కాంగ్రెస్లో ‘లీకుల’ భూతం..
* రగులుతున్న ఢిల్లీ అధిష్ఠానం.
* మీనాక్షి నటరాజన్ నామినేషన్ తిరస్కరణ వెనుక తెలంగాణ నేతల డబుల్ గేమ్?
* ఖమ్మం రాజకీయాల్లో పెను కుదుపు.
* త్వరలో రాష్ట్ర మంత్రివర్గ, పీసీసీ భారీ ప్రక్షాళన!*
హైదరాబాద్, మహా.
దేశవ్యాప్తంగా కాంగ్రెస్ పార్టీలో ఇప్పుడు ‘లీకుల’ కలకలం రేగుతోంది. ఏకంగా కాంగ్రెస్ అగ్రనేత రాహుల్ గాంధీ అత్యంత నమ్మకంతో, స్వయంగా ఎంపిక చేసిన సీనియర్ నాయకురాలు మీనాక్షి నటరాజన్ రాజ్యసభ నామినేషన్ అనూహ్యంగా తిరస్కరణకు గురికావడం వెనుక సొంత పార్టీ నేతల వెన్నుపోటు ఉందన్న వార్తలు తెలంగాణ రాజకీయాల్లో పెను సంచలనం సృష్టిస్తున్నాయి. ఒక పెండింగ్ కేసుకు సంబంధించిన కీలక సమాచారాన్ని ఎన్నికల అఫిడవిట్లో ఉద్దేశపూర్వకంగా దాచారనే నెపంతో భోపాల్ రిటర్నింగ్ అధికారి ఆమె నామినేషన్ను నిర్దాక్షిణ్యంగా తిరస్కరించారు. సరిగ్గా ఇదే అదనుగా భావించిన బీజేపీ అభ్యర్థి మహేష్ కేవత్ చేసిన ఫిర్యాదు ఆధారంగా, ఆయనే ఏకగ్రీవంగా ఎన్నికైనట్లు ఎన్నికల అధికారులు ప్రకటించారు. అయితే, అసలు తెలంగాణలో మీనాక్షి నటరాజన్పై ఎలాంటి ఎఫ్ఐఆర్ నమోదు కాలేదని, కేవలం ఒక సాధారణ ఫిర్యాదు మాత్రమే పెండింగ్లో ఉందని కాంగ్రెస్ వర్గాలు తీవ్రంగా వాదిస్తున్నాయి. కానీ, గోరంత విషయాన్ని కొండంతలు చేసి బీజేపీకి ఉప్పందించింది సొంత పార్టీ నేతలేనన్న పక్కా సమాచారంతో ఆల్ ఇండియా కాంగ్రెస్ కమిటీ (ఏఐసీసీ) తీవ్ర ఆగ్రహంతో రగిలిపోతోంది. ఈ క్రమశిక్షణా రాహిత్యంపై ఉక్కుపాదం మోపేందుకు, అసలు ఈ లీకేజీల వెనుక ఉన్నదెవరో తేల్చేందుకు ఏఐసీసీ ఒక ప్రత్యేక అత్యున్నత స్థాయి విచారణ కమిటీని రంగంలోకి దించింది. మరోవైపు, ఈ అనూహ్య పరిణామాలతో తీవ్ర మనస్తాపానికి గురైన మీనాక్షి నటరాజన్కు తగిన ప్రాధాన్యం కల్పిస్తూ, ఆమెను పంజాబ్ రాష్ట్ర ఏఐసీసీ అబ్జర్వర్గా నియమిస్తూ అధిష్ఠానం నిర్ణయం తీసుకుంది.
ఈ మొత్తం వ్యవహారంలో ఢిల్లీ పెద్దల దృష్టి పూర్తిగా తెలంగాణ రాష్ట్ర నాయకత్వంపైనే కేంద్రీకృతమైంది. ఈ సున్నితమైన సమాచారం తెలంగాణ రాష్ట్రం నుంచే నేరుగా భోపాల్లోని బీజేపీ నాయకత్వానికి లీక్ అయిందని కాంగ్రెస్ అధిష్ఠానం బలంగా అనుమానిస్తోంది. గత కొంతకాలంగా తెలంగాణ కాంగ్రెస్ పార్టీలో, ప్రభుత్వంలో జరుగుతున్న పరిణామాలపై, ముఖ్యంగా కొందరు నేతల తీరుపై ఢిల్లీకి వరుసగా ఫిర్యాదులు వెల్లువెత్తుతున్నాయి. ఈ లీక్ వ్యవహారంతో ఆ ఫిర్యాదులకు మరింత బలం చేకూరినట్లయింది. ఈ ద్రోహుల గుట్టు రట్టు చేసేందుకు ఢిల్లీకి చెందిన కీలక నేతలు ఇప్పటికే తెలంగాణ రాష్ట్ర నాయకత్వంతో వరుస రహస్య సమావేశాలు నిర్వహించి సమాచారం సేకరించారు. ముఖ్యంగా ఒక మంత్రి వెనుక ఉండి నడిపిస్తున్న కొందరు బడా వ్యాపారవేత్తల లాబీ.. కాంగ్రెస్ పార్టీ అంతర్గత వ్యూహాలను, రహస్య సమాచారాన్ని నిత్యం బీజేపీకి లీక్ చేస్తూ అత్యంత ప్రమాదకరమైన డబుల్ గేమ్ ఆడుతున్నట్లు అధిష్ఠానం పసిగట్టింది. సాక్షాత్తూ రాహుల్ గాంధీ ప్రతిపాదించిన మీనాక్షి నటరాజన్ కేసులోనూ కచ్చితంగా ఈ వ్యాపార లాబీ, ఆ మంత్రి హస్తం ఉందన్న అనుమానాలు ఢిల్లీ వర్గాల్లో వ్యక్తమవుతున్నాయి. సొంత పార్టీకే నష్టం చేకూర్చే (సబోటేజ్) ఇలాంటి ద్రోహులకు తక్షణమే చెక్ పెట్టాలని కాంగ్రెస్ హైకమాండ్ ఒక దృఢ నిశ్చయానికి వచ్చినట్లు తెలుస్తోంది.
ఈ తాజా రాజకీయ పరిణామాల నేపథ్యంలో రాష్ట్ర ప్రభుత్వంలో, ముఖ్యంగా గ్రూపు రాజకీయాలకు కేరాఫ్ అడ్రస్గా మారిన ఉమ్మడి ఖమ్మం జిల్లా రాజకీయాల్లో భారీ కుదుపు రావడం ఖాయంగా కనిపిస్తోంది. ఖమ్మం జిల్లా నుంచి ప్రస్తుతం ఇద్దరు సీనియర్లు క్యాబినెట్ మంత్రులుగా, మరొకరు ఉప ముఖ్యమంత్రిగా ప్రాతినిధ్యం వహిస్తుండటంతో అక్కడ నాయకుల మధ్య ఆధిపత్య పోరు తీవ్రస్థాయికి చేరింది. ఈ అంతర్గత విభేదాలు, ముఠా తగాదాలు పార్టీ మనుగడకే ముప్పుగా పరిణమిస్తున్నాయని అధిష్ఠానం భావిస్తోంది. దీంతో రాబోయే క్యాబినెట్ ప్రక్షాళనలో ఖమ్మం జిల్లాకు చెందిన హేమాహేమీల శాఖల్లో భారీ మార్పులు చేర్పులు చేయడం తథ్యమని రాజకీయ విశ్లేషకులు స్పష్టం చేస్తున్నారు. లీకేజీలకు కారణమవుతున్న సదరు మంత్రి పోర్ట్ఫోలియోను మార్చేసి, ఆ కీలక స్థానాన్ని వెనుకబడిన తరగతులకు (బీసీలకు) కేటాయించడం ద్వారా అటు సామాజిక సమీకరణాలను బ్యాలెన్స్ చేయడంతో పాటు, ఇటు ద్రోహులకు చెక్ పెట్టాలని ఢిల్లీ పెద్దలు వ్యూహరచన చేస్తున్నారు.
మరోవైపు, తెలంగాణ ప్రదేశ్ కాంగ్రెస్ కమిటీ (టీపీసీసీ) పనితీరుపై కూడా అధిష్ఠానం ప్రత్యేక నిఘా పెట్టింది. రాష్ట్రంలో పార్టీ ఎదుర్కొంటున్న సంస్థాగత సవాళ్లను, అంతర్గత కుమ్ములాటలను సమర్థవంతంగా అరికట్టడంలో ప్రస్తుత టీపీసీసీ అధ్యక్షుడు మహేష్ కుమార్ గౌడ్ విఫలమవుతున్నారనే అసంతృప్తి ఢిల్లీలో వ్యక్తమవుతోంది. ఈ నేపథ్యంలో పార్టీ పగ్గాలను మరింత గట్టిగా పట్టుకోగల ఒక సీనియర్, బలమైన నేతకు టీపీసీసీ బాధ్యతలు అప్పగించే యోచనలో హైకమాండ్ ఉన్నట్లు సమాచారం. అలాగే, రాబోయే కేబినెట్ విస్తరణలో పనితీరు ఏమాత్రం బాగోలేని (నాన్-పెర్ఫార్మర్స్) మంత్రులకు ఉద్వాసన పలికేందుకు ఇప్పటికే ఒక స్పష్టమైన జాబితా సిద్ధమైనట్లు తెలుస్తోంది. పార్టీ కోసం కష్టపడి, చాలా కాలంగా మంత్రి పదవి కోసం నిరీక్షిస్తున్న కోమటిరెడ్డి రాజగోపాల్ రెడ్డి లాంటి ఫైర్ బ్రాండ్ నేతలకు ఈసారి క్యాబినెట్లో కచ్చితంగా బెర్త్ దక్కే సూచనలు బలంగా కనిపిస్తున్నాయి. అయితే, ప్రస్తుత రాజకీయ పరిస్థితుల దృష్ట్యా కొందరు అత్యంత వివాదాస్పద మంత్రులను ఇప్పుడే కదిలించకూడదని, వారిపై సరైన సమయంలో, పక్కా ఆధారాలతో వేటు వేయాలని హైకమాండ్ వ్యూహాత్మకంగా అడుగులు వేస్తోంది. మొత్తానికి మీనాక్షి నటరాజన్ ఎపిసోడ్ తెలంగాణ కాంగ్రెస్లో పెను ప్రకంపనలకు దారితీసి, సమూల ప్రక్షాళనకు బీజం వేసిందని రాజకీయ వర్గాల్లో జోరుగా చర్చ సాగుతోంది.
