విజయవంతమైన పవన్ భుజం శస్త్రచికిత్స.
* భావోద్వేగ పోస్ట్తో అన్నా కొణిదెల.
ముంబై, మహా.
ఆంధ్రప్రదేశ్ ఉప ముఖ్యమంత్రి, జనసేన అధ్యక్షుడు పవన్ కళ్యాణ్కు ముంబైలోని కోకిలాబెన్ ధీరూభాయ్ అంబానీ ఆసుపత్రిలో కుడి భుజానికి నిర్వహించిన శస్త్రచికిత్స విజయవంతంగా పూర్తైంది. అనుకున్న దానికంటే క్లిష్టంగా మారిన ఈ ఆపరేషన్ దాదాపు మూడున్నర గంటల పాటు కొనసాగింది. శస్త్రచికిత్స అనంతరం ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఆసుపత్రికి వెళ్లి పవన్ కళ్యాణ్ను పరామర్శించారు.
ఈ సందర్భంగా పవన్ కళ్యాణ్ భార్య అన్నా కొణిదెల సామాజిక మాధ్యమంలో చేసిన భావోద్వేగ పోస్టు అభిమానులను కదిలించింది. భర్త జీవితంలో మోస్తున్న బాధ్యతల భారం ఆయన అనుభవిస్తున్న శారీరక నొప్పి కంటే ఎంతో పెద్దదని పేర్కొన్న ఆమె, ఎంతటి బాధ ఉన్నా ఆయన ఎప్పుడూ ఫిర్యాదు చేయరని, ఎవరి జాలినీ ఆశించరని రాశారు. ప్రస్తుతం తన ఏకైక బాధ్యత ఆయన ఆరోగ్యాన్ని జాగ్రత్తగా చూసుకోవడమేనని, ఆయన నిపుణులైన వైద్యుల సంరక్షణలో ఉన్నారని తెలిపారు.
జనసేన వర్గాల సమాచారం ప్రకారం, పవన్ కళ్యాణ్ 2016 నుంచే కుడి భుజంలోని రోటేటర్ కఫ్ గాయంతో బాధపడుతున్నారు. నిరంతర రాజకీయ పర్యటనలు, ప్రజా కార్యక్రమాల కారణంగా సమస్య మరింత తీవ్రమైంది. ప్రముఖ ఆర్థోపెడిక్ శస్త్రచికిత్స నిపుణుడు డాక్టర్ దిన్షా పార్దివాలా నేతృత్వంలోని వైద్య బృందం శస్త్రచికిత్స నిర్వహిస్తున్న సమయంలో, గత వైద్య పరీక్షల్లో గుర్తించలేని అదనపు అవల్షన్ ఫ్రాక్చర్ను గుర్తించినట్లు సమాచారం. దీంతో శస్త్రచికిత్స మరింత సంక్లిష్టంగా మారి, అనుకున్న సమయం కంటే ఎక్కువసేపు కొనసాగింది.
వైద్యుల సూచనల మేరకు పవన్ కళ్యాణ్ కొన్ని వారాలపాటు పూర్తిగా విశ్రాంతి తీసుకోవడంతో పాటు ఫిజియోథెరపీ చేయించుకోవాల్సి ఉంటుందని తెలుస్తోంది. మరో రెండు నెలల తర్వాత ఎడమ భుజానికి కూడా శస్త్రచికిత్స నిర్వహించనున్నట్లు సమాచారం. ఈ నేపథ్యంలో ఆయన అంగీకరించిన సినిమాల చిత్రీకరణ షెడ్యూళ్లలో మార్పులు చోటుచేసుకునే అవకాశం ఉందని సినీ వర్గాలు పేర్కొంటున్నాయి. దర్శకుడు సుజీత్ తెరకెక్కిస్తున్న ఓజీ చిత్రంలోని భారీ యాక్షన్ సన్నివేశాల చిత్రీకరణను తాత్కాలికంగా వాయిదా వేసి, పవన్ కళ్యాణ్ పూర్తిగా కోలుకున్న తర్వాత మిగిలిన భాగాలను చిత్రీకరించేలా ప్రణాళిక రూపొందిస్తున్నట్లు సమాచారం.
