ఢిల్లీ, మహా.
కాళేశ్వరం ఎత్తిపోతల పథకంపై ముఖ్యమంత్రి రేవంత్రెడ్డి పగబట్టిన ధోరణితో వ్యవహరిస్తున్నారని బీఆర్ఎస్ వర్కింగ్ ప్రెసిడెంట్ కేటీఆర్ ఆరోపించారు. ఢిల్లీ పర్యటనలో భాగంగా బుధవారం మీడియాతో నిర్వహించిన చిట్చాట్లో ఆయన రాష్ట్ర ప్రభుత్వ పనితీరుపై తీవ్ర విమర్శలు చేశారు. కాళేశ్వరం ప్రాజెక్టుకు సంబంధించి రాష్ట్ర ఇంజినీర్లు సిద్ధం చేసిన నివేదికను ప్రభుత్వం వెంటనే బహిర్గతం చేయాలని డిమాండ్ చేశారు.
రాష్ట్రంలో ప్రస్తుతం “30 శాతం వసూళ్ల మంత్రులు” పనిచేస్తున్నారని కేటీఆర్ ఆరోపించారు. భూభారతి పేరుతో కోటి ఎకరాలకు పైగా భూములను నిషేధిత జాబితాలో చేర్చారని విమర్శించారు. ఈ నిర్ణయంతో రైతులు, భూ యజమానులు తీవ్ర ఇబ్బందులు ఎదుర్కొంటున్నారని పేర్కొన్నారు.
ఎన్నికల సమయంలో ఇచ్చిన హామీలకు, ప్రస్తుతం ప్రభుత్వం అమలు చేస్తున్న విధానాలకు ఎలాంటి పొంతన లేదని కేటీఆర్ అన్నారు. ప్రజలకు ఇచ్చిన హామీలను కాంగ్రెస్ ప్రభుత్వం అమలు చేయడంలో విఫలమైందని ఆరోపించారు.
కాళేశ్వరం ప్రాజెక్టుపై ప్రభుత్వం తీసుకుంటున్న వైఖరిని ప్రశ్నించిన కేటీఆర్, ప్రాజెక్టుపై రాష్ట్ర ఇంజినీర్లు సమర్పించిన సాంకేతిక నివేదికను ప్రజలకు వెల్లడించాలని డిమాండ్ చేశారు. వాస్తవాలను దాచిపెట్టి రాజకీయ విమర్శలు చేయడం సరికాదని అన్నారు.
మాజీ ముఖ్యమంత్రి కేసీఆర్పై వస్తున్న విమర్శలకూ కేటీఆర్ స్పందించారు. కేసీఆర్ ఆత్మవిశ్వాసంతో ఉన్నారని, అధికారంలో లేకపోయినా గత రెండేళ్లుగా ఒక్క నాయకుడి పేరును ప్రస్తావిస్తూ విమర్శలు చేయలేదని గుర్తుచేశారు. అయితే ముఖ్యమంత్రి రేవంత్రెడ్డి మాత్రం ప్రతి రోజూ కేసీఆర్ పేరును ప్రస్తావిస్తూ రాజకీయ విమర్శలు చేస్తున్నారని వ్యాఖ్యానించారు. రాష్ట్ర ప్రజల సమస్యల పరిష్కారంపై దృష్టి పెట్టకుండా రాజకీయ ఆరోపణలకే ప్రభుత్వం పరిమితమైందని కేటీఆర్ విమర్శించారు.
