ప్రతి ఒత్తిడిని తట్టుకొని.
*పారదర్శకంగా ఓటర్ల జాబితా రూపకల్పన.
* సీఈసీ జ్ఞానేశ్ కుమార్.
దిల్లీ,మహా.
ప్రజాస్వామ్య వ్యవస్థకు వెన్నెముక లాంటి ఓటర్ల జాబితా రూపకల్పనలో భారత ఎన్నికల సంఘం అత్యంత పారదర్శకమైన ప్రమాణాలను పాటిస్తోందని దేశ ప్రధాన ఎన్నికల కమిషనర్ (సీఈసీ) జ్ఞానేశ్ కుమార్ స్పష్టం చేశారు. ఓటర్ల జాబితా ప్రత్యేక సవరణ (ఎస్ఐఆర్) ప్రక్రియపై రాజకీయ వర్గాల నుంచి వస్తున్న విమర్శలు, అభ్యంతరాల నేపథ్యంలో ఆయన గట్టి సమాధానమిచ్చారు. క్షేత్రస్థాయిలో రాత్రింబవళ్లు ఎన్నో ప్రతికూల పరిస్థితులు, రాజకీయ ఒత్తిళ్లు ఎదురవుతున్నప్పటికీ.. వాటన్నింటినీ అధిగమించి అధికారులు నిష్పక్షపాతంగా విధులను నిర్వహిస్తున్నారని అభినందించారు. దేశ రాజధానిలో నిర్వహించిన ఒక ఉన్నత స్థాయి సమీక్షా సమావేశంలో ఆయన మాట్లాడారు.
**రాజకీయ పార్టీల సమక్షంలోనే సవరణలు..**
ఓటర్ల జాబితా తయారీ అనేది ఏకపక్షంగా సాగే ప్రక్రియ కాదని, ఇందులో ప్రతి దశలోనూ అన్ని జాతీయ, ప్రాంతీయ రాజకీయ పార్టీల భాగస్వామ్యం ఉంటుందని సీఈసీ గుర్తుచేశారు. దేశవ్యాప్తంగా ఉన్న 11 లక్షలకు పైగా బూత్ స్థాయి అధికారులు, అసిస్టెంట్ ఎన్నికల రిజిస్ట్రేషన్ అధికారులు నిరంతరం క్షేత్రస్థాయిలో పర్యవేక్షిస్తుంటారని తెలిపారు. వీరికి తోడుగా వివిధ రాజకీయ పార్టీలకు చెందిన 15 లక్షల మందికి పైగా బూత్ స్థాయి ఏజెంట్లు (బీఎల్ఏ), జిల్లా, రాష్ట్ర అధ్యక్షుల సమక్షంలోనే ఈ ప్రత్యేక సవరణలు జరుగుతున్నాయని వివరించారు. ఎక్కడైనా లోపాలు ఉంటే సరిదిద్దడానికి రాజకీయ పార్టీలకు పూర్తి అవకాశం కల్పిస్తున్నామని, ఇంతటి పకడ్బందీ పర్యవేక్షణ ఉన్నందునే మన ఓటర్ల జాబితా ప్రపంచంలోనే అత్యంత కచ్చితమైనదిగా గుర్తింపు పొందిందని ఆయన నొక్కిచెప్పారు.
**అంకితభావంతో పనిచేస్తున్న ‘డిప్యూటేషన్’ సిబ్బంది..**
ఎన్నికల విధుల్లో పాల్గొంటున్న సిబ్బందిని ఉద్దేశించి సీఈసీ ఆసక్తికర వ్యాఖ్యలు చేశారు. ఈ బృహత్తర ప్రక్రియలో భాగస్వాములైన అధికారులంతా వాస్తవానికి వివిధ రాష్ట్ర ప్రభుత్వాల్లో పనిచేసే ఉద్యోగులేనని పేర్కొన్నారు. ప్రజాస్వామ్యయుతంగా, పారదర్శకంగా ఓటర్ల జాబితాను సిద్ధం చేసే పవిత్ర బాధ్యత కోసం వారంతా ప్రస్తుతం కేంద్ర ఎన్నికల సంఘం పరిధిలో డిప్యూటేషన్పై అంకితభావంతో సేవలందిస్తున్నారని కొనియాడారు. రాజ్యాంగబద్ధమైన ఈ విధి నిర్వహణలో ఈసీతో భుజం భుజం కలిపి నడుస్తున్న దేశంలోని ప్రముఖ న్యాయవాదులకు, లక్షలాది మంది బూత్ స్థాయి అధికారులకు, ఏజెంట్లకు ఈ సందర్భంగా జ్ఞానేశ్ కుమార్ ప్రత్యేక కృతజ్ఞతలు తెలియజేశారు. విమర్శలను పక్కనబెట్టి, అత్యంత స్వచ్ఛమైన ఓటర్ల జాబితాను దేశ ప్రజలకు అందించడమే తమ ప్రథమ ప్రాధాన్యమని ఆయన స్పష్టం చేశారు.
