- మోడీ సెల్యూట్
- పతకాల వీరులతో ఆత్మీయ ముచ్చ‌ట్లు…
- 140 కోట్ల మంది భారతీయుల్ని గర్వపడేలా చేశారన్న ప్రధాని
- మహిళా అథ్లెట్ల ప్రతిభపై ప్రత్యేక ప్రశంసలు
న్యూఢిల్లీ, మహా : ఆసియా క్రీడల్లో పతకాలతో మెరిసి దేశానికి గర్వకారణంగా నిలిచిన భారత క్రీడాకారులతో ప్రధానమంత్రి నరేంద్ర మోదీ గురువారం ఢిల్లీలోని మేజర్‌ ధ్యాన్‌చంద్‌ స్టేడియంలో ఆత్మీయంగా ముచ్చటించారు. స్వర్ణ పతకాలు సాధించిన పురుషుల, మహిళల క్రికెట్‌ జట్లతో పాటు వివిధ క్రీడాంశాల్లో పతకాలు గెలిచిన అథ్లెట్లను అభినందించారు. ఈ సందర్భంగా క్రీడాకారులు తమ విజయాలకు గుర్తుగా సంతకాలతో కూడిన జెర్సీలు, ఇతర జ్ఞాపికలను మోదీకి అందజేశారు. 17 ఏళ్ల యువ ఆర్చరీ క్రీడాకారిణి కుమ్‌కుమ్‌ మొహోద్‌ తన విల్లును ప్రధానమంత్రికి బహూకరించింది. అనంతరం భారత క్రీడా బృందంతో కలిసి మోదీ ఫొటోలు దిగారు. ఈ కార్యక్రమంలో క్రీడా సంఘాల ప్రముఖులు, వివిధ క్రీడా సమాఖ్యల ప్రతినిధులు, అధికారులు పాల్గొన్నారు. అంతర్జాతీయ క్రికెట్‌ మండలి (ఐసీసీ) చైర్మన్‌ జై షా కూడా ఈ సమావేశానికి హాజరయ్యారు.
140 కోట్ల మంది గర్వించేలా చేశారు
భారత క్రీడాకారులను ఉద్దేశించి మోదీ మాట్లాడుతూ.. ఆసియా క్రీడల్లో సాధించిన విజయాలు దేశ ప్రజలందరికీ గర్వకారణమన్నారు. భారత క్రీడాకారులు సాధించిన పతకాలు వారి వ్యక్తిగత ప్రతిభకు మాత్రమే కాకుండా దేశ సమష్టి గర్వానికి ప్రతీకలన్నారు. అంతర్జాతీయ వేదికలపై భారత జెండాను ఎగురవేయడం ద్వారా యువతకు స్ఫూర్తిగా నిలిచారని ప్రశంసించారు. “మీరు 140 కోట్ల మంది భారతీయులను గర్వపడేలా చేశారు. త్రివర్ణ పతాకాన్ని ప్రపంచ వేదికపై రెపరెపలాడించడమే అతిపెద్ద విజయం. అందుకే మీ విజయాలు మీకే పరిమితం కావు.. కోట్లాది మంది దేశ ప్రజలకు చెందినవి. దేశం తరఫున మీ అందరికీ అభినందనలు” అని పేర్కొన్నారు.
మహిళా అథ్లెట్లకు ప్రత్యేక అభినందనలు
ఆసియా క్రీడల్లో భారత్ సాధించిన 85 పతకాల్లో 38 పతకాలను మహిళా క్రీడాకారులే గెలుచుకున్నారని మోదీ గుర్తుచేశారు. వీటిలో 11 స్వర్ణ పతకాలు ఉండటం విశేషమని పేర్కొన్నారు. మహిళా అథ్లెట్లు చూపిన ప్రతిభ, పట్టుదల దేశానికి గర్వకారణమని అభినందించారు. క్రీడల్లో మహిళలు సాధిస్తున్న విజయాలు భారత క్రీడా రంగంలో వస్తున్న మార్పులకు నిదర్శనమని అన్నారు.
హాకీ జట్ల విజయాలపై ప్రశంసలు
భారత పురుషుల, మహిళల హాకీ జట్లు రెండూ స్వర్ణ పతకాలు సాధించడం ప్రత్యేక విజయమని మోదీ అన్నారు. ముఖ్యంగా 44 ఏళ్ల తర్వాత మహిళల హాకీ జట్టు స్వర్ణం గెలవడం దేశానికి చిరస్మరణీయ ఘట్టమని పేర్కొన్నారు. ఈ విజయం యావత్‌ దేశానికి ఆనందాన్ని కలిగించిందని ప్రశంసించారు. సమావేశంలో మహిళల క్రికెట్‌ జట్టు విన్నింగ్ కెప్టెన్ హర్మన్‌ప్రీత్‌ కౌర్‌ భారత క్రికెట్‌ జెర్సీని మోదీకి అందజేసింది. ఇతర క్రీడాకారులు కూడా తమ విజయాలకు గుర్తుగా ప్రత్యేక బహుమతులు ఇచ్చారు. ఆసియా క్రీడల్లో భారత పురుషుల క్రికెట్‌ జట్టు స్వర్ణ పతకాన్ని నిలబెట్టుకోగా, మహిళల జట్టు కూడా స్వర్ణం సాధించింది. యువ బ్యాటర్‌ వైభవ్‌ సూర్యవంశీ సహా క్రికెట్‌ జట్ల సభ్యులు ఈ కార్యక్రమంలో పాల్గొన్నారు.
85 పతకాలతో భారత్‌కు నాలుగో స్థానం
2026 ఆసియా క్రీడల్లో భారత్ మొత్తం 85 పతకాలను సాధించి, పతకాల పట్టికలో నాలుగో స్థానంలో నిలిచింది. ఇందులో 21 స్వర్ణ, 27 రజత మరియు 37 కాంస్య పతకాలు ఉన్నాయి. భారత్ వరుసగా రెండోసారి పతకాల పట్టికలో మొదటి ఐదు స్థానాల్లో ఒకటిగా నిలిచింది. 2023 హాంగ్‌జౌ ఆసియా క్రీడల్లో 106 పతకాలను గెలుచుకున్న భారత్, జపాన్‌లోని ఐచి-నగోయాలో జరిగిన 2026 ఆసియా క్రీడల్లో 85 పతకాలను సాధించింది. ఈసారి, రికర్వ్ ఆర్చరీలో చారిత్రాత్మక విజయాలు, పురుషుల, మహిళల హాకీ జట్లకు స్వర్ణ పతకాలు, మహిళల ట్రాప్ ఈవెంట్‌లో మొట్టమొదటి స్వర్ణం వంటి ఘ‌న‌త‌లు భారత్ ఖాతాలో చేరాయి. భారత అథ్లెట్లు సాఫ్ట్ టెన్నిస్, మిక్స్డ్ మార్షల్ ఆర్ట్స్‌లో కూడా మొదటిసారిగా పతకాలను సాధించారు. అంతేకాకుండా, ఈ క్రీడలలో భారతదేశం 28 ఏళ్ల నిరీక్షణకు తెరదించి వెయిట్‌లిఫ్టింగ్‌లో రజత పతకాన్ని గెలుచుకుంది, 64 ఏళ్లలో మొదటిసారిగా గ్రీకో-రోమన్ రెజ్లింగ్‌లో ఒక ఫైనలిస్ట్‌ను అందించింది. ఈ సమావేశానికి క్రీడాకారులు, కోచ్‌లు, సహాయక సిబ్బంది, భారత ఒలింపిక్ సంఘం ప్రతినిధులు, జాతీయ క్రీడా సమాఖ్యల అధికారులు, కేంద్ర యువజన వ్యవహారాలు, క్రీడల మంత్రిత్వ శాఖ ప్రతినిధులు హాజరయ్యారు
