- ముగ్గురు షూటర్ల అరెస్ట్.. గోల్డీ బ్రార్ కోసం ఎఫ్బీఐ ప్రత్యేక వేట.
ఢిల్లీ, మహా.
దేశ రాజధాని ఢిల్లీలో మరో లక్ష్యహత్యకు సిద్ధమైన లారెన్స్ బిష్ణోయ్ గ్యాంగ్ కుట్రను పోలీసులు భగ్నం చేశారు. రోహిణి జిల్లా స్పెషల్ స్టాఫ్ పోలీసులు ఆదివారం నిర్వహించిన ప్రత్యేక ఆపరేషన్లో ముగ్గురు షూటర్లను అరెస్టు చేశారు. విదేశాల్లో ఉన్న గ్యాంగ్ నిర్వాహకుల నుంచి ఆదేశాలు అందుకుంటూ వీరు టార్గెటెడ్ కిల్లింగ్కు ప్రణాళిక రూపొందించినట్లు ప్రాథమిక దర్యాప్తులో వెల్లడైనట్లు పోలీసులు తెలిపారు.
అరెస్టైన ముగ్గురు నిందితులు ఢిల్లీలో గతంలో నమోదైన పలు కాల్పుల ఘటనల్లో కూడా ప్రత్యక్ష ప్రమేయం ఉన్న మోస్ట్ వాంటెడ్ నేరస్థులుగా గుర్తించినట్లు అధికారులు వెల్లడించారు. వారి వద్ద లభ్యమైన సమాచారం, సాంకేతిక ఆధారాల ఆధారంగా గ్యాంగ్ కార్యకలాపాలపై మరింత లోతుగా దర్యాప్తు కొనసాగిస్తున్నట్లు తెలిపారు. వీరి ద్వారా దేశవ్యాప్తంగా విస్తరించిన నేర ముఠా నెట్వర్క్కు సంబంధించిన కీలక వివరాలు వెలుగులోకి వచ్చే అవకాశముందని అధికారులు భావిస్తున్నారు.
ఇదిలా ఉండగా, గత వారం హర్యానాలో జరిగిన పోలీసు ఎన్కౌంటర్లో బిష్ణోయ్ గ్యాంగ్కు చెందిన ఇద్దరు కీలక షూటర్లు ప్రవేశ్, హిమాన్షు హతమైన విషయం తెలిసిందే. జిమ్ ట్రైనర్ హత్య కేసులో వీరిద్దరూ వాంటెడ్ నిందితులుగా ఉన్నారు. ఆ ఘటన తర్వాత బిష్ణోయ్ గ్యాంగ్పై పోలీసులు మరింత దూకుడుగా చర్యలు చేపట్టగా, తాజా అరెస్టులు ఆ ముఠాకు మరో పెద్ద ఎదురుదెబ్బగా మారాయి.
మరోవైపు బిష్ణోయ్ గ్యాంగ్ అంతర్జాతీయ కార్యకలాపాలపై అమెరికా దర్యాప్తు సంస్థ ఎఫ్బీఐ కూడా దృష్టి సారించింది. ఉత్తర అమెరికాలో గ్యాంగ్ కార్యకలాపాలను సమన్వయం చేస్తున్నట్లు భావిస్తున్న గోల్డీ బ్రార్ ఆచూకీ తెలిపిన వారికి 50 వేల అమెరికన్ డాలర్ల బహుమతిని ప్రకటించింది. డ్రగ్స్ అక్రమ రవాణా, హింసాత్మక నేరాలు, అంతర్జాతీయ నేర ముఠాల కార్యకలాపాల్లో ప్రమేయం ఉన్న ఆరోపణలతో అతడిపై 2026 జూలై 1న అరెస్ట్ వారెంట్ జారీ చేసినట్లు వెల్లడించింది.
భారత్కు చెందిన ఈ అంతర్జాతీయ నేర ముఠా కార్యకలాపాలను అణచివేసేందుకు అమెరికా అధికారులు “ఆపరేషన్ హార్డ్ బాల్” పేరుతో ప్రత్యేక చర్యలు ప్రారంభించారు. గ్యాంగ్ ఆర్థిక లావాదేవీలు, ఆయుధాల సరఫరా, అంతర్జాతీయ సంబంధాలపై సమగ్ర దర్యాప్తు కొనసాగిస్తున్నట్లు సమాచారం.
ఇక 2023లో కెనడాలో ఖలిస్తానీ వేర్పాటువాది హర్దీప్ సింగ్ నిజ్జర్ హత్యతో పాటు మరికొన్ని హింసాత్మక ఘటనలకు సంబంధించి అమెరికా ఫెడరల్ ప్రాసిక్యూటర్లు లారెన్స్ బిష్ణోయ్, గోల్డీ బ్రార్లపై అధికారికంగా అభియోగాలు నమోదు చేసిన విషయం తెలిసిందే. ఈ నేపథ్యంలో భారత్, అమెరికా సహా పలు దేశాల దర్యాప్తు సంస్థలు బిష్ణోయ్ గ్యాంగ్ అంతర్జాతీయ నెట్వర్క్ను పూర్తిగా నిర్వీర్యం చేసే దిశగా సమన్వయంతో చర్యలు కొనసాగిస్తున్నాయి.
