మిఠాయి ప్రియులకు షాక్.
* రాష్ట్రవ్యాప్తంగా స్వీట్ షాపులపై ‘టీజీ సేఫ్’ ఉక్కుపాదం!
* కల్తీ స్వీట్ల తయారీపై ఆకస్మిక తనిఖీలు.
* 38 నమూనాల సేకరణ, నిబంధనలు ఉల్లంఘించిన 20 సంస్థలకు నోటీసులు!
హైదరాబాద్, మహా.
రాష్ట్రంలో ప్రజలు ఎంతో ఇష్టంగా ఆరగించే మిఠాయిల నాణ్యతపై ‘టీజీ సేఫ్’ అధికారులు తీవ్ర దృష్టి సారించారు. మార్కెట్లో కల్తీ స్వీట్లను విచ్చలవిడిగా తయారు చేసి విక్రయిస్తున్నారన్న సమాచారం మేరకు రాష్ట్రవ్యాప్తంగా ఉన్న పలు ప్రముఖ స్వీట్ షాపులు, స్వీట్ల తయారీ కేంద్రాలపై అధికారులు ఏకకాలంలో ఆకస్మిక తనిఖీలు నిర్వహించారు. ఈ తనిఖీల్లో భాగంగా అనేక కేంద్రాల్లో నిబంధనలకు విరుద్ధంగా, అపరిశుభ్ర వాతావరణంలో మిఠాయిలు తయారు చేస్తుండటాన్ని అధికారులు గుర్తించారు.
ఈ విస్తృత తనిఖీల్లో భాగంగా కల్తీపై తీవ్ర అనుమానంతో మొత్తం 38 రకాల ఆహార పదార్థాల నమూనాలను (सैंपల్స్) అధికారులు సేకరించారు. వీటిని నాణ్యత పరీక్షల నిమిత్తం ప్రత్యేక ల్యాబ్‌లకు తరలించారు. ఫుడ్ సేఫ్టీ నిబంధనలను తుంగలో తొక్కి, అపరిశుభ్ర పరిస్థితుల్లో వ్యాపారం నిర్వహిస్తున్నట్లు గుర్తించిన 20 సంస్థలకు అధికారులు తక్షణమే ఇంప్రూవ్‌మెంట్ నోటీసులు జారీ చేశారు. అలాగే మరికొన్ని స్వీట్ షాపులకు షోకాజు నోటీసులు జారీ చేసి వివరణ కోరారు. ప్రజల ప్రాణాలతో, ఆరోగ్యంతో చెలగాటమాడేలా నాణ్యతా ప్రమాణాలు పాటించని ఏ సంస్థను ఉపేక్షించేది లేదని, నిబంధనలు అతిక్రమిస్తే కఠిన చర్యలు తప్పవని అధికారులు హెచ్చరించారు.
