- ఆకాశాన్నంటుతున్న విమాన ఇంధన ధరలు.
- ఆదుకోకుంటే విమానాలు ఆగిపోయే ప్రమాదం.
- పన్నులు తగ్గించాలని విమానయాన సంస్థల డిమాండ్.
ఢిల్లీ, మహా.
విమాన ఇంధన ధరలు (ఏటీఎఫ్) రికార్డు స్థాయిలో పెరగడంపై ఫెడరేషన్ ఆఫ్ ఇండియన్ ఎయిర్లైన్స్ (ఎఫ్ఐఏ) తీవ్ర ఆందోళన వ్యక్తం చేసింది. అంతర్జాతీయ మార్కెట్లో క్రూడాయిల్ ధరలు పెరగడం, ముఖ్యంగా పశ్చిమాసియాలో నెలకొన్న ఉద్రిక్తతల వల్ల విమాన ఇంధన ధరలు చమురు సంస్థలకు అందనంత ఎత్తుకు చేరాయని పేర్కొంది. ఈ సంక్షోభం నుంచి గట్టెక్కేందుకు కేంద్ర ప్రభుత్వం తక్షణమే జోక్యం చేసుకోవాలని కోరుతూ మంగళవారం కేంద్ర పౌర విమానయాన శాఖకు ఎఫ్ఐఏ ఒక లేఖ రాసింది. ప్రభుత్వం స్పందించి ధరలను అదుపులోకి తీసుకురాకుంటే, భారీ నష్టాల కారణంగా విమానయాన సంస్థలను కొంతకాలం పాటు మూసివేయాల్సిన దుస్థితి ఏర్పడుతుందని లేఖలో హెచ్చరించింది. ఇంటెలిజెన్స్, ఇండిగో, ఎయిర్ ఇండియా, స్పైస్ జెట్ వంటి ప్రముఖ సంస్థల తరఫున ఎఫ్ఐఏ ఈ విన్నపాన్ని అందించింది.
సాధారణ పరిస్థితుల్లో విమానయాన సంస్థల మొత్తం నిర్వహణ వ్యయంలో ఇంధన ఖర్చు 30 నుంచి 40 శాతం వరకు ఉంటుంది. అయితే, ప్రస్తుత పరిణామాల వల్ల ఈ వ్యయం ఏకంగా 55 నుంచి 60 శాతానికి పెరగడం సంస్థలపై తీరని ఆర్థిక ఒత్తిడిని కలిగిస్తోంది. ప్రస్తుతం ఒక కిలోలీటర్ ఏటీఎఫ్ ధర సుమారు రూ. 2 లక్షల వరకు ఖర్చవుతోందని, ఇంతటి భారాన్ని మోస్తూ సర్వీసులు నడపడం అసాధ్యంగా మారుతోందని ఎఫ్ఐఏ వివరించింది. కేంద్రం తక్షణమే స్పందించి ఏటీఎఫ్ పై విధిస్తున్న 11 శాతం పన్నును తగ్గించాలని, అలాగే వివిధ రాష్ట్రాల్లో 25 శాతం వరకు ఉన్న వ్యాట్ (VAT)ను తొలగించేలా చర్యలు తీసుకోవాలని డిమాండ్ చేసింది. ఇంధన ధరల్లో స్థిరత్వం తీసుకురావడానికి ఒక ప్రత్యేక వ్యవస్థను ఏర్పాటు చేయాలని కూడా కోరింది.
ఇంధన ధరల పెరుగుదల ప్రభావం ఇప్పటికే విమాన సర్వీసులపై కనిపిస్తోంది. లాభసాటి కాని పలు మార్గాల్లో సంస్థలు ఇప్పటికే సర్వీసులను తగ్గించడం లేదా పూర్తిగా రద్దు చేయడం చేస్తున్నాయి. ఈ పరిస్థితి ఇలాగే కొనసాగితే విమాన ప్రయాణం సామాన్యులకు భారం కాక తప్పదని ఎఫ్ఐఏ స్పష్టం చేసింది. ఇంధన ఖర్చులు పెరిగితే ఆ భారం అంతిమంగా విమాన టికెట్ల ధరల రూపంలో ప్రయాణికులపై పడుతుందని, ఇది పర్యాటక మరియు రవాణా రంగాలపై ప్రతికూల ప్రభావం చూపుతుందని ఆందోళన వ్యక్తం చేసింది. విమానయాన రంగం కుప్పకూలకుండా ఉండాలంటే ప్రభుత్వ రాయితీలు , పన్ను తగ్గింపులు అత్యవసరమని ఎఫ్ఐఏ పునరుద్ఘాటించింది.
