మైనర్పై లైంగిక దాడి.
* నిందితుడికి 20 ఏళ్ల కఠిన కారాగార శిక్ష.
*అత్తాపూర్ పోక్సో కేసులో రంగారెడ్డి జిల్లా కోర్టు సంచలన తీర్పు.
*బాధితురాలికి రూ. 3 లక్షల పరిహారం.. పోలీసుల పక్కా విచారణకు దక్కిన ఫలితం.
హైదరాబాద్, మహా.
మైనర్ బాలికపై లైంగిక దాడికి పాల్పడిన కేసులో నిందితుడికి గౌరవ న్యాయస్థానం ఇరవై ఏళ్ల కఠిన కారాగార శిక్ష విధిస్తూ సంచలన తీర్పు వెలువరించింది. అత్తాపూర్ పోలీస్ స్టేషన్ పరిధిలో ఐదేళ్ల క్రితం జరిగిన ఈ అమానుష ఘటనపై రాజేంద్రనగర్లోని రంగారెడ్డి జిల్లా ఫాస్ట్ ట్రాక్ స్పెషల్ కోర్టు నేడు తుది తీర్పును ప్రకటించింది. షాద్నగర్కు చెందిన నిందితుడు అరుణ్ అలియాస్ నాని (23) వృత్తిరీత్యా ఆటో డ్రైవర్ కాగా, మైనర్ బాలిక జీవితాన్ని చిన్నాభిన్నం చేసినందుకు గాను చట్టం తన పని తాను చేసుకుపోయింది.
కేసు వివరాల్లోకి వెళితే, 2019 ఫిబ్రవరి 12న నిందితుడు అరుణ్, 16 ఏళ్ల మైనర్ బాలికను ప్రేమిస్తున్నానని, పెళ్లి చేసుకుంటానని నమ్మించి యాదగిరిగుట్టకు తీసుకెళ్లాడు. అక్కడ నిబంధనలకు విరుద్ధంగా వివాహం చేసుకున్న తర్వాత, సదరు బాలిక మైనర్ అని తెలిసి కూడా ఆమెపై పలుమార్లు లైంగిక దాడికి పాల్పడ్డాడు. బాధితురాలి బంధువుల ఫిర్యాదుతో రంగంలోకి దిగిన అత్తాపూర్ పోలీసులు నిందితుడిపై ఐపీసీ సెక్షన్లతో పాటు పోక్సో చట్టం కింద కేసు నమోదు చేసి దర్యాప్తు చేపట్టారు.
ప్రాసిక్యూషన్ సమర్పించిన పక్కా సాక్ష్యాధారాలు, శాస్త్రీయ ఆధారాలను క్షుణ్ణంగా పరిశీలించిన గౌరవ న్యాయమూర్తి, నిందితుడిని దోషిగా నిర్ధారించారు. ఇందుకు గాను 20 ఏళ్ల కఠిన కారాగార శిక్షతో పాటు 8 వేల రూపాయల జరిమానా విధించారు. అంతేకాకుండా, బాధితురాలికి కలిగిన నష్టానికి పరిహారంగా రూ. 3,00,000/- అందజేయాలని కోర్టు ఆదేశించింది. మహిళలు, చిన్నారుల భద్రత విషయంలో రాజీ పడే ప్రసక్తే లేదని ఈ తీర్పు ద్వారా మరోసారి స్పష్టమైంది.
ఈ కేసును తార్కిక ముగింపునకు తీసుకురావడంలో అప్పటి దర్యాప్తు అధికారి, రిటైర్డ్ ఏసీపీ కె. అశోక్ చక్రవర్తి సేకరించిన శాస్త్రీయ ఆధారాలు కీలకమయ్యాయి. స్పెషల్ పీపీ బి. వెంకటేశ్వర్ రెడ్డి కోర్టులో తన వాదనలను సమర్థవంతంగా వినిపించగా, ప్రస్తుత ఇన్స్పెక్టర్ కె. నాగేశ్వరరావు నేతృత్వంలోని బృందం నిరంతర కృషి చేసింది. కోర్టు డ్యూటీ ఆఫీసర్ రవీందర్, మధుకర్ మరియు విమెన్ ఎస్సై పార్వతిల సమన్వయంతో నిందితుడికి శిక్ష పడటం పట్ల పోలీస్ శాఖ సంతృప్తి వ్యక్తం చేసింది. చిన్నారులపై అకృత్యాలకు పాల్పడితే చట్టం నుండి తప్పించుకోవడం ఎవరికైనా అసాధ్యమని అత్తాపూర్ పోలీసులు హెచ్చరించారు.
