శివసేన ఎంపీల విలీనంపై సుప్రీంకోర్టు విచారణ….

శివసేన ఎంపీల విలీనంపై సుప్రీంకోర్టు విచారణ.
* రెండు వారాల్లో వివరణ కోరిన ధర్మాసనం
ఢిల్లీ, మహా.
మహారాష్ట్ర రాజకీయాల్లో కీలకంగా మారిన శివసేన (యూబీటీ) ఎంపీల విలీన వ్యవహారంపై సుప్రీంకోర్టు విచారణకు అంగీకరించింది. ఏక్‌నాథ్ శిందే నేతృత్వంలోని శివసేనలో తమ పార్టీకి చెందిన ఆరుగురు లోక్‌సభ సభ్యుల విలీనాన్ని లోక్‌సభ స్పీకర్ ఓం బిర్లా ఆమోదించడాన్ని సవాల్ చేస్తూ శివసేన (యూబీటీ) దాఖలు చేసిన పిటిషన్‌ను విచారణకు స్వీకరించిన అత్యున్నత న్యాయస్థానం, లోక్‌సభ స్పీకర్ కార్యాలయంతో పాటు ఇతర ప్రతివాదులకు నోటీసులు జారీ చేసింది. రెండు వారాల్లోగా సమాధానం ఇవ్వాలని ఆదేశిస్తూ తదుపరి విచారణను వాయిదా వేసింది.

పార్లమెంట్ వర్షాకాల సమావేశాలు ప్రారంభానికి ముందు జూలై 18న శివసేన (యూబీటీ)కు చెందిన ఆరుగురు లోక్‌సభ సభ్యుల విలీనాన్ని స్పీకర్ ఆమోదించారు. దీంతో శిందే వర్గానికి చెందిన లోక్‌సభ సభ్యుల సంఖ్య 13కు చేరింది. గత లోక్‌సభ ఎన్నికల్లో శివసేన (యూబీటీ) తరఫున ఎన్నికైన తొమ్మిది మంది ఎంపీల్లో ఆరుగురు శిందే వర్గంలో చేరడం మహారాష్ట్ర రాజకీయాల్లో తీవ్ర చర్చకు దారితీసింది.

ఈ విలీనం ఫిరాయింపుల నిరోధక చట్టానికి విరుద్ధమని శివసేన (యూబీటీ) తన పిటిషన్‌లో పేర్కొంది. పార్టీ విప్‌ను ధిక్కరించిన ఎంపీలపై అనర్హత వేటు వేయాలని ఇప్పటికే స్పీకర్‌ను కోరినప్పటికీ, వారిని విలీనమైనట్లు గుర్తించడం చట్టవిరుద్ధమని వాదించింది. ఈ నేపథ్యంలో స్పీకర్ నిర్ణయాన్ని రద్దు చేయాలని కోరుతూ సుప్రీంకోర్టును ఆశ్రయించింది.

మరోవైపు, ఎన్‌సీపీ (ఎస్‌సీపీ) అధినేత శరద్ పవార్ బుధవారం ప్రధానమంత్రి నరేంద్ర మోదీని పార్లమెంట్ ప్రాంగణంలో కలిశారు. ఈ సమావేశంలో బారామతి ఎంపీ, ఎన్‌సీపీ (ఎస్‌సీపీ) కార్యనిర్వాహక అధ్యక్షురాలు సుప్రియా సూలే కూడా పాల్గొన్నారు. వ్యవసాయ రంగానికి సంబంధించిన సమస్యలు, రైతులు ఎదుర్కొంటున్న ఇబ్బందులపై సిద్ధం చేసిన వినతిపత్రాన్ని పవార్ ప్రధానికి అందజేశారు. ఈ సందర్భంగా ఇరువురు నేతలు పలు జాతీయ అంశాలపైనా చర్చించినట్లు సమాచారం.

ఈ భేటీకి ముందు రోజు ఢిల్లీలో జరిగిన విద్యార్థుల ఆందోళనలో శరద్ పవార్, సుప్రియా సూలే పాల్గొని నీట్ ప్రశ్నపత్రం లీకేజీ వ్యవహారంపై కేంద్ర ప్రభుత్వాన్ని విమర్శించారు. విద్యార్థుల డిమాండ్లను సానుభూతితో పరిశీలించాలని, శాంతియుత నిరసనలను అణచివేయడం ప్రజాస్వామ్య స్ఫూర్తికి విరుద్ధమని శరద్ పవార్ వ్యాఖ్యానించారు.

ఇదిలా ఉండగా, ఎన్‌సీపీ (ఎస్‌సీపీ) జాతీయ ప్రజాస్వామ్య కూటమి (ఎన్‌డీఏ)లో చేరబోతోందన్న ప్రచారాన్ని సుప్రియా సూలే మరోసారి ఖండించారు. తమ పార్టీని బీజేపీ లేదా ఇతర కూటమి భాగస్వామ్య పార్టీలు ఎవరూ సంప్రదించలేదని స్పష్టం చేశారు. ఇటీవల జరిగిన కొన్ని సమావేశాల ఆధారంగా వస్తున్న రాజకీయ ఊహాగానాల్లో ఎలాంటి నిజం లేదని, అవి పరిపాలనా అంశాలకు సంబంధించిన చర్చలు మాత్రమేనని వెల్లడించారు.