రిజిస్ట్రేషన్ల రద్దీ….

రిజిస్ట్రేషన్ల రద్దీ.
* 15 సబ్ రిజిస్ట్రార్ కార్యాలయాల్లో పనివేళల పెంపు.
* స్లాట్ల సంఖ్య పెంచాలని మంత్రి పొంగులేటి ఆదేశం.
* కొనుగోలుదారులకు ఇబ్బంది లేకుండా ప్రత్యేక ఏర్పాట్లు.
* వ్యవసాయ భూములకూ స్లాట్లు పెంచే దిశగా రెవెన్యూ శాఖ కసరత్తు.
హైదరాబాద్, మహా.
రాష్ట్రవ్యాప్తంగా భూముల మార్కెట్ విలువల సవరణకు రాష్ట్ర మంత్రివర్గం ఇటీవల తీసుకున్న కీలక నిర్ణయం నేపథ్యంలో సబ్ రిజిస్ట్రార్ కార్యాలయాలకు ఒక్కసారిగా రద్దీ పోటెత్తింది. కొన్ని ప్రాంతాల్లో వాస్తవ ధరలతో పోలిస్తే ప్రభుత్వ ధరల్లో భారీగా హెచ్చుతగ్గులు ఉండటంతో వాటిని క్రమబద్ధీకరించాలని ప్రభుత్వం నిర్ణయించింది. ఈ పరిణామంతో కొత్త ధరలు అమలులోకి రాకముందే తమ ఆస్తుల రిజిస్ట్రేషన్లను పూర్తి చేసుకోవాలనే ఉద్దేశంతో కొనుగోలుదారులు పెద్ద ఎత్తున కార్యాలయాలకు క్యూ కడుతున్నారు. ఈ అసాధారణ రద్దీని దృష్టిలో ఉంచుకున్న రాష్ట్ర రెవెన్యూ, హౌసింగ్, సమాచార పౌర సంబంధాల శాఖ మంత్రి పొంగులేటి శ్రీనివాస్ రెడ్డి కీలక నిర్ణయం తీసుకున్నారు. రిజిస్ట్రేషన్ల కోసం సుదూర ప్రాంతాల నుంచి వచ్చే ప్రజలకు ఎలాంటి అసౌకర్యం, ఇబ్బందులు కలగకుండా తక్షణమే ప్రత్యేక చర్యలు చేపట్టాలని రెవెన్యూ అధికారులను ఆయన ఆదేశించారు.
ప్రజల సౌకర్యార్థం రాష్ట్రంలో అత్యంత రద్దీగా ఉండే 15 సబ్ రిజిస్ట్రార్ కార్యాలయాల్లో పనివేళలను పొడిగిస్తూ ప్రభుత్వం నిర్ణయం తీసుకుంది. ఈ నెల 12వ తేదీ (మే 12) నుంచి ఈ ప్రత్యేక సమయపాలన అమలులోకి రానుంది. చంపాపేట్, సరూర్‌నగర్, వనస్థలిపురం, గండిపేట్, మహేశ్వరం, ఫరూఖ్‌నగర్, షాద్‌నగర్, రంగారెడ్డి రూరల్, ఎల్‌బీనగర్, శేరిలింగంపల్లి, సంగారెడ్డి, ఘట్‌కేసర్, నల్గొండ ఆర్.ఓ, పటాన్‌చెరు, కుత్బుల్లాపూర్ సబ్ రిజిస్ట్రార్ కార్యాలయాల్లో ఇకపై ఉదయం 9:30 గంటల నుంచి సాయంత్రం 6:30 గంటల వరకు నిరంతరాయంగా రిజిస్ట్రేషన్ సేవలు అందుబాటులో ఉంటాయి. కొనుగోలుదారుల రద్దీని బట్టి అవసరమైతే ఈ పదిహేను కార్యాలయాల్లో పనివేళలను మరింత పొడిగించేందుకు కూడా రాష్ట్ర ప్రభుత్వం సిద్ధంగా ఉందని మంత్రి పొంగులేటి శ్రీనివాస్ రెడ్డి స్పష్టం చేశారు.
పనివేళల పెంపుతో పాటు రిజిస్ట్రేషన్ ప్రక్రియను మరింత వేగవంతం చేసేందుకు స్లాట్ బుకింగ్‌ల సంఖ్యను కూడా తక్షణమే పెంచాలని ఉన్నతాధికారులకు మంత్రి దిశానిర్దేశం చేశారు. కేవలం ఈ 15 ఆఫీసుల్లోనే కాకుండా, రాష్ట్రవ్యాప్తంగా ఇతర ప్రాంతాల్లో రిజిస్ట్రేషన్ల రద్దీ అకస్మాత్తుగా పెరిగిన సబ్ రిజిస్ట్రార్ కార్యాలయాలను ఎప్పటికప్పుడు గుర్తించి, అక్కడి అవసరాలకు అనుగుణంగా తక్షణమే అదనపు సమయాన్ని కేటాయించాలని సూచించారు. ఇక వ్యవసాయ భూముల రిజిస్ట్రేషన్ల విషయంలోనూ రైతులు, ప్రజలు ఇబ్బంది పడకుండా చూసేందుకు ఆయా మండలాల్లోని తహసీల్దార్ కార్యాలయాలతో సమన్వయం చేసుకుంటూ రిజిస్ట్రేషన్ల ప్రక్రియను సాఫీగా కొనసాగించాలని స్పష్టమైన ఆదేశాలు జారీ చేశారు. రిజిస్ట్రేషన్ల ప్రక్రియలో పారదర్శకత, వేగం, ప్రజలకు గరిష్ట సౌకర్యం కల్పించడమే తమ ప్రభుత్వ ప్రధాన లక్ష్యమని మంత్రి ఉద్ఘాటించారు. ఈ లక్ష్యాలకు అనుగుణంగా క్షేత్రస్థాయిలో ప్రణాళికలు అమలు చేయాలని రాష్ట్ర రిజిస్ట్రేషన్ల శాఖ ఐజీ రాజీవ్ గాంధీ హనుమంతును మంత్రి పొంగులేటి ఆదేశించారు.