రులను తరలించే ప్రక్రియను వేగవంతం చేశారు. మరోవైపు ఈ ఘోర ప్రమాదంపై ప్రధానమంత్రి కార్యాలయం దిగ్భ్రాంతి వ్యక్తం చేసింది. మృతుల కుటుంబాలకు ప్రగాఢ సానుభూతి తెలియజేస్తూ, క్షతగాత్రులు త్వరగా కోలుకోవాలని ఆకాంక్షించింది.
ప్రమాదానికి గల కారణాలపై ప్రభుత్వం ఉన్నత స్థాయి విచారణకు ఆదేశించింది. భద్రతా ప్రమాణాలు పాటించడంలో నిర్లక్ష్యం వహించడం వల్లే ఈ ఘోరం జరిగిందని ప్రాథమికంగా భావిస్తున్నారు. ఎండ తీవ్రత అధికంగా ఉండటం వల్ల కూడా రసాయనాలు పేలి ఉండవచ్చని నిపుణులు అంచనా వేస్తున్నారు. ఏదేమైనా, సంబరాలకు సిద్ధమవుతున్న త్రిస్సూర్‌లో ఈ మారణకాండ తీవ్ర విషాదాన్ని నింపింది. పూరం ఉత్సవాల ముంగిట జరిగిన ఈ అతిపెద్ద ప్రమాదం కేరళ ప్రజలను కలచివేస్తోంది. మృతదేహాలను వెలికితీసే ప్రక్రియ ఇంకా కొనసాగుతుండగా, బాణసంచా కేంద్రం యజమాని మరియు నిర్వాహకులపై కఠిన చర్యలు తీసుకోవాలని స్థానికులు డిమాండ్ చేస్తున్నారు.