- ‘ఢిల్లీ చలో’ తో శంభు సరిహద్దులో ఉద్రిక్తత..
- బారికేడ్లతో రైతుల మార్చ్కు అడ్డుకట్ట
- చవక దిగుమతులతో రైతులు నష్టపోతారంటూ ఆందోళన
హర్యానా, మహా : భారత్–అమెరికా మధ్య ప్రతిపాదిత స్వేచ్ఛా వాణిజ్య ఒప్పందం (ఎఫ్టీఏ)ను వ్యతిరేకిస్తూ పంజాబ్, హర్యానా సహా పలు రాష్ట్రాల రైతులు మంగళవారం చేపట్టిన ‘ఢిల్లీ చలో’ మార్చ్తో శంభు సరిహద్దులో ఉద్రిక్త పరిస్థితులు నెలకొన్నాయి. ఢిల్లీలోని కిసాన్ ఘాట్ వద్ద మహా పంచాయత్ నిర్వహించేందుకు రైతు సంఘాలు పిలుపునివ్వగా, వేలాది మంది రైతులు ఢిల్లీకి బయలుదేరారు. అయితే రైతుల ర్యాలీని అడ్డుకునేందుకు హర్యానా పోలీసులు శంభు సరిహద్దు వద్ద భారీ భద్రతా ఏర్పాట్లు చేశారు. సిమెంట్ బారికేడ్లు, ముళ్లకంచెలు ఏర్పాటు చేసి రైతులను ముందుకు వెళ్లకుండా అడ్డుకున్నారు. ఎలాంటి అవాంఛనీయ ఘటనలు జరగకుండా భారీగా పోలీసు బలగాలను మోహరించడంతో పాటు వాటర్ కేనన్లను కూడా సిద్ధంగా ఉంచారు. దీంతో శంభు సరిహద్దు వద్ద కొంతసేపు ఉద్రిక్త పరిస్థితులు నెలకొన్నాయి.
ప్రతిపాదిత భారత్–అమెరికా స్వేచ్ఛా వాణిజ్య ఒప్పందం అమల్లోకి వస్తే అమెరికా నుంచి తక్కువ ధరలకు వ్యవసాయ, డెయిరీ ఉత్పత్తులు భారత మార్కెట్లోకి పెద్దఎత్తున వచ్చే అవకాశం ఉందని రైతు సంఘాలు ఆందోళన వ్యక్తం చేస్తున్నాయి. అలాంటి పరిస్థితి ఏర్పడితే దేశీయ రైతులు, పశుపోషకులు తమ ఉత్పత్తులకు గిట్టుబాటు ధరలు పొందలేరని, వారి జీవనోపాధిపై తీవ్ర ప్రభావం పడుతుందని పేర్కొంటున్నాయి. వ్యవసాయ రంగ ప్రయోజనాలను దృష్టిలో పెట్టుకుని కేంద్ర ప్రభుత్వం ఈ ఒప్పందాన్ని పునఃపరిశీలించాలని రైతు సంఘాలు డిమాండ్ చేస్తున్నాయి. రైతుల ప్రయోజనాలకు భంగం కలిగించే నిబంధనలను అంగీకరించవద్దని ప్రభుత్వాన్ని కోరుతున్నాయి. తమ డిమాండ్లను వినిపించేందుకు కిసాన్ ఘాట్ వద్ద మహా పంచాయత్ నిర్వహించాలని నిర్ణయించిన రైతులను పోలీసులు సరిహద్దు వద్దే అడ్డుకోవడంతో పరిస్థితి ఉద్రిక్తంగా మారింది. రైతుల నిరసనల నేపథ్యంలో శంభు సరిహద్దు ప్రాంతంలో భద్రతను మరింత కట్టుదిట్టం చేశారు. పరిస్థితిని ఎప్పటికప్పుడు అధికారులు పర్యవేక్షిస్తూ శాంతిభద్రతలకు విఘాతం కలగకుండా చర్యలు చేపట్టారు.
