ఎల్లుండి విచారణకు వస్తా.
* నా వద్ద కీలక ఆధారాలున్నాయి.
* సిట్కు బండి భగీరథ్ లేఖ.
* సిట్ విచారణకు పూర్తి సహకారం.
* ఉత్కంఠకు తెరదించిన భగీరథ్ లేఖ.
హైదరాబాద్, మహా.
బండి భగీరథ్ వ్యవహారం మరో కీలక మలుపు తిరిగింది. పోక్సో కేసులో ఆయన పరారీలో ఉన్నారంటూ బుధవారం ఉదయం హైదరాబాద్ ఐటీ కారిడార్లో పోస్టర్లు కలకలం రేపిన కొద్ది గంటల్లోనే.. భగీరథ్ స్వయంగా సిట్ అధికారులకు ఒక లేఖ రాయడం రాష్ట్ర రాజకీయాల్లో తీవ్ర చర్చనీయాంశంగా మారింది. పోలీసుల విచారణకు తాను పూర్తిగా సహకరిస్తానని, అయితే నేడు (మే 13) విచారణకు హాజరుకాలేనని ఆ లేఖలో ఆయన స్పష్టం చేశారు. ఎల్లుండి (శుక్రవారం) విచారణకు హాజరవుతానని, తన వాదనను వినిపించేందుకు అవసరమైన ‘కీలక ఆధారాలతో’ వస్తానని ఆయన బాంబు పేల్చారు. తాను పారిపోలేదని, ఆధారాలు సేకరించే పనిలో ఉన్నానని చెప్పకనే చెప్పిన ఈ లేఖతో.. ఆ ఆధారాలు ఏమిటన్న దానిపై సర్వత్రా ఉత్కంఠ నెలకొంది.
**గడువు కోరిన భగీరథ్.. కారణాలివే..**
పేట్ బషీరాబాద్ పోలీస్ స్టేషన్లో నమోదైన పోక్సో కేసు విచారణలో భాగంగా బుధవారం విచారణకు హాజరుకావాలని సిట్ అధికారులు నోటీసులు ఇచ్చిన విషయం తెలిసిందే. అయితే, ఈ నోటీసులపై భగీరథ్ తక్షణమే స్పందిస్తూ సిట్కు ఒక వివరణాత్మక లేఖ పంపారు. అధికారులు విచారణకు హాజరుకావాలని కోరుతూ తనకు చాలా తక్కువ సమయం (షార్ట్ నోటీస్) ఇచ్చారని, ఇంత తక్కువ వ్యవధిలో పూర్తి వివరాలు తీసుకుని రావడం ఆచరణ సాధ్యం కాదని ఆయన ఆ లేఖలో పేర్కొన్నారు. కొన్ని వ్యక్తిగత ఇబ్బందుల కారణంగా తాను నేటి విచారణకు రాలేకపోతున్నానని అధికారులకు స్పష్టంగా వివరించారు.
**శుక్రవారం విచారణకు సై.. ‘కీలక పత్రాల’ సేకరణ**
పోలీసుల దర్యాప్తు నుంచి తాను పారిపోవడం లేదని, చట్టాన్ని గౌరవిస్తూ విచారణకు నూటికి నూరు శాతం సహకరిస్తానని భగీరథ్ తన లేఖలో హామీ ఇచ్చారు. కేసు దర్యాప్తునకు అవసరమైన అన్ని సమాచారాలు, పత్రాలు అందించేందుకు తాను సిద్ధంగా ఉన్నానని తెలిపారు. అయితే, ఈ కేసుకు సంబంధించిన వ్యవహారంలో తనకు అనుకూలంగా ఉన్న డాక్యుమెంట్లు, ఇతర వివరాలు సేకరించడానికి తనకు కనీసం రెండు రోజుల గడువు కావాలని పోలీసులను కోరారు. శుక్రవారం నాడు సిట్ ఎదుట విచారణకు హాజరవుతానని, ఆ సమయంలో తన వాదనకు బలాన్నిచ్చే ఆ ‘కీలక ఆధారాలను’ సైతం అధికారులకు అందజేస్తానని ఆయన పేర్కొనడం ఈ కేసులో సరికొత్త ట్విస్ట్కు దారితీసింది.
**పోస్టర్ల ఎఫెక్ట్.. వ్యూహాత్మక అడుగు**
ఉదయం శేరిలింగంపల్లి, గచ్చిబౌలి ప్రాంతాల్లో ‘భగీరథ్ పరారీ’ అంటూ గుర్తుతెలియని వ్యక్తులు అంటించిన పోస్టర్లు, మహిళా సంఘాల ఆందోళనలతో అధికార, విపక్షాల మధ్య మాటల యుద్ధం తారాస్థాయికి చేరిన రోజే ఈ లేఖ బయటకు రావడం గమనార్హం. తాను పరారీలో ఉన్నానన్న తప్పుడు ప్రచారానికి చెక్ పెట్టేందుకే ఆయన వెంటనే ఈ లేఖను సిట్కు పంపినట్లు న్యాయ, రాజకీయ విశ్లేషకులు భావిస్తున్నారు. తద్వారా విచారణకు తాను సిద్ధమేనన్న స్పష్టమైన సంకేతాలు పంపడంతో పాటు, సాక్ష్యాల సేకరణ కోసం న్యాయబద్ధంగా సమయం అడిగి కేసును వ్యూహాత్మకంగా ఎదుర్కొనే ప్రయత్నం చేస్తున్నారు.
**సిట్ తదుపరి చర్యలపై ఉత్కంఠ**
భగీరథ్ రాసిన లేఖను సిట్ అధికారులు లోతుగా పరిశీలిస్తున్నారు. ఆయన కోరిన రెండు రోజుల గడువు ఇచ్చేందుకు దర్యాప్తు బృందం అంగీకరించే అవకాశం ఉన్నట్లు తెలుస్తోంది. ఒకవేళ శుక్రవారం ఆయన విచారణకు వస్తే.. ఎలాంటి సాక్ష్యాధారాలు తీసుకువస్తారు? లైంగిక వేధింపుల ఆరోపణలను తిప్పికొట్టేలా ఆయన వద్ద ఉన్న ఆ బ్రహ్మాస్త్రం ఏంటి? సిట్ సంధించే ప్రశ్నలకు ఆయన ఎలాంటి సమాధానాలు ఇస్తారు? అనే విషయాలపై ఇప్పుడు రెండు తెలుగు రాష్ట్రాల్లో తీవ్ర ఆసక్తి నెలకొంది. ఒక కేంద్ర మంత్రి కుమారుడు విచారణను ఎదుర్కోబోతుండటంతో, శుక్రవారం జరగబోయే విచారణ పర్వం జాతీయ స్థాయిలోనూ ప్రాధాన్యత సంతరించుకుంది.
