దేశ రాజకీయాల్లో ముమ్మర ఊహాగానాలు.
• అఖండ కాంగ్రెస్’ వైపు అడుగులు!
* మమతా బెనర్జీ, శరద్ పవార్ పార్టీల విలీనంపై రాజకీయ వర్గాల్లో జోరుగా చర్చ.
* రాహుల్ గాంధీ నాయకత్వంలో ప్రతిపక్షాల ఏకీకరణకు వ్యూహం.
ఢిల్లీ, మహా.
దేశంలో మారుతున్న రాజకీయ సమీకరణాలు ప్రతిపక్ష కాంగ్రెస్ పార్టీకి కొత్త జవసత్వాలను ఇచ్చేలా కనిపిస్తున్నాయి. ముఖ్యంగా పశ్చిమ బెంగాల్ ఎన్నికల్లో ఘోర పరాజయం తర్వాత మమతా బెనర్జీ నేతృత్వంలోని తృణమూల్ కాంగ్రెస్ (టీఎంసీ) తీవ్ర అంతర్గత సంక్షోభంలో మునిగిపోవడం, పార్టీ స్పష్టంగా రెండు ముక్కలుగా చీలిపోవడాన్ని కాంగ్రెస్ పార్టీ రాజకీయంగా అనుకూలంగా మార్చుకునే ప్రయత్నాలు చేస్తోంది. మెజారిటీ ఎమ్మెల్యేలు, ఎంపీలు తిరుగుబాటు బావుటా ఎగురవేయడంతో మమత వద్ద ప్రస్తుతం కొద్దిమంది ప్రజాప్రతినిధుల మద్దతు మాత్రమే మిగిలింది. ఈ నేపథ్యంలో, మనుగడ కోసం ఆమె తన పార్టీని కాంగ్రెస్లో విలీనం చేయబోతున్నారనే వార్తలు దేశవ్యాప్తంగా దావానలంలా వ్యాపించాయి. కేవలం మమతా బెనర్జీ మాత్రమే కాకుండా, మహారాష్ట్రకు చెందిన సీనియర్ నేత శరద్ పవార్ సైతం తన నేషనలిస్ట్ కాంగ్రెస్ పార్టీ (ఎన్సీపీ) ని మాతృపార్టీ అయిన కాంగ్రెస్లో విలీనం చేసే అవకాశాలు ఉన్నాయంటూ వస్తున్న ఊహాగానాలు రాజకీయ వర్గాల్లో తీవ్ర సంచలనం సృష్టిస్తున్నాయి.
గతంలో కాంగ్రెస్ సిద్ధాంతాలతో విభేదించి, ఆ పార్టీ నుంచి బయటకు వచ్చి సొంతంగా ప్రాంతీయ పార్టీలను స్థాపించి సక్సెస్ అయిన వారే మమతా బెనర్జీ, శరద్ పవార్. ఇప్పుడు దేశంలో మారుతున్న రాజకీయ పరిణామాల నేపథ్యంలో, తమ ఉనికిని కాపాడుకోవడానికి వీరంతా తిరిగి తమ మాతృపార్టీ గూటికే చేరతారనే ప్రచారం జోరందుకుంది. ఇదే గనుక నిజమైతే దేశంలో ‘అఖండ కాంగ్రెస్’ ఆవిర్భావం సాధ్యమవుతుందని విశ్లేషకులు భావిస్తున్నారు. అయితే, ఈ విలీన వార్తలను అటు టీఎంసీ, ఇటు కాంగ్రెస్ అధిష్ఠానం పైకి తోసిపుచ్చుతున్నప్పటికీ క్షేత్రస్థాయిలో ప్రచారం మాత్రం ఆగడం లేదు. కాంగ్రెస్ జాతీయ ప్రధాన కార్యదర్శి కేసీ వేణుగోపాల్ ఇప్పటికే ఈ వార్తలను అధికారికంగా ఖండించినప్పటికీ, ఆయా పార్టీల సీనియర్ నేతలు చేస్తున్న వ్యాఖ్యలు ఈ ఊహాగానాలకు మరింత బలాన్ని చేకూరుస్తున్నాయి.
మహారాష్ట్ర కాంగ్రెస్ సీనియర్ నేత నానా పటోలే చేసిన తాజా వ్యాఖ్యలు ఇప్పుడు దేశ రాజకీయాల్లో కొత్త చర్చకు దారితీశాయి. ఒకే భావజాలం కలిగిన పార్టీలు కాంగ్రెస్లో విలీనం కావడానికి సిద్ధంగా ఉన్నాయని, శరద్ పవార్, మమతా బెనర్జీ కూడా ఇదే దిశగా ఆలోచిస్తున్నారని ఆయన బహిరంగంగానే వ్యాఖ్యానించారు. ఇది కేవలం ఎన్నికల పొత్తు మాత్రమే కాదని, పూర్తిస్థాయి విలీనం కావచ్చని ఆయన ఆశాభావం వ్యక్తం చేశారు. శరద్ పవార్ ఇప్పటికే విలీనానికి సంబంధించిన ప్రతిపాదనలను కాంగ్రెస్ అధిష్ఠానానికి పంపారని, సాంకేతిక కారణాల వల్ల అది కాస్త ఆలస్యమైందని పటోలే బాంబు పేల్చారు. దేశంలో ఓట్ల చీలికను అడ్డుకోవాలంటే లౌకిక, ప్రజాస్వామ్య భావజాలం కలిగిన శక్తులన్నీ తప్పనిసరిగా ఏకం కావాలని ఆయన పిలుపునిచ్చారు. దీనికి తోడు ఇటీవల శివసేన (యూబీటీ) నేత సంజయ్ రౌత్ సైతం కాంగ్రెస్ నుంచి విడిపోయిన పార్టీలన్నీ తిరిగి విలీనం కావాలని, ఆ ప్రక్రియకు శరద్ పవారే నాయకత్వం వహించాలని సూచించడం గమనార్హం. ఈ వ్యాఖ్యలపై శరద్ పవార్ కుమార్తె, ఎంపీ సుప్రియా సూలే స్పందిస్తూ.. వాటిని ఖండించకుండా, ‘ముందుగా వర్షం పడనివ్వండి.. అప్పుడు గొడుగు తీసుకోవాలా లేక రెయిన్ కోట్ వేసుకోవాలా అనేది చూద్దాం’ అంటూ అత్యంత ఆసక్తికరమైన వ్యాఖ్యలు చేసి విలీన సంకేతాలను సజీవంగా ఉంచారు. రాజస్థాన్ మాజీ ముఖ్యమంత్రి, కాంగ్రెస్ సీనియర్ నేత అశోక్ గెహ్లాట్ సైతం ప్రాంతీయ పార్టీలన్నీ తిరిగి కాంగ్రెస్లో చేరాలని, రాహుల్ గాంధీ నాయకత్వాన్ని అన్ని ప్రతిపక్షాలు అంగీకరిస్తే దేశ రాజకీయాల్లో విప్లవాత్మక మార్పులు వస్తాయని పేర్కొన్నారు.
ఢిల్లీ వేదికగా ఇటీవల రాహుల్ గాంధీ – అభిషేక్ బెనర్జీ, అలాగే సోనియా గాంధీ – మమతా బెనర్జీల మధ్య వరుసగా జరిగిన రహస్య భేటీల తర్వాతే ఈ విలీన వార్తలు తెరపైకి రావడం విశేషం. ఈ భేటీల్లో భవిష్యత్తు కార్యాచరణపై లోతైన చర్చలు జరిగినట్లు తెలుస్తోంది. అయితే, ఈ వ్యవహారంపై కాంగ్రెస్ అంతర్గత వర్గాలు స్పందిస్తూ.. విలీన ప్రతిపాదన అనేది కాంగ్రెస్ వైపు నుంచి కాకుండా టీఎంసీ, ఎన్సీపీల నుంచే అధికారికంగా రావాలని, తాము ఏ పార్టీపైనా ఎలాంటి ఒత్తిడి తీసుకురాబోమని స్పష్టం చేస్తున్నాయి. ప్రాంతీయ పార్టీల బలహీనతలను ఆసరాగా చేసుకుని, రాహుల్ గాంధీ సారథ్యంలో విపక్షాలన్నింటినీ ఒకే తాటిపైకి తెచ్చేందుకు కాంగ్రెస్ గట్టిగానే వ్యూహాలు రచిస్తోందని, రానున్న రోజుల్లో దేశ రాజకీయాల్లో మరిన్ని కీలక మార్పులు చోటుచేసుకోవడం ఖాయమని రాజకీయ విశ్లేషకులు అభిప్రాయపడుతున్నారు.
