బెంగాల్లో ఎన్ఫోర్స్మెంట్ డైరెక్టరేట్ మెరుపు దాడులు.
* వాంటెడ్ క్రిమినల్ ‘సోనా పప్పు’ దందాపై ఈడీ ఉక్కుపాదం.
* కోల్కతా రాయ్ స్ట్రీట్లోని వ్యాపారవేత్త ఇల్లు, హోటల్లో ముమ్మర సోదాలు.
* పాత నోట్ల మార్పిడి, హవాలా లింకులపై ఆరా.
* మాజీ డిప్యూటీ కమిషనర్ శంతన్ సిన్హా నివాసంలోనూ తనిఖీలు.
* ఏకకాలంలో పలుచోట్ల రికార్డుల పరిశీలనతో వణికిపోతున్న అక్రమార్కులు.
కోల్కతా,మహా.
పశ్చిమ బెంగాల్లో ఎన్ఫోర్స్మెంట్ డైరెక్టరేట్ (ఈడీ) అధికారులు మరోసారి ఉక్కుపాదం మోపారు. రాష్ట్రవ్యాప్తంగా గురువారం తెల్లవారుజాము నుంచే ఏకకాలంలో అనేక చోట్ల ఈడీ అధికారులు మెరుపు దాడులు నిర్వహించారు. దేశవ్యాప్తంగా సంచలనం సృష్టిస్తున్న వాంటెడ్ క్రిమినల్ ‘సోనా పప్పు’ అక్రమ దందా, హవాలా నెట్వర్క్ను ఛేదించడమే లక్ష్యంగా ఈ సోదాలు కొనసాగుతున్నాయి. కోల్కతా సహా పరిసర ప్రాంతాల్లోని పలు కీలక స్థావరాలపై కేంద్ర బలగాల భారీ భద్రత నడుమ అధికారులు విరుచుకుపడటంతో అక్రమార్కుల గుండెల్లో రైళ్లు పరిగెడుతున్నాయి.
ఈ దాడుల్లో భాగంగా కోల్కతాలోని ప్రముఖ వ్యాపార ప్రాంతమైన రాయ్ స్ట్రీట్పై ఈడీ ప్రత్యేకంగా దృష్టి సారించింది. అక్కడ నివసిస్తున్న ఒక ప్రముఖ వ్యాపారవేత్త నివాసంతో పాటు, ఆయనకు చెందిన లగ్జరీ హోటల్లో అధికారులు అంగుళం అంగుళం గాలిస్తున్నారు. సోనా పప్పుతో సదరు వ్యాపారవేత్తకు ఉన్న ఆర్థిక లావాదేవీలు, బినామీ పెట్టుబడులకు సంబంధించిన కీలక పత్రాలను అధికారులు స్వాధీనం చేసుకున్నట్లు సమాచారం. గత కొంతకాలంగా సాగుతున్న ఈ అక్రమ సామ్రాజ్యానికి ఈ హోటల్ వేదికగా మారిందన్న పక్కా నిఘా వర్గాల సమాచారంతోనే ఈ వ్యూహాత్మక దాడులు జరిగినట్లు తెలుస్తోంది.
మరోవైపు, ఈ వ్యవహారంలో ఉన్నతాధికారుల హస్తంపై వస్తున్న ఆరోపణల నేపథ్యంలో.. మాజీ డిప్యూటీ కమిషనర్ శంతన్ సిన్హా నివాసంలోనూ ఈడీ అధికారులు తనిఖీలు చేపట్టడం రాష్ట్రంలో కలకలం రేపుతోంది. ఆయన పదవిలో ఉన్న సమయంలో సోనా పప్పు అక్రమ దందాలకు పరోక్షంగా సహకరించారనే అనుమానాలతో పాటు, పెద్ద ఎత్తున చేతులు మారిన నల్లధనంపై అధికారులు ఆరా తీస్తున్నారు. శంతన్ సిన్హా నివాసంలోని డిజిటల్ డివైజ్లు, ల్యాప్టాప్లు, బ్యాంక్ లాకర్ల వివరాలను అధికారులు క్షుణ్ణంగా పరిశీలిస్తున్నారు.
సోనా పప్పు ఆర్థిక వనరులను పూర్తిగా దెబ్బతీయడమే ధ్యేయంగా సాగుతున్న ఈ దాడులు ఇంకా కొనసాగుతూనే ఉన్నాయి. ఇప్పటివరకు జరిపిన సోదాల్లో భారీ ఎత్తున నగదు, విదేశీ కరెన్సీతో పాటు కీలకమైన ఆస్తుల పత్రాలు లభ్యమైనట్లు ఈడీ వర్గాల ద్వారా తెలుస్తోంది. ఈ దాడుల అనంతరం మరికొందరు ప్రముఖులకు ఈడీ నోటీసులు ఇచ్చే అవకాశం ఉందని, ఈ నెట్వర్క్తో సంబంధం ఉన్న ఎవరినీ వదిలిపెట్టే ప్రసక్తే లేదని దర్యాప్తు సంస్థ వర్గాలు స్పష్టం చేస్తున్నాయి.
