అల్లు అర్జున్ ప్రెస్ మీట్‌లో అన్నీ అబద్దాలే
తెలుగోడి సత్తా చాటడమంటే ఇదేనా..?
మండిపడ్డ ఎమ్మెల్సీ బల్మూరి వెంకట్
హైదరాబాద్, మహా : సంధ్య థియేటర్ తొక్కిసలా’ ఘటన తీవ్ర ప్రకంపనలు సృష్టిస్తోంది. అసెంబ్లీ వేదికగా సీఎం రేవంత్ రెడ్డి స్వయంగా ఈ ఘటనపై తీవ్ర స్థాయిలో విరుచుకుపడటం.. ఆ వెంటనే హీరో అల్లు అర్జున్ ప్రెస్ మీట్ పెట్టి వివరణ ఇచ్చుకునే ప్రయత్నం చేయటం ఇప్పుడు సర్వత్రా అగ్గిరాజేస్తోంది. అల్లు అర్జున్ ప్రెస్ మీట్ మీద నెట్టింట తీవ్ర విమర్శలు వెల్లువెత్తుతుండగా ఆయన చెప్పినవి అబద్దాలంటూ కొన్ని వీడియోలు కూడా వైరల్ అవుతున్నాయి. కేవలం నెటిజన్లే కాదు రాజకీయ ప్రముఖులు కూడా అల్లు అర్జున్ ప్రెస్ మీట్ మీద స్పందిస్తున్నారు. ప్రెస మీట్‌లో అల్లు అర్జున్ చెప్పినవన్నీ అబద్దాలే అంటూ కాంగ్రెస్ ఎమ్మెల్సీ బల్మూరి వెంకట్ కీలక ఆరోపణలు చేశారు.
తెలుగోని సత్తా చాటడమంటే ఇలా కాదని, సంధ్య థియేటర్ తొక్కిసలాట లాంటి దుర్ఘటనలు జరిగినప్పుడు సానుభూతి చూపించాలంటూ బల్మూరి వెంకట్ హితవు పలికారు. సీఎం రేవంత్ రెడ్డి సంధ్య థియేటర్ ఘటనలో ఒకరి ప్రాణాలు కోల్పోయిన విషయంపై అసెంబ్లీలో ప్రస్తావించిన తర్వాత పశ్చాత్తాపంతో ప్రెస్‌మీట్‌ పెట్టారని అనుకున్నాం కానీ అందుకు విరుద్దంగా మాట్లాడటం ఎంత మాత్రం సరికాదన్నారు. డిసెంబర్ 04న థియేటర్ నుంచి ఎలా వెళ్లారో, ఎప్పుడు వెళ్లారో, అసలు అక్కడ ఏం జరిగిందో అన్ని వీడియోలు తమ దగ్గర ఉన్నాయని బల్మూరి వెంకట్ తెలిపారు. అయినప్పటికీ ప్రెస్ మీట్‌లో మాత్రం ఒక మహిళ చనిపోయిందన్న విషయం ఆ తర్వాతి రోజు వరకు తెలియదని అల్లు అర్జున్ అన్నీ అబద్దాలే చెప్పారని బల్మూరి వెంకట్ ఆరోపించారు.
కలెక్షన్ల పై తప్ప ప్రజలపై ధ్యాసలేదు : ఎంపీ చామల
మరోవైపు ఇదే ఘటనపై స్పందించిన భువనగిరి ఎంపీ చామల కిరణ్ రెడ్డి.. సంచలన వ్యాఖ్యలు చేశారు. అల్లు అర్జున్‌కు సినిమా కలెక్షన్ల మీద తప్ప.. ప్రజలపై ఎలాంటి ధ్యాస లేదని చామల కిరణ్ రెడ్డి ఆరోపించారు. మూడేళ్లు కష్టపడి తీసిన సినిమా నష్టం జరగొద్దనే ఉద్దేశంతోనే టికెట్ ధరలు పెంచినా కూడా ప్రభుత్వం ఒప్పుకుందని కిరణ్ రెడ్డి స్పష్టం చేశారు. ఆరోజు సంధ్య థియేటర్‌లో సినిమా చూస్తున్నప్పుడు బయట అంబులెన్స్ వచ్చింది, అంతా గందరగోళంగా ఉంది, ఏం జరుగుతుందనే ధ్యాస లేదని అల్లు అర్జున్ మీద తీవ్ర ఆగ్రహం వ్యక్తం చేశారు. సినిమా కలెక్షన్ల మీద ధ్యాస ఉంది తప్ప ప్రజలు ఏమైపోతున్నారు, బయట ఏం జరుగుతుందనే ధ్యాస లేదంటూ తీవ్ర విమర్శలు చేశారు. థియేటర్‌లో ఎంత సేపు సినిమా చూశారు, కారు నుంచి అభివాదం చేస్తూ చేసిన రోడ్ షో చేయటం ఇలా అన్నింటికి సంబంధించి వీడియోలు క్లియర్‌గా ఉన్నాయని కిరణ్ రెడ్డి గుర్తు చేశారు. రేవతి మృతి ఘటన తర్వాత రోజు కూడా అల్లు అర్జున్ ఇంటి దగ్గర టపాసులు కాల్చారని తెలిపారు. ప్రజాప్రభుత్వంలో ఎవరు తప్పు చేసినా చర్యలు తప్పవని ప్రజలకు భరోసానిస్తూ అసెంబ్లీలో మాట్లాడిన తర్వాత ప్రెస్‌మీట్‌ పెట్టి అల్లు అర్జున్ మాట్లాడిన మాటలు సరికాదని కిరణ్ రెడ్డి తప్పుపట్టారు.
