తెలంగాణ గడ్డపై ఒంటరి పోరు.
* సింగిల్గానే బీజేపీ ఎన్నికల బరిలో!
* జనసేనతో సహా ఎవరితోనూ పొత్తు లేదు.
* జీహెచ్ఎంసీ నుంచి అసెంబ్లీ దాకా ఒంటరిగానే.
* బీజేపీ జాతీయ నాయకత్వం కీలక దిశానిర్దేశం.
హైదరాబాద్, మహా.
తెలంగాణ రాజకీయ ముఖచిత్రంపై భారతీయ జనతా పార్టీ (బీజేపీ) సరికొత్త సంచలన వ్యూహాన్ని ఆవిష్కరించింది. రాబోయే అన్ని ఎన్నికల్లోనూ ఎవరితోనూ పొత్తు పెట్టుకోకుండా, ఏకపక్షంగా, ఒంటరిగానే బరిలోకి దిగాలని ఆ పార్టీ అధిష్టానం చారిత్రాత్మక నిర్ణయం తీసుకుంది. జాతీయ స్థాయిలో ఎన్డీఏ భాగస్వామిగా ఉన్న పవన్ కల్యాణ్ నేతృత్వంలోని జనసేనతో కూడా రాష్ట్రంలో ఎలాంటి పొత్తు ఉండబోదని తెలంగాణ బీజేపీ రాష్ట్ర అధ్యక్షుడు ఎన్. రామచందర్ రావు స్పష్టంగా తేల్చిచెప్పారు. వచ్చే జీహెచ్ఎంసీ ఎన్నికలతో సహా భవిష్యత్తులో జరిగే ప్రతి ఎన్నికల సమరంలోనూ బీజేపీ తన సొంత బలంతోనే బరిలో ఒక దిగుతుందని ఆయన కుండబద్దలు కొట్టారు.
**ఢిల్లీలో వ్యూహరచన..అధిష్టానం దిశానిర్దేశం**
తెలంగాణలో అధికారాన్ని కైవసం చేసుకోవడమే ఏకైక లక్ష్యంగా పావులు కదుపుతున్న బీజేపీ జాతీయ నాయకత్వం, ఢిల్లీలోని కేంద్ర కార్యాలయంలో కీలక సమీక్షా సమావేశాన్ని నిర్వహించింది. పార్టీ జాతీయ అధ్యక్షుడు నితిన్ నబీన్ నేతృత్వంలో జరిగిన ఈ అత్యున్నత స్థాయి భేటీలో రాష్ట్రానికి చెందిన అగ్రశ్రేణి నాయకులు పాల్గొన్నారు. ఈ సమావేశంలో రాష్ట్ర అధ్యక్షుడు ఎన్. రామచందర్ రావు, కేంద్ర మంత్రులు జి. కిషన్ రెడ్డి, బండి సంజయ్ కుమార్, ఓబీసీ మోర్చా జాతీయ అధ్యక్షుడు డాక్టర్ కె. లక్ష్మణ్, రాష్ట్ర ఇంచార్జ్ అభయ్ పాటిల్, పార్టీ జాతీయ ప్రధాన కార్యదర్శి సునీల్ బన్సాల్ తదితరులు సుదీర్ఘంగా రాజకీయ వ్యూహాలపై సమీక్షించారు. రాష్ట్రంలో క్షేత్రస్థాయి నుంచి సంస్థాగత నిర్మాణాన్ని బలోపేతం చేయడంపై, అలాగే బూత్ స్థాయి మేనేజ్మెంట్ ద్వారా ప్రతి ఓటరును చేరుకోవడంపై అధిష్టానం వారికి ఖచ్చితమైన దిశానిర్దేశం చేసింది.
**పొత్తులకు గుడ్బై.. ఒంటరి పోరుకే సై**
గత ఎన్నికల అనుభవాలను దృష్టిలో ఉంచుకుని ఈసారి బీజేపీ పొత్తుల విషయంలో కఠిన నిర్ణయం తీసుకుంది. మిత్రపక్షాలతో సీట్ల పంపకాల వల్ల స్థానిక నాయకత్వం నైతిక స్థైర్యం దెబ్బతింటుందనే సుదీర్ఘ విశ్లేషణ తర్వాతే జనసేనతో సహా మరెవరితోనూ పొత్తు వద్దని అధిష్టానం తీర్మానించింది. కేడర్లో ఎలాంటి గందరగోళం లేకుండా, ప్రతి నియోజకవర్గంలో స్వంత బలంపైనే దృష్టి సారించి రాబోయే ఎన్నికల్లో సంపూర్ణ మెజారిటీ సాధించే దిశగా పార్టీ యంత్రాంగాన్ని సమాయత్తం చేస్తున్నారు. ప్రజల్లో ఉన్న ప్రభుత్వ వ్యతిరేకతను పూర్తిగా తమకు అనుకూలంగా మలుచుకోవాలని, ప్రతి వీధి, ప్రతి గ్రామంలో నాయకులు పర్యటించి ప్రజా సమస్యలపై గళమెత్తాలని జాతీయ అధ్యక్షుడు నితిన్ నబీన్ నాయకులకు పిలుపునిచ్చారు.
**తెలంగాణ ఆకాంక్షల సాధన.. బీజేపీకే సాధ్యం**
ఢిల్లీ వేదికగా జరిగిన పలు సమావేశాల్లో రాష్ట్రంపై బీజేపీ తన ప్రత్యేక దృష్టిని చాటుకుంది. దశాబ్దం గడిచినా తెలంగాణ ప్రజల ఆకాంక్షలు నెరవేరలేదని, ఆ కలలను సాకారం చేసే బాధ్యతను బీజేపీ తన భుజాలపై వేసుకుంటుందని నితిన్ నబీన్ ఇటీవల జరిగిన పార్టీ కార్యక్రమాల్లో సైతం స్పష్టం చేశారు. రాష్ట్ర అభివృద్ధి ఎజెండాను గత, ప్రస్తుత ప్రభుత్వాలు నిర్లక్ష్యం చేశాయని ఆరోపించిన ఆయన, తెలంగాణ ప్రజలు కోరుకున్న సుపరిపాలన అందించేందుకు కట్టుబడి ఉన్నామని ఉద్ఘాటించారు. రైతులు, యువత, మహిళలు ఎదుర్కొంటున్న ప్రతి సమస్యపై పోరాడేది కేవలం బీజేపీ మాత్రమేనని ఆయన గుర్తుచేశారు.
**విజయంపై అచంచల విశ్వాసం.. ఎన్. రామచందర్ రావు ధీమా**
పార్టీ సంస్థాగత బలంపై అధిష్టానం తీసుకున్న ఈ చారిత్రాత్మక నిర్ణయాల పట్ల తెలంగాణ అధ్యక్షుడు ఎన్. రామచందర్ రావు అమితమైన హర్షం వ్యక్తం చేశారు. రాబోయే ఎన్నికల్లో రాష్ట్రంలో బీజేపీ అధికారంలోకి రావడం ఖాయమని ఆయన ధీమా వ్యక్తం చేశారు. క్షేత్రస్థాయిలో పార్టీ బలం అపారంగా పెరిగిందని, ప్రజల పక్షాన నిలబడి అలుపెరగని పోరాటం చేయడం ద్వారా విజయం తథ్యమన్న నమ్మకంతో పార్టీ శ్రేణులు ముందుకు సాగుతున్నాయని ఆయన ప్రకటించారు.
