- 12 మంది ఐఏఎస్‌లు ట్రాన్స్‌ఫర్
- రిటైర్మెంట్‌కు 3 రోజుల ముందు గవర్నర్ స్పెషల్ సీఎస్‌గా దానకిషోర్
- అటవీ శాఖకు జయేష్ రంజన్, ఇంధన శాఖకు వికాస్ రాజ్
హైదరాబాద్, మహా : ఐఏఎస్ అధికారులను బదిలీ చేస్తూ రాష్ట్ర ప్రభుత్వం ఉత్తర్వులు ఇచ్చింది. పలు శాఖల్లో పనిచేస్తున్న సీనియర్ ఐఏఎస్ అధికారులకు కొత్త బాధ్యతలు అప్పగిస్తూ బదిలీలు, పోస్టింగులకు సంబంధించిన ఉత్తర్వులను సాధారణ పరిపాలన శాఖ (జీఏడీ) ఉత్తర్వులు జారీ చేసింది. మొత్తం 12 మంది అధికారులకు స్థానచలనం కల్పించిన రాష్ట్ర ప్రభుత్వం.. కీలక శాఖల బాధ్యతల్లో మార్పులు చేసింది. మరోవైపు ఈ నెలాఖరున పదవీ విరమణ చేయనున్న సీనియర్ ఐఏఎస్ అధికారి ఎం. దాన కిశోర్‌ను గవర్నర్ ప్రత్యేక ప్రధాన కార్యదర్శిగా పునర్నియమిస్తూ మరో కీలక నిర్ణయం తీసుకుంది.
1996 బ్యాచ్‌కు చెందిన సీనియర్ ఐఏఎస్ అధికారి ఎం. దాన కిశోర్ పదవీకాలం ఈనెలాఖరు (అక్టోబర్ 31వ తేదీ)తో ముగియనుంది. ఈ నేపథ్యంలో ఆయనను గవర్నర్ ప్రత్యేక ప్రధాన కార్యదర్శిగా ప్రభుత్వం తిరిగి నియమించింది. దానకిశోర్ పునర్నియామకానికి సంబంధించిన నిబంధనలు, షరతులను ప్రత్యేకంగా జారీ చేయనున్నట్లు ఉత్తర్వుల్లో పేర్కొన్నారు. తాజా బదిలీల్లో భాగంగా పలువురు సీనియర్ అధికారులకు కీలక శాఖల బాధ్యతలు అప్పగించింది. జయేష్ రంజన్‌కు పర్యావరణం, అటవీ, సైన్స్ అండ్ టెక్నాలజీ శాఖల ప్రత్యేక ప్రధాన కార్యదర్శిగా బాధ్యతలు కేటాయించింది. వికాస్ రాజ్‌కు ఇంధన శాఖ ప్రత్యేక ప్రధాన కార్యదర్శిగా నియమించింది. నవీన్ మిట్టల్‌కు పంచాయతీరాజ్, గ్రామీణాభివృద్ధి సంబంధిత శాఖల బాధ్యతలు అప్పగించారు. శైలజా రామయ్యర్‌కు రెవెన్యూ శాఖలోని దేవాదాయ వ్యవహారాల బాధ్యతలు కేటాయించారు. ఏ. వాణీ ప్రసాద్‌కు క్రీడలు, హెరిటేజ్ తెలంగాణకు సంబంధించిన బాధ్యతలు అప్పగించారు.
ఈ మార్పులతో అటవీ, విద్యుత్, గ్రామీణాభివృద్ధి, దేవాదాయ శాఖల్లో పరిపాలనా బాధ్యతల కేటాయింపులో మార్పులు చోటుచేసుకున్నాయి. ఆయా శాఖల ప్రాధాన్యాలు, ప్రభుత్వ కార్యక్రమాల అమలుకు అనుగుణంగా అధికారులకు కొత్త బాధ్యతలు అప్పగించారు. గిరిజన సంక్షేమ శాఖలోనూ ప్రభుత్వం కీలక మార్పులు చేసింది. సీనియర్ ఐఏఎస్ అధికారి రాహుల్ బొజ్జాకు గిరిజన సంక్షేమ శాఖ ప్రధాన కార్యదర్శిగా అదనపు బాధ్యతలు అప్పగించింది. ఇప్పటివరకు వివిధ శాఖల్లో బాధ్యతలు నిర్వహిస్తున్న అధికారులకు కొత్త పోస్టింగులు ఇవ్వడంతో పాటు కొన్ని విభాగాల్లో అదనపు బాధ్యతలను కూడా కేటాయించింది. రవాణా శాఖ కార్యదర్శిగా కె. ఇలంబర్తిని నియమించింది. రవాణా రంగంతో పాటు రోడ్లు, భవనాల శాఖకు సంబంధించిన బాధ్యతల కేటాయింపుపై కూడా ఉత్తర్వుల్లో పేర్కొన్న వివరాలను పరిశీలించాల్సి ఉంది. పట్టణాభివృద్ధి సంస్థలు, మహిళా సంక్షేమం, ఆరోగ్య శాఖల్లోనూ ప్రభుత్వం కీలక మార్పులు చేపట్టింది. హెచ్‌ఎండీఏ కమిషనర్‌గా పనిచేస్తున్న సర్ఫరాజ్ అహ్మద్‌కు కోర్ అర్బన్ రీజియన్‌ (క్యూర్)కు సంబంధించిన అదనపు బాధ్యతలు అప్పగించింది. పట్టణ ప్రాంతాల అభివృద్ధి, పరిపాలనా సమన్వయం వంటి అంశాల్లో ఈ నియామకాలు ప్రాధాన్యం సంతరించుకున్నాయి.
శృతి ఓజాకు మహిళా సంక్షేమం, ఎస్సీ సంక్షేమానికి సంబంధించిన శాఖల్లో ప్రత్యేక కార్యదర్శి బాధ్యతలు కేటాయించారు. వైద్యారోగ్య శాఖ డైరెక్టర్‌గా ముషారఫ్ అలీ ఫారూఖీని నియమించింది. డాక్టర్ ఎస్. సంగీత సత్యనారాయణకు మహిళా, శిశు సంక్షేమ శాఖ డైరెక్టర్ బాధ్యతలు అప్పగించింది. విద్యుత్ రంగంలోనూ బాధ్యతల పునర్వ్యవస్థీకరణ జరిగింది. దక్షిణ తెలంగాణ విద్యుత్ పంపిణీ సంస్థ (టీజీఎస్‌పీడీసీఎల్) ఎండీగా ఉన్న జితేష్ వి. పాటిల్‌కు టీజీ రెడ్కోకు సంబంధించిన అదనపు బాధ్యతలు అప్పగించినట్లు ఉత్తర్వుల్లో పేర్కొన్నారు. తెలంగాణ ప్రభుత్వం చేపట్టిన ఈ బదిలీలు, పోస్టింగులు రాష్ట్ర పరిపాలనా వర్గాల్లో ప్రాధాన్యం సంతరించుకున్నాయి. కీలక శాఖల్లో అధికారుల బాధ్యతలు మారడంతో ప్రభుత్వ పథకాల అమలు, శాఖల మధ్య సమన్వయం, పరిపాలనా నిర్ణయాలపై ప్రభావం ఎలా ఉంటుందనే అంశంపై ఆసక్తి నెలకొంది.
