నా వ్యక్తిగత వ్యవహారాలతో బ్లాక్‌మెయిల్‌కు యత్నించాడు…

నా వ్యక్తిగత వ్యవహారాలతో బ్లాక్‌మెయిల్‌కు యత్నించాడు.
* బిల్ గేట్స్ సంచలనం.
* ఎప్‌స్టీన్‌తో పరిచయం నా జీవితంలో అతిపెద్ద తప్పిదం.
* ఆ వ్యవహారం నా కుటుంబానికి తీవ్ర మనోవ్యథను మిగిల్చింది.
* అమెరికా ప్రతినిధుల సభ కమిటీ ముందు లిఖితపూర్వక వివరణ.
వాషింగ్టన్, మహా.
ప్రముఖ వ్యాపారవేత్త, మైక్రోసాఫ్ట్ సహ వ్యవస్థాపకుడు బిల్ గేట్స్ సంచలన విషయాలను వెల్లడించారు. వివాదాస్పద ఆర్థికవేత్త, సెక్స్ ట్రాఫికింగ్ కేసులో ఆరోపణలు ఎదుర్కొన్న జెఫ్రీ ఎప్‌స్టీన్.. తన వివాహేతర సంబంధాలకు సంబంధించిన సమాచారాన్ని అడ్డం పెట్టుకుని తనను తీవ్ర ఒత్తిడికి గురిచేశాడని (బ్లాక్‌మెయిల్) ఆయన ఆరోపించారు. అమెరికా ప్రతినిధుల సభ కమిటీ అడిగిన ప్రశ్నలకు లిఖితపూర్వకంగా ఇచ్చిన సమాధానంలో గేట్స్ ఈ విషయాలను బహిర్గతం చేశారు. జెఫ్రీ ఎప్‌స్టీన్‌తో ఉన్న పరిచయాలపై కమిటీ సంధించిన ప్రశ్నలకు ఆయన ఈ మేరకు సుదీర్ఘంగా బదులిచ్చారు.
ఎప్‌స్టీన్‌తో తనకు జరిగిన సమావేశాలకు, తన వ్యక్తిగత వ్యవహారాలకు ఎలాంటి సంబంధం లేదని గేట్స్ స్పష్టం చేశారు. అయితే, తన అక్రమ సంబంధాలపై ఎప్‌స్టీన్ రహస్యంగా సమాచారం సేకరించాడని, దాన్ని అడ్డుపెట్టుకుని తనతో బలవంతంగా పరిచయం కొనసాగించేలా బ్లాక్ మెయిల్ చేయాలని చూశాడని ఆయన ఆరోపించారు. ఈ మొత్తం వ్యవహారం తన కుటుంబానికి చెప్పలేనంత మనోవేదనను మిగిల్చిందని ఆయన తీవ్ర ఆవేదన వ్యక్తం చేశారు.
ఎప్‌స్టీన్‌తో పరిచయం పెంచుకోవడం తన జీవితంలోనే తాను చేసిన అత్యంత పెద్ద తప్పిదమని గేట్స్ మరోసారి పునరుద్ఘాటించారు. అయితే, ఎప్‌స్టీన్‌ పాల్పడిన నేర కార్యకలాపాలను తాను ఎప్పుడూ ప్రత్యక్షంగా చూడలేదని, తన వైపు నుంచి ఏనాడూ ఎలాంటి తప్పూ జరగలేదని ఆయన కమిటీ ముందు స్పష్టం చేశారు. తాను ఎంతో ప్రతిష్టాత్మకంగా ప్రపంచవ్యాప్తంగా చేపడుతున్న స్వచ్ఛంద సేవా కార్యక్రమాలకు సైతం ఎప్‌స్టీన్‌తో ఉన్న పరిచయం ఒక ముప్పుగా పరిణమించిందని ఆయన విచారం వ్యక్తం చేశారు.
గేట్స్‌, ఎప్‌స్టీన్‌ల మధ్య ఈ పరిచయం 2011లో ప్రారంభమైంది. అప్పటికే ఫ్లోరిడాలో మైనర్‌ను వ్యభిచారంలోకి దించిన కేసులో ఎప్‌స్టీన్‌ దోషిగా తేలాడు. అయితే, ఆ సమయంలో ఆ ఆరోపణల తీవ్రత తనకు పూర్తిగా తెలియదని గేట్స్ వివరణ ఇచ్చారు. సరైన స్థాయిలో నేపథ్యాన్ని పరిశీలించకుండానే అతడితో పరిచయాన్ని అంగీకరించానని ఒప్పుకున్నారు. 2011 నుంచి 2014 మధ్యకాలంలో వీరిద్దరూ పలుమార్లు సమావేశమయ్యారు. ప్రధానంగా స్వచ్ఛంద విరాళాలకు సంబంధించిన అంశాలపైనే వీరి మధ్య చర్చలు జరిగినట్లు గేట్స్ తెలిపారు. అయితే, ఆ ప్రాజెక్టు కార్యరూపం దాల్చకపోవడంతో 2014 చివరి నాటికే అతడితో తన సంబంధాలు దాదాపు తెగిపోయాయని ఆయన వివరించారు. కాగా, 2019లో సెక్స్‌ ట్రాఫికింగ్‌ కేసులో ఎప్‌స్టీన్‌ అరెస్టయిన తర్వాతే బిల్‌ గేట్స్‌తో అతడికి ఉన్న సంబంధాల వ్యవహారం ప్రపంచానికి వెలుగులోకి రావడం గమనార్హం.