ముంబయి, మహా.
శివసేన (ఉద్ధవ్ బాలాసాహెబ్ ఠాక్రే)లో తిరుగుబాటు చేసి ఏక్నాథ్ షిండే వర్గంలో చేరిన ఆరుగురు లోక్సభ సభ్యులకు ఆ పార్టీ సీనియర్ నేత అరవింద్ సావంత్ లీగల్ నోటీసులు జారీ చేశారు. అసలు శివసేన తమదేనని, పార్టీ అనుమతి లేకుండా విలీనం చట్టబద్ధం కాదని నోటీసుల్లో స్పష్టం చేశారు. ఉద్ధవ్ ఠాక్రే పార్టీ గుర్తుపై గెలిచి ఇప్పుడు ద్రోహానికి పాల్పడ్డారని ఆరోపిస్తూ, షిండే వర్గంలో చేరిన ఓం ప్రకాశ్ నింబాల్కర్, సంజయ్ జాదవ్, నాగేశ్ అష్టికర్, సంజయ్ దేశ్ముఖ్, సంజయ్ దినా పాటిల్, వాక్చౌరేలకు నోటీసులు పంపారు.
మరోవైపు ఈ వ్యవహారంలో జోక్యం చేసుకోవాలని కోరుతూ శివసేన (యూబీటీ) లోక్సభ స్పీకర్ ఓం బిర్లాను ఆశ్రయించింది. ఫిరాయింపుల నిరోధక చట్టంలోని పదో షెడ్యూల్ ప్రకారం కేవలం ఎంపీల నిర్ణయంతో పార్టీ విలీనం సాధ్యం కాదని, షిండే వర్గంలో విలీనాన్ని ఆమోదించవద్దని విజ్ఞప్తి చేసింది. తిరుగుబాటు చేసిన ఎంపీలపై కఠిన చర్యలు తీసుకునేందుకు పార్టీ సిద్ధమవుతోందని తెలుస్తోంది.
లోక్సభలో శివసేన (యూబీటీ)కి మొత్తం తొమ్మిది మంది సభ్యులు ఉండగా, వారిలో ఆరుగురు షిండే వర్గంలో చేరడంతో పార్టీ బలం మూడు స్థానాలకు పడిపోయింది. ఈ వ్యవహారంలో లోక్సభ స్పీకర్ తీసుకునే నిర్ణయంపై రాజకీయ వర్గాల్లో ఆసక్తి నెలకొంది. మహారాష్ట్ర రాజకీయాలు మరోసారి వేడెక్కిన నేపథ్యంలో ఈ పరిణామాలు ప్రాధాన్యం సంతరించుకున్నాయి.
