• దివంగత భార్య కోరిక మేరకు కీలక నిర్ణయం.
• మరణానంతరం తన శరీరాన్నీ వైద్య విద్యార్థుల అధ్యయనానికి ఇవ్వనున్న డాక్టర్ రాజేంద్ర కన్వర్.
ఢిల్లీ, మహా.
జీవితాంతం కష్టపడి సంపాదించిన ఆస్తులను వారసులకు అందించడం సహజం. అయితే హిమాచల్ప్రదేశ్కు చెందిన 77 ఏళ్ల సీనియర్ వైద్యుడు డాక్టర్ రాజేంద్ర కన్వర్ ఇందుకు భిన్నంగా ఆలోచించారు. తన దివంగత భార్య కృష్ణ కన్వర్ కోరిక మేరకు సుమారు రూ.100 కోట్ల విలువైన చర, స్థిరాస్తులను రాష్ట్ర ప్రభుత్వానికి బహుమతిగా ఇచ్చి ఆదర్శంగా నిలిచారు. తమ సంపదను కుటుంబ వారసత్వంగా కాకుండా సమాజానికి ఉపయోగపడేలా చేయాలన్న దంపతుల నిర్ణయం ఇప్పుడు ప్రశంసలు అందుకుంటోంది.
హమీర్పూర్ జిల్లా జోల్సప్పార్ గ్రామానికి చెందిన రాజేంద్ర కన్వర్ 1977 జనవరి 3న హిమాచల్ప్రదేశ్ ఆరోగ్య శాఖలో మెడికల్ ఆఫీసర్గా ప్రభుత్వ ఉద్యోగంలో చేరారు. సుమారు 33 ఏళ్లపాటు ప్రభుత్వ వైద్యుడిగా సేవలందించిన ఆయన 2010లో కాంగు ప్రాథమిక ఆరోగ్య కేంద్రంలో సీనియర్ వైద్యుడిగా పదవీ విరమణ చేశారు. ఉద్యోగ విరమణతో వైద్య సేవలకు పూర్తిగా దూరం కాకుండా ఇప్పటికీ తన నివాసంలోనే రోగులకు చికిత్స అందిస్తున్నారు. పేదలు, సామాన్యులకు వైద్యం అందుబాటులో ఉండాలనే ఉద్దేశంతో తక్కువ ఫీజుతో సేవలు కొనసాగిస్తున్నారు.
రాజేంద్ర కన్వర్ భార్య కృష్ణ కన్వర్ కూడా ప్రభుత్వ ఉద్యోగినే. విద్యాశాఖలో సుమారు 32 ఏళ్లపాటు పనిచేసిన ఆమె 2011లో బాడా ప్రభుత్వ సీనియర్ సెకండరీ పాఠశాల ప్రిన్సిపాల్గా పదవీ విరమణ చేశారు. ఆమె 2020 డిసెంబరు 6న కన్నుమూశారు. అయితే ఆమె మరణానికి ముందే దంపతులు తమ ఆస్తులను సమాజ ప్రయోజనాలకు వినియోగించాలని నిర్ణయించుకున్నారు. తమ సంపద భవిష్యత్తులో ప్రజలకు ఉపయోగపడాలని భావించి ప్రభుత్వానికి అప్పగించాలని నిర్ణయించుకున్నారు.
ఈ నిర్ణయం మేరకు 2021లోనే ఆస్తులను ప్రభుత్వానికి బదిలీ చేసే ప్రక్రియను ప్రారంభించారు. తాజాగా గిఫ్ట్ డీడ్ ప్రక్రియ పూర్తవడంతో ఆస్తుల యాజమాన్య హక్కులు అధికారికంగా హిమాచల్ప్రదేశ్ ప్రభుత్వానికి బదిలీ అయ్యాయి. రెవెన్యూ రికార్డుల్లోనూ ప్రభుత్వం ఆ ఆస్తులకు యజమానిగా నమోదైనట్లు నదౌన్ సబ్ డివిజనల్ మేజిస్ట్రేట్ నిశాంత్ శర్మ తెలిపారు.
ప్రభుత్వానికి అందజేసిన ఆస్తులను హమీర్పూర్లోని డాక్టర్ రాధాకృష్ణన్ ప్రభుత్వ వైద్య కళాశాల అవసరాలకు వినియోగించాలని రాజేంద్ర కన్వర్ కోరారు. ముఖ్యంగా జోల్సప్పార్లో నిర్మాణంలో ఉన్న మెడికల్ కాలేజీకి సమీపంలోనే ఈ ఆస్తులు ఉండటంతో భవిష్యత్తులో వైద్య విద్య, ఆరోగ్య సేవలకు ఇవి ఉపయోగపడే అవకాశం ఉంది. ప్రజల ఆరోగ్యానికి జీవితాంతం సేవ చేసిన వైద్యుడు.. తన సంపదను కూడా అదే రంగానికి ఉపయోగపడేలా అందించడం విశేషంగా మారింది.
పబ్లిక్ వర్క్స్ డిపార్ట్మెంట్ అంచనాల ప్రకారం ప్రభుత్వానికి బదిలీ చేసిన ఆస్తుల్లో ఐదు కనాల్స్, ఐదు మార్లాల భూమి ఉంది. వీటితోపాటు ఆభరణాలు, కారు, ఫర్నిచర్, బ్యాంకు డిపాజిట్లు తదితర చరాస్తులు కూడా ఉన్నాయి. 이 ఆస్తులన్నింటి విలువ సుమారు రూ.100 కోట్లుగా అంచనా వేసినట్లు సంబంధిత అధికారులు తెలిపారు. నిర్మాణంలో ఉన్న వైద్య కళాశాలకు సమీపంలో ఆస్తులు ఉండటంతో వాటి భవిష్యత్ వినియోగంపై ప్రాధాన్యం ఏర్పడింది.
ఆస్తులతో ఆగకుండా తన మరణానంతరం భౌతికకాయాన్ని కూడా వైద్య విద్యార్థుల అధ్యయనం కోసం దానం చేయాలని డాక్టర్ రాజేంద్ర కన్వర్ నిర్ణయించుకున్నారు. శిక్షణ పొందుతున్న వైద్యులకు మానవ శరీర నిర్మాణంపై అధ్యయనం చేసేందుకు తన శరీరం ఉపయోగపడాలని ఆయన భావిస్తున్నారు. వ్యక్తిగత సంపదను సమాజానికి అంకితం చేయడంతోపాటు మరణానంతరం కూడా వైద్య విద్యకు ఉపయోగపడేలా నిర్ణయం తీసుకోవడం ఆయన సేవా దృక్పథాన్ని చాటుతోంది.
సంపాదించిన ఆస్తిని వారసులకు అందించడం కంటే సమాజానికి ఉపయోగపడేలా చేయాలన్న రాజేంద్ర కన్వర్, కృష్ణ కన్వర్ దంపతుల నిర్ణయం ఇప్పుడు చర్చనీయాంశంగా మారింది. ప్రభుత్వ వైద్యుడిగా దశాబ్దాలపాటు సేవలందించిన ఆయన.. పదవీ విరమణ తర్వాత కూడా పేదలకు తక్కువ ఖర్చుతో వైద్యం అందిస్తూ, చివరకు తన కోట్లాది రూపాయల ఆస్తులను కూడా ప్రజా ప్రయోజనాలకు అంకితం చేయడం ఆదర్శనీయమని పలువురు ప్రశంసిస్తున్నారు.
