- ఎన్ బీకే 111 షూటీంగ్
- నందమూరి బాలకృష్ణకు గాయాలు
- ఆస్పత్రికి తరలించిన చిత్ర యూనిట్
- ప్రమాదం ఏమీ లేదన్న వైద్యులు
కాకినాడ, మహా : నటుడు, హిందూపురం ఎమ్మెల్యే నందమూరి బాలకృష్ణ కాకినాడ పోర్ట్ ప్రాంగణంలో జరుగుతున్న ‘ఎన్బీకే 111’ సినిమా షూటింగ్ స్పాట్లో ప్రమాదవశాత్తు గాయపడ్డారు. శరవేగంగా చిత్రీకరిస్తున్న ఒక భారీ యాక్షన్ ఫైట్ సీక్వెన్స్లో కాలు జారడంతో ఆయన మోకాలికి బలమైన దెబ్బ తగిలింది. వెంటనే స్పందించిన చిత్ర యూనిట్ సభ్యులు షూటింగ్ నిలిపివేసి ఆయనను సమీపంలోని ఒక ప్రైవేట్ హాస్పిటల్కు తరలించారు.
గోపీచంద్ మలినేని డైరెక్షన్లో తెరకెక్కుతున్న ఈ మోస్ట్ ఎవైటెడ్ మాస్ ఎంటర్టైనర్ కోసం కాకినాడ పోర్ట్ ఏరియాలో కీలకమైన డ్యూయెల్ ఫైట్ సీన్ షూట్ చేస్తున్నారు. మంచు మనోజ్, బాలయ్య కాంబినేషన్లో వస్తున్న ఈ యాక్షన్ డ్రామా కోసం ప్రత్యేకంగా వేసిన సెట్లో రాత్రింబవళ్లు చిత్రీకరణ జరుగుతోంది. ఈ క్రమంలో ఒక కష్టమైన ఫైట్ సీక్వెన్స్ చేస్తున్నప్పుడు బాలకృష్ణ కాలు మెలిక పడి కిందపడిపోయారు. మోకాలి భాగంలో తీవ్రమైన నొప్పితో బాధపడటంతో మూవీ టీమ్ ఏ మాత్రం ఆలస్యం చేయకుండా లోకల్ హాస్పిటల్కు తీసుకెళ్లింది. డాక్టర్లు ఆయనకు ప్రాథమిక చికిత్స అందించి మోకాలికి స్కానింగ్ టెస్టులు చేశారు.
కంగారు పడక్కర్లేదన్న డాక్టర్లు
బాలయ్యకు జరిగిన ప్రమాద వార్త సోషల్ మీడియాలో బాగా వ్యాప్తి చెందడంతో నందమూరి ఫ్యాన్స్ తీవ్ర ఆందోళనకు గురయ్యారు. అయితే ఈ గాయం చాలా స్వల్పమైనదేనని, కంగారు పడాల్సిన పనిలేదని హాస్పిటల్ వర్గాలు క్లారిటీ ఇచ్చాయి. ప్రాథమిక చికిత్స పూర్తయిన తర్వాత డాక్టర్లు ఆయనకు కొన్ని రోజుల పాటు బెడ్ రెస్ట్ సూచించే అవకాశం ఉంది. స్కానింగ్ రిపోర్ట్స్ వచ్చిన తర్వాత హెల్త్ కండిషన్పై అఫీషియల్ ప్రెస్ నోట్ రిలీజ్ చేయనున్నట్లు ప్రొడక్షన్ హౌస్ వృద్ధి సినిమాస్ ప్రతినిధులు వెల్లడించారు. బాలయ్య కోలుకునే వరకు ఈ కాకినాడ షెడ్యూల్ను తాత్కాలికంగా నిలిపి వేయనున్నట్లు తెలుస్తోంది.
వీరసింహారెడ్డి కాంబో రిపీట్.. అంచనాలు నెక్స్ట్ లెవెల్
‘వీరసింహారెడ్డి’ లాంటి బ్లాక్బస్టర్ హిట్ తర్వాత బాలకృష్ణ – గోపీచంద్ మలినేని కాంబినేషన్లో వస్తున్న రెండవ సినిమా ఇది. విలేజ్ ప్లస్ పోర్ట్ బ్యాక్డ్రాప్లో సాగే డిఫరెంట్ పొలిటికల్ మాస్ యాక్షన్ కథతో గోపీచంద్ ఈ స్క్రిప్ట్ను డిజైన్ చేశారు. ఇందులో వర్సటైల్ యాక్టర్ మంచు మనోజ్ పవర్ఫుల్ రోల్లో కనిపిస్తుండటంతో సినిమాపై అనౌన్స్మెంట్ నుంచే ట్రేడ్ వర్గాల్లో భారీ క్రేజ్ నెలకొంది. 60 ఏళ్ల వయసు దాటినా కూడా డూప్ లేకుండా రియలిస్టిక్ ఫైట్స్ చేయడం బాలయ్యకు అలవాటు. ఇటీవల వచ్చిన ‘అఖండ’, ‘వీరసింహారెడ్డి’, ‘భగవంత్ కేసరి’ సినిమాలతో హ్యాట్రిక్ వంద కోట్ల క్లబ్ విజయాలు అందుకున్న నటసింహం.. ఈ ఏజ్లోనూ అదే ఎనర్జీతో యాక్షన్ సీన్లు చేస్తున్నారు. త్వరలోనే ఆయన కోలుకుని మళ్లీ సెట్స్లోకి అడుగుపెడతారని ఫ్యాన్స్, టాలీవుడ్ ప్రముఖులు ఆశిస్తున్నారు.
