వృత్తిపరమైన హద్దులు మీరినందుకు శిక్ష…

వృత్తిపరమైన హద్దులు మీరినందుకు శిక్ష.
* యూకేలో భారత సంతతి వైద్యుడిపై 8 నెలల సస్పెన్షన్.
* మహిళా రోగితో లైంగిక సంబంధం.
* నిబంధనలకు విరుద్ధంగా మత్తు మందుల సిఫార్సు.
* తీవ్రమైన ఆరోపణలు నిజమని తేల్చిన మెడికల్ ప్రాక్టీషనర్స్ ట్రైబ్యునల్.
* అరుదైన వైద్య నైపుణ్యాల కారణంగా పూర్తి నిషేధం నుంచి మినహాయింపు.
లండన్,మహా
బ్రిటన్‌ (యూకే)లో భారత సంతతికి చెందిన ప్రముఖ న్యూరో సర్జన్ డాక్టర్ చిరాగ్ పటేల్‌పై అక్కడి వైద్య నియంత్రణ సంస్థ కఠిన చర్యలు తీసుకుంది. రోగితో వృత్తిపరమైన హద్దులు మీరి ప్రవర్తించారన్న ఆరోపణలపై విచారణ జరిపిన ‘మెడికల్ ప్రాక్టీషనర్స్ ట్రైబ్యునల్ సర్వీస్’ ఆయనపై ఎనిమిది నెలల పాటు సస్పెన్షన్ విధిస్తూ ఉత్తర్వులు జారీ చేసింది. చికిత్స కోసం వచ్చిన ఒక మహిళా రోగితో లైంగిక సంబంధం పెట్టుకోవడంతో పాటు, నిబంధనలకు విరుద్ధంగా ఆమెకు తీవ్రమైన మత్తు కలిగించే మందులను ప్రిస్క్రైబ్ చేశారన్న ఆరోపణలు రుజువు కావడంతో ట్రైబ్యునల్ ఈ సంచలన నిర్ణయం తీసుకుంది.
**శస్త్రచికిత్సతో మొదలైన పరిచయం..**
కేసు వివరాల్లోకి వెళితే.. డాక్టర్ చిరాగ్ పటేల్ వేల్స్‌లోని కార్డిఫ్ నగరంలో గల ‘యూనివర్సిటీ హాస్పిటల్ ఆఫ్ వేల్స్’లో ప్రముఖ న్యూరో సర్జన్‌గా సేవలందిస్తున్నారు. 2019వ సంవత్సరంలో వెన్నెముక సమస్యతో బాధపడుతున్న ఒక మహిళకు ఆయన శస్త్రచికిత్స (ఆపరేషన్) చేశారు. ఈ క్రమంలో వారిద్దరి మధ్య వైద్యుడికి, రోగికి ఉండాల్సిన సంబంధాన్ని దాటి వ్యక్తిగత పరిచయం ఏర్పడింది. అది కాస్తా లైంగిక సంబంధానికి దారితీయగా, దాదాపు ఆరు నెలల పాటు ఈ వ్యవహారం కొనసాగింది. ఈ కాలంలో డాక్టర్ చిరాగ్ పటేల్ సదరు మహిళకు అశ్లీల చిత్రాలు, సందేశాలు పంపినట్లు కూడా అంతర్గత విచారణలో సాక్ష్యాధారాలతో సహా స్పష్టమైంది.
**రికార్డులు లేకుండా మత్తు మందుల సరఫరా**
కొంతకాలం తర్వాత వారిద్దరి మధ్య వ్యక్తిగత సంబంధాలు క్షీణించాయి. ఈ క్రమంలోనే 2022 మే నెల నుంచి 2023 జనవరి మధ్య కాలంలో డాక్టర్ పటేల్ నిబంధనలకు విరుద్ధంగా వ్యవహరించారు. ఎలాంటి వైద్యపరమైన రికార్డులను నమోదు చేయకుండా, కనీసం ఆమెను నిరంతరం పర్యవేక్షించే జనరల్ ఫిజీషియన్ (కుటుంబ వైద్యుడు)కు కూడా ముందస్తు సమాచారం ఇవ్వకుండా మార్ఫిన్ సల్ఫేట్, డయాజెపామ్ వంటి తీవ్రమైన మత్తు కలిగించే మందులను ఆమెకు రాసిచ్చారు. వైద్యరంగంలో అత్యంత ప్రమాదకరమైన మందులుగా పరిగణించే వీటిని సరైన కారణం లేకుండా రోగికి సిఫార్సు చేయడం తీవ్రమైన వృత్తిపరమైన నేరంగా ట్రైబ్యునల్ పరిగణించింది.
**బ్లాక్‌మెయిల్ చేశారన్న వైద్యుడి వాదన**
ఈ ఆరోపణలపై జరిగిన ట్రైబ్యునల్ విచారణలో డాక్టర్ చిరాగ్ పటేల్ తన వాదనను గట్టిగా వినిపించారు. ఆ సమయంలో తాను తీవ్రమైన కుటుంబ సమస్యలతో బాధపడుతున్నానని కోర్టుకు తెలిపారు. సదరు మహిళతో ఉన్న సంబంధాన్ని తెంచుకోవడానికి తాను ప్రయత్నించిన ప్రతిసారీ, ఆమె తనను తీవ్రంగా బ్లాక్‌మెయిల్ చేసిందని ఆరోపించారు. ఈ గుట్టును బయటపెట్టి తన వైవాహిక జీవితాన్ని, సమాజంలో ఉన్న పేరుప్రతిష్ఠలను, ఉద్యోగాన్ని సర్వనాశనం చేస్తానని బెదిరించిందని ఆవేదన వ్యక్తం చేశారు. ఆ భయంతోనే ఆమె చెప్పినట్లు వినాల్సి వచ్చిందని, మందులు రాసిచ్చానని చెబుతూ పశ్చాత్తాపం వ్యక్తం చేశారు.
అయితే, డాక్టర్ పటేల్ వినిపించిన ఈ ఆత్మరక్షణ వాదనలను ట్రైబ్యునల్ పూర్తిగా తోసిపుచ్చింది. ఎదుటివారు బెదిరించినప్పటికీ ఒక వైద్యుడిగా రోగి భద్రతను, వైద్య నైతిక విలువలను గాలికొదిలేయడం క్షమార్హం కాదని స్పష్టం చేసింది. తన వృత్తిగత బాధ్యతలను విస్మరించి కేవలం తనను, తన కుటుంబాన్ని కాపాడుకోవడానికే ఆయన ప్రాధాన్యత ఇచ్చారని అభిప్రాయపడింది. వృత్తిపరమైన హద్దులు మీరినందుకు శిక్షగా 8 నెలల సస్పెన్షన్ విధిస్తున్నట్లు ప్రకటించింది. అయితే, వేల్స్ ప్రాంతంలో ‘న్యూరోమాడ్యులేషన్’ శస్త్రచికిత్సా ప్రక్రియలలో డాక్టర్ చిరాగ్ పటేల్‌కున్న విశేషమైన, అరుదైన అంతర్జాతీయ వైద్య నైపుణ్యాలను, రోగులకు ఆయన సేవలు ఎంతైనా అవసరమనే విషయాన్ని పరిగణనలోకి తీసుకుని.. మెడికల్ రిజిస్టర్ నుంచి ఆయన పేరును శాశ్వతంగా తొలగించే (ప్రాక్టీస్ రద్దు) కఠిన నిర్ణయం నుంచి మాత్రం మినహాయింపు ఇస్తున్నట్లు ట్రైబ్యునల్ స్పష్టం చేసింది.