గుడికి వెళ్లక్కర్లేదు.
* ఇంట్లో దీపం వెలిగించినా చాలు.
* హిందూత్వంపై సుప్రీంకోర్టు సంచలన వ్యాఖ్యలు.
*హిందూయిజం ఒక జీవన విధానం.
* శబరిమల కేసు విచారణలో సుప్రీం రాజ్యాంగ ధర్మాసనం స్పష్టీకరణ.
*విశ్వాసానికి ఆచారాలు గీటురాయి కాదు.
* మత స్వేచ్ఛపై సుప్రీంకోర్టు తొమ్మిది మంది జడ్జీల బెంచ్ కీలక వ్యాఖ్యలు.
హైదరాబాద్, మహా.
హిందూ మతం అనేది కేవలం ఆచార వ్యవహారాలకు పరిమితమైనది కాదని, అదొక అత్యున్నత ‘జీవన విధానం’ అని దేశ అత్యున్నత న్యాయస్థానం సుప్రీంకోర్టు స్పష్టం చేసింది. ఒక వ్యక్తి తాను హిందువునని, తన విశ్వాసాన్ని నిరూపించుకోవడానికి ప్రతిరోజూ గుడికి వెళ్లాల్సిన పనిలేదని, ఇంట్లో భక్తితో ఒక దీపం వెలిగించుకున్నా సరిపోతుందని సంచలన వ్యాఖ్యలు చేసింది. కేరళలోని ప్రసిద్ధ శబరిమల అయ్యప్ప ఆలయంలోకి అన్ని వయసుల మహిళల ప్రవేశం సహా వివిధ మతాల్లోని వివక్ష, మత స్వేచ్ఛ పరిధిపై జరుగుతున్న విచారణలో సుప్రీంకోర్టు ప్రధాన న్యాయమూర్తి (సీజేఐ) జస్టిస్ సూర్యకాంత్ నేతృత్వంలోని తొమ్మిది మంది న్యాయమూర్తుల రాజ్యాంగ ధర్మాసనం ఈ కీలక వ్యాఖ్యలు చేసింది.
**హిందూత్వం ఒక జీవన విధానం: ధర్మాసనం స్పష్టీకరణ**
దావూదీ బోహ్రాలతో సహా పలు మతాల్లోని ఆచారాలు, మత స్వేచ్ఛ పరిధికి సంబంధించిన పిటిషన్లపై సుప్రీంకోర్టులో బుధవారం సుదీర్ఘ విచారణ జరిగింది. సీజేఐ జస్టిస్ సూర్యకాంత్ నేతృత్వంలోని ఈ ప్రతిష్టాత్మక తొమ్మిది మంది న్యాయమూర్తుల రాజ్యాంగ ధర్మాసనంలో.. జస్టిస్ బీవీ నాగరత్న, జస్టిస్ ఎంఎం సుందరేశ్, జస్టిస్ అహ్సనుద్దీన్ అమానుల్లా, జస్టిస్ అరవింద్ కుమార్, జస్టిస్ అగస్టిన్ జార్జ్ మసీహ్, జస్టిస్ ప్రసన్న బి వరాలే, జస్టిస్ ఆర్ మహదేవన్, జస్టిస్ జోయ్ మాల్యా బాగ్చి సభ్యులుగా ఉన్నారు. ఈ విచారణ సందర్భంగా హిందూ మతం మూలాలపై ఆసక్తికర చర్చ జరిగింది. హిందూ మతాన్ని ఒక జీవన విధానంగానే చూడాలని, భక్తిని కేవలం ఆచారాలతో కొలవలేమని ధర్మాసనం అభిప్రాయపడింది.
**శబరిమల కేసు: పునస్సమీక్ష పిటిషన్లపై ఉత్కంఠ**
కేరళలోని శబరిమల ఆలయంలోకి 10 నుంచి 50 సంవత్సరాల మధ్య వయస్సు గల మహిళలను అనుమతించకపోవడం రాజ్యాంగ విరుద్ధమంటూ 2018 సెప్టెంబర్ 28న సుప్రీంకోర్టు చారిత్రాత్మక తీర్పునిచ్చిన విషయం తెలిసిందే. అప్పటి సీజేఐ జస్టిస్ దీపక్ మిశ్రా నేతృత్వంలోని ఐదుగురు న్యాయమూర్తుల రాజ్యాంగ ధర్మాసనం 4:1 మెజారిటీతో ఈ తీర్పును వెలువరించింది. అయితే, నాటి తీర్పును సవాలు చేస్తూ దాఖలైన పునస్సమీక్ష (రివ్యూ) పిటిషన్లపై ప్రస్తుతం ఈ 9 మంది న్యాయమూర్తుల రాజ్యాంగ ధర్మాసనం విచారణ జరుపుతోంది. దీనిపై తమ వాదనలను సైతం పరిగణనలోకి తీసుకోవాలంటూ పలువురు దాఖలు చేసిన మధ్యంతర పిటిషన్లపై బుధవారం (15వ రోజు) విచారణ జరిగింది. ఇందులో ఒక పక్షం తరఫున అడ్వకేట్ డాక్టర్ జి. మోహన్ గోపాల్ తమ వాదనలు వినిపించారు.
**వేదాలే అత్యున్నత ప్రమాణమా?: కోర్టులో ఆసక్తికర వాదనలు**
విచారణ సందర్భంగా అడ్వకేట్ డాక్టర్ జి. మోహన్ గోపాల్ వాదనలు వినిపిస్తూ.. హిందూ మతాన్ని నిర్వచించే విధానంపై కీలక ప్రశ్నలు లేవనెత్తారు. “1966లో ఇచ్చిన ఒక తీర్పులో.. మతం, తత్వశాస్త్రానికి సంబంధించిన అన్ని విషయాల్లో వేదాలను అత్యున్నత ప్రమాణంగా అంగీకరించేవాడే హిందువు అని కోర్టులు నిర్వచించాయి. కానీ హిందువులందరి అభిప్రాయాలను తీసుకోకుండానే గతంలో కోర్టులు ఈ నిర్ణయానికి వచ్చాయి. నాకు వేదాల పట్ల అత్యంత గౌరవం ఉంది. అయితే, నేడు హిందువులుగా వర్గీకరించబడిన ప్రతి ఒక్కరూ అన్ని ఆధ్యాత్మిక, తాత్విక విషయాల్లో వేదాలను అత్యున్నత ప్రమాణంగా అంగీకరిస్తున్నారన్నది వాస్తవమేనా?” అని ఆయన ప్రశ్నించారు. హిందూ మతంలోని పలు వర్గాల నుంచే ప్రస్తుతం సామాజిక న్యాయం కోసం డిమాండ్ వస్తోందని కోర్టు దృష్టికి తీసుకువచ్చారు.
**గుడిసెలో దీపం వెలిగించినా చాలు: సీజేఐ, జస్టిస్ నాగరత్న వ్యాఖ్యలు**
అడ్వకేట్ మోహన్ గోపాల్ లేవనెత్తిన వాదనలపై జస్టిస్ బీవీ నాగరత్న సానుకూలంగా స్పందించారు. “అందుకే హిందూ మతాన్ని ఒక జీవన విధానం అంటారు. ఒక హిందువు హిందువుగా ఉండటానికి, తన విశ్వాసాన్ని నిలుపుకోవడానికి తప్పనిసరిగా గుడికి వెళ్లడం గానీ, ఏదైనా నిర్దిష్టమైన ఆచారం పాటించడం గానీ అవసరం లేదు. కచ్చితంగా ఆచారబద్ధంగా ఉండాల్సిన పనిలేదు. ప్రజలు తమ అంతరంగంలో విశ్వాసాన్ని కలిగి ఉండటాన్ని ఎవరూ అడ్డుకోలేరు” అని ఆమె స్పష్టం చేశారు. ఈ సందర్భంగా సీజేఐ జస్టిస్ సూర్యకాంత్ కలుగజేసుకుంటూ.. “ఒక వ్యక్తి తన హిందూ మత విశ్వాసాన్ని నిరూపించుకోవడానికి, గుడిసెలో భక్తితో ఒక దీపాన్ని వెలిగించుకున్నా సరిపోతుంది” అని అత్యంత కీలక వ్యాఖ్యలు చేశారు. న్యాయస్థానం చేసిన ఈ వ్యాఖ్యలు ఇప్పుడు దేశవ్యాప్తంగా చర్చనీయాంశంగా మారాయి.
