- తొలి అధికారిక సర్వేలో 6,324 డాల్ఫిన్లు నమోదు
ఢిల్లీ, మహా.
దేశ జల జీవవైవిధ్య పరిరక్షణలో కీలకమైన గంగా నది డాల్ఫిన్ల సంరక్షణకు ఊతమిచ్చే విధంగా దేశవ్యాప్త తొలి అధికారిక సర్వేలో మొత్తం 6,324 గంగా నది డాల్ఫిన్లు ఉన్నట్లు గుర్తించారు. వన్యప్రాణి సంస్థ, ప్రాజెక్ట్ డాల్ఫిన్, కేంద్ర పర్యావరణ, అటవీ , వాతావరణ మార్పుల మంత్రిత్వ శాఖ సంయుక్తంగా నిర్వహించిన ఈ సర్వేలో గంగా నదీ పరివాహక ప్రాంతంలోని ప్రధాన నదులను సమగ్రంగా పరిశీలించి ఈ అంచనాను వెల్లడించారు.
గంగా నది డాల్ఫిన్ భారత జాతీయ జలచరంగా గుర్తింపు పొందింది. నదుల ఆరోగ్య స్థితిని సూచించే ముఖ్యమైన జీవిగా దీనిని శాస్త్రవేత్తలు పరిగణిస్తారు. స్వచ్ఛమైన నీరు, సమృద్ధిగా చేపలు, సహజ ప్రవాహం ఉన్న ప్రాంతాల్లోనే ఈ డాల్ఫిన్లు ఎక్కువగా కనిపిస్తాయి. అందువల్ల వీటి సంఖ్య పెరగడం నదీ పర్యావరణ వ్యవస్థ మెరుగుదలకు సంకేతంగా భావిస్తున్నారు.
ప్రాజెక్ట్ డాల్ఫిన్, నదుల పరిరక్షణ కార్యక్రమాలు, అక్రమ వేట నియంత్రణ, కాలుష్య నివారణ చర్యలు, స్థానిక ప్రజల్లో అవగాహన పెంపు వంటి కార్యక్రమాలు డాల్ఫిన్ల సంరక్షణకు దోహదపడుతున్నాయని అధికారులు పేర్కొంటున్నారు. అయితే నదీ కాలుష్యం, ఆనకట్టల నిర్మాణం, అక్రమ చేపల వేట, సహజ ప్రవాహానికి ఆటంకాలు వంటి సవాళ్లు ఇంకా కొనసాగుతున్నాయని నిపుణులు హెచ్చరిస్తున్నారు.
సామాజిక భాగస్వామ్యంతో నదుల పరిరక్షణకు మరింత ప్రాధాన్యం ఇవ్వడం, జీవవైవిధ్యాన్ని కాపాడే చర్యలను విస్తరించడం ద్వారా గంగా డాల్ఫిన్ల సంఖ్యను మరింత పెంచే అవకాశం ఉందని పర్యావరణ నిపుణులు అభిప్రాయపడుతున్నారు. దేశంలోని నదీ పర్యావరణ వ్యవస్థను సంరక్షించడంలో ఈ జాతి కీలక పాత్ర పోషిస్తుందని వారు పేర్కొన్నారు.
అయితే 2000 నుంచి 2024 వరకు సామాజిక మాధ్యమాల్లో ప్రచారంలో ఉన్న వార్షిక సంఖ్యలు అధికారిక జనాభా లెక్కలు కావు. అవి కేవలం సూచనాత్మక అంచనాలుగా మాత్రమే పరిగణించాలి. ఇప్పటివరకు దేశవ్యాప్తంగా నిర్వహించిన తొలి అధికారిక సర్వే ఆధారంగా వెల్లడైన 2025 అంచనా – 6,324 గంగా నది డాల్ఫిన్లు మాత్రమే అధికారిక గణాంకంగా గుర్తించబడింది.
