ప్రజల ఆకాంక్షలే ప్రజా ప్రభుత్వ లక్ష్యం..! రూ.131.61 కోట్లతో మధిరలో అభివృద్ధి పనులకు శ్రీకారం. :డిప్యూటీ సీఎం మల్లు భట్టి విక్రమార్క..

• రూ.131.61 కోట్లతో మధిరలో అభివృద్ధి పనులకు శ్రీకారం.
• సంక్షేమం, విద్య, వైద్యం, రహదారులకు భారీగా నిధులు.
• డిప్యూటీ సీఎం మల్లు భట్టి విక్రమార్క.

మధిర, మహా .

ప్రత్యేక తెలంగాణ రాష్ట్ర సాధన కోసం దశాబ్దాల పాటు సాగిన పోరాటం ఫలితంగా ఏర్పడిన తెలంగాణలో ప్రజల ఆకాంక్షలను నెరవేర్చే దిశగా ప్రజా ప్రభుత్వం పనిచేస్తోందని రాష్ట్ర ఉప ముఖ్యమంత్రి, ఆర్థిక, ఇంధన, ప్రణాళిక శాఖల మంత్రి భట్టి విక్రమార్క మల్లు అన్నారు. రైతులు, మహిళలు, బడుగు బలహీన వర్గాల సంక్షేమంతో పాటు విద్య, వైద్యం, రహదారులు, నీటిపారుదల రంగాల అభివృద్ధికి ప్రభుత్వం అత్యధిక ప్రాధాన్యం ఇస్తోందని తెలిపారు. ముఖ్యమంత్రి నాయకత్వంలో రాష్ట్రాన్ని అభివృద్ధి, సంక్షేమం రెండింటినీ సమన్వయం చేసుకుంటూ ముందుకు తీసుకెళ్తున్నామని చెప్పారు.

మధిర నియోజకవర్గంలోని చింతకాని, బోనకల్ మండలాల్లో ఆదివారం పలు అభివృద్ధి కార్యక్రమాలకు డిప్యూటీ సీఎం శంకుస్థాపనలు, ప్రారంభోత్సవాలు నిర్వహించారు. ప్రజలకు అవసరమైన అంతర్గత సీసీ రోడ్లు, బీటీ రహదారులు, డ్రైనేజీలు, ప్రభుత్వ నర్సింగ్ కళాశాల, పీఏసీఎస్ గోదాములు, గ్రామ పంచాయతీ భవనం తదితర పనులకు శ్రీకారం చుట్టారు. ఈ రెండు మండలాల్లో మొత్తం రూ.131.61 కోట్ల విలువైన అభివృద్ధి పనులు చేపట్టనున్నట్లు తెలిపారు. గ్రామీణ ప్రాంతాల్లో మౌలిక వసతులను బలోపేతం చేయడం ద్వారా ప్రజల జీవన ప్రమాణాలను మెరుగుపరచడమే ప్రభుత్వ లక్ష్యమని పేర్కొన్నారు.

చింతకాని మండలం కొదుమూరు ఎస్సీ కాలనీలో రూ.66 లక్షలతో అంతర్గత సీసీ రోడ్ల నిర్మాణానికి, లచ్చగూడెంలో రూ.29 కోట్లతో నూతన ప్రభుత్వ నర్సింగ్ కళాశాల నిర్మాణానికి డిప్యూటీ సీఎం శంకుస్థాపన చేశారు. అదేవిధంగా లచ్చగూడెం నుంచి నేరడ పీఆర్ రహదారి వరకు, చింతకాని–వందనం ఆర్‌అండ్‌బీ రహదారి నుంచి బీటీ రోడ్డు నిర్మాణానికి రూ.1.75 కోట్లు, లచ్చగూడెం–అనంతారం బీటీ రోడ్డు నిర్మాణానికి రూ.7 కోట్లతో చేపట్టే పనులకు శంకుస్థాపన చేశారు.

చింతకాని గ్రామంలోని ఎస్సీ కాలనీలో రూ.44 లక్షలతో, నాగిలిగొండ ఎస్సీ కాలనీలో రూ.85 లక్షలతో అంతర్గత సీసీ రోడ్ల నిర్మాణానికి శంకుస్థాపన చేశారు. నాగిలిగొండ నుంచి తూటికుంట్ల వరకు రూ.5.25 కోట్లతో నిర్మించనున్న బీటీ రహదారి పనులకు కూడా శ్రీకారం చుట్టారు. గ్రామాల్లో మౌలిక సదుపాయాలను మెరుగుపరచడంతో పాటు రవాణా సౌకర్యాన్ని విస్తరించేందుకు ప్రభుత్వం ప్రత్యేక దృష్టి సారిస్తోందని ఈ సందర్భంగా భట్టి విక్రమార్క తెలిపారు.

బోనకల్ మండలంలోని నారాయణపురం ఎస్సీ కాలనీలో రూ.63 లక్షలతో అంతర్గత సీసీ రోడ్లు, డ్రైనేజీ నిర్మాణానికి, ఎస్సీ కాలనీలో మరో రూ.కోటితో అంతర్గత సీసీ రోడ్ల నిర్మాణానికి శంకుస్థాపన చేశారు. రాయన్నపేట ఎస్సీ కాలనీలో రూ.19 లక్షలతో చేపట్టనున్న అంతర్గత సీసీ రోడ్ల నిర్మాణ పనులకు కూడా ప్రారంభం పలికారు. వెనుకబడిన ప్రాంతాల్లో అవసరమైన మౌలిక వసతులను కల్పించడం ద్వారా సామాజికంగా, ఆర్థికంగా వెనుకబడిన వర్గాలకు మెరుగైన జీవన పరిస్థితులు కల్పించాలన్నది ప్రభుత్వ ఉద్దేశమని అన్నారు.

వ్యవసాయ రంగానికి అవసరమైన మౌలిక సదుపాయాలను పెంచే చర్యల్లో భాగంగా నారాయణపురంలో రూ.80.84 లక్షలతో నిర్మించిన 1,000 మెట్రిక్ టన్నుల సామర్థ్యం కలిగిన పీఏసీఎస్ గోదామును భట్టి విక్రమార్క ప్రారంభించారు. మోటమర్రిలో రూ.24.50 లక్షలతో నిర్మించిన 300 మెట్రిక్ టన్నుల సామర్థ్యం కలిగిన పీఏసీఎస్ గోదామును కూడా ప్రారంభించారు. రైతులు పండించిన ధాన్యాన్ని భద్రపరచుకునేందుకు గోదాముల సామర్థ్యాన్ని పెంచడం ద్వారా వ్యవసాయ రంగానికి మౌలిక బలం చేకూరుతుందని ప్రభుత్వం భావిస్తోంది.

బోనకల్ మండలంలో రహదారి అభివృద్ధికి కూడా పెద్దపీట వేశారు. కలకోట–రాపల్లి–గన్నవరం–ముసలిమడుగు–లక్ష్మీపురం రహదారిని రూ.57 కోట్లతో కిలోమీటర్ 0/0 నుంచి 20/0 వరకు వెడల్పు చేసి పటిష్టం చేసే పనులకు శంకుస్థాపన చేశారు. బ్రాహ్మణపల్లి–గన్నవరం మీదుగా రాపల్లి వరకు ఉన్న పీడబ్ల్యూడీ రహదారిని రూ.26 కోట్లతో కిలోమీటర్ 0/0 నుంచి 8/0 వరకు వెడల్పు చేసి పటిష్టం చేయనున్న పనులకు కూడా శ్రీకారం చుట్టారు. రాపల్లిలో రూ.20 లక్షలతో నిర్మించనున్న నూతన గ్రామ పంచాయతీ భవనానికి శంకుస్థాపన చేశారు.

ఈ సందర్భంగా భట్టి విక్రమార్క మాట్లాడుతూ ప్రజా ప్రభుత్వం అధికారంలోకి వచ్చిన తర్వాత సంక్షేమం, అభివృద్ధి రెండింటినీ సమాంతరంగా కొనసాగిస్తోందని అన్నారు. రాష్ట్రంలోని కోటి 6 లక్షల కుటుంబాలకు తెల్ల రేషన్ కార్డుల ద్వారా సన్నబియ్యాన్ని ఉచితంగా పంపిణీ చేస్తున్నామని తెలిపారు. 53 లక్షల కుటుంబాలకు గృహజ్యోతి పథకం కింద నెలకు 200 యూనిట్ల వరకు ఉచిత విద్యుత్‌ సరఫరా చేస్తున్నామని చెప్పారు. మహిళలకు ఆర్టీసీ బస్సుల్లో ఉచిత ప్రయాణ సౌకర్యం కల్పించామని, ఆరోగ్యశ్రీ పరిమితిని రూ.10 లక్షలకు పెంచామని వివరించారు.

ఇండ్లు లేని నిరుపేద కుటుంబాలకు సొంతింటి కలను సాకారం చేసేందుకు ఒక్కో ఇంటికి రూ.5 లక్షల చొప్పున ఆర్థిక సహాయం అందిస్తూ ఇందిరమ్మ ఇళ్ల నిర్మాణ కార్యక్రమాన్ని కొనసాగిస్తున్నామని తెలిపారు. ఇప్పటివరకు 7 లక్షల ఇందిరమ్మ ఇళ్ల నిర్మాణం చేపడుతున్నట్లు చెప్పారు. పేదల జీవితాల్లో స్థిరత్వం తీసుకురావడం, వారికి భద్రమైన నివాసం కల్పించడం ప్రభుత్వ సంక్షేమ విధానంలో కీలక భాగమని అన్నారు.

నిరుద్యోగ యువతకు ఉద్యోగ అవకాశాలు కల్పించడంపై ప్రభుత్వం ప్రత్యేకంగా దృష్టి పెట్టిందని భట్టి విక్రమార్క తెలిపారు. తొలి ఏడాదిలోనే 70 వేలకు పైగా నియామక పత్రాలను అందజేశామని చెప్పారు. ప్రతి సంవత్సరం జాబ్‌ క్యాలెండర్‌ను ప్రకటించి ప్రభుత్వ శాఖల్లో ఖాళీలను భర్తీ చేసేందుకు చర్యలు తీసుకుంటున్నామని తెలిపారు. యువతకు ఉద్యోగ భద్రత కల్పించడం ద్వారా కుటుంబాల ఆర్థిక పరిస్థితులను మెరుగుపరచడమే లక్ష్యమన్నారు.

తెలంగాణ విద్యా వ్యవస్థను ప్రక్షాళన చేసేందుకు ప్రభుత్వం అనేక చర్యలు చేపడుతోందని భట్టి విక్రమార్క అన్నారు. ఇందులో భాగంగా 100 ఇంటిగ్రేటెడ్ గురుకులాలను మంజూరు చేశామని తెలిపారు. ఒక్కో ఇంటిగ్రేటెడ్ గురుకులాన్ని రూ.200 కోట్ల వ్యయంతో 25 ఎకరాల విస్తీర్ణంలో అంతర్జాతీయ ప్రమాణాలతో నిర్మిస్తున్నామని చెప్పారు.

ఎస్సీ, ఎస్టీ, బీసీ, మైనారిటీ, ఓసీ వర్గాలకు చెందిన విద్యార్థులు చిన్ననాటి నుంచే ఒకే ప్రాంగణంలో కలిసి చదువుకునేలా ఈ గురుకులాలను రూపొందిస్తున్నామని తెలిపారు. విద్య ద్వారా సామాజిక సమానత్వాన్ని పెంపొందించడంతో పాటు విద్యార్థుల్లో పరస్పర అవగాహన, సామాజిక ఐక్యత పెంచడం ద్వారా భవిష్యత్‌ తెలంగాణకు బలమైన పునాది వేయాలన్నది ప్రభుత్వ లక్ష్యమన్నారు.

రాష్ట్రంలో మరో 100 తెలంగాణ పబ్లిక్‌ స్కూళ్లను మంజూరు చేశామని తెలిపారు. గురుకులాల్లో విద్యార్థులకు మెరుగైన పోషకాహారం అందించేందుకు మెస్‌ చార్జీలను 40 శాతం పెంచామని, కాస్మొటిక్‌ చార్జీలను 200 శాతం పెంచామని చెప్పారు. ప్రభుత్వ విద్యా సంస్థల్లో చదువుతున్న పేద విద్యార్థులకు నాణ్యమైన విద్య, మెరుగైన వసతులు అందించేందుకు ప్రభుత్వం చర్యలు తీసుకుంటోందన్నారు.

మధిర నియోజకవర్గంలో ఒకే రోజు రూ.131.61 కోట్ల విలువైన వివిధ అభివృద్ధి పనులకు శంకుస్థాపనలు, ప్రారంభోత్సవాలు జరగడం గ్రామీణ మౌలిక వసతులపై ప్రభుత్వం పెడుతున్న దృష్టికి నిదర్శనమని అధికారులు తెలిపారు. రహదారులు, డ్రైనేజీలు, విద్య, వ్యవసాయ నిల్వ సదుపాయాలు, గ్రామ పంచాయతీ భవనాలు వంటి ప్రాథమిక అవసరాలకు నిధులు కేటాయించడం ద్వారా గ్రామాల సమగ్రాభివృద్ధికి బాటలు వేస్తున్నట్లు పేర్కొన్నారు.

ఈ కార్యక్రమాల్లో జిల్లా కలెక్టర్‌ దివాకర టీఎస్‌, పోలీస్‌ కమిషనర్‌ సునీల్‌ దత్‌, సుడా చైర్మన్‌ పువ్వాళ్ల దుర్గ ప్రసాద్‌, విద్యుత్‌ శాఖ సీఈ అశోక్‌, ఎస్‌ఈ శ్రీనివాస చారి, ఆర్‌అండ్‌బీ ఎస్‌ఈ యుగంధర్‌రావు, పీఆర్‌ ఎస్‌ఈ వెంకట్‌రెడ్డి, సీపీఓ శ్రీనివాస్‌, హౌసింగ్‌ పీడీ శ్రీనివాస్‌, ప్రజాప్రతినిధులు, వివిధ శాఖల అధికారులు పాల్గొన్నారు.