ఆసియా పవర్ ఇండెక్స్‌లో భారత్‌కు ‘మేజర్ పవర్’ హోదా; తొలిసారి మూడో స్థానం

భారత్‌కు ‘మేజర్ పవర్’ హోదా.
* ఆసియా పవర్ ఇండెక్స్‌లో తొలిసారి మూడో స్థానం.
* అమెరికా, చైనా అగ్రస్థానాలు పదిలం.
* 40.0 స్కోరుతో భారత్
* సైనిక, ఆర్థిక సామర్థ్యాల పురోగతి.
* భారత్ తర్వాత స్థానాల్లో జపాన్, రష్యా.

న్యూఢిల్లీ , మహా.

ఆసియా పవర్ ఇండెక్స్ – 2025లో భారత్ అనూహ్యంగా తన సత్తా చాటి, తొలిసారిగా మూడో స్థానాన్ని దక్కించుకోవడమే కాక, కీలకమైన “మేజర్ పవర్” హోదాను సొంతం చేసుకుంది. లోవీ ఇనిస్టిట్యూట్ నిర్వహించిన ఈ అధ్యయనంలో, గత ఏడాది 38.1 స్కోరుతో “మిడిల్ పవర్” జాబితాలో ఉన్న భారత్, ఈసారి గణనీయమైన పురోగతిని సాధించి, 100కి 40 స్కోరుతో శక్తిమంతమైన దేశంగా అవతరించింది. భారత్ సాధించిన ఈ ర్యాంకు, ఆసియా భౌగోళిక రాజకీయాల్లో దాని ప్రాముఖ్యత మరియు బలాన్ని మరింత బలోపేతం చేసింది.

* శరవేగంతో భారత్ పురోగతి.. గత ఏడాదితో పోలిస్తే స్కోర్‌లో గణనీయ వృద్ధి*

2024 నివేదికలో 38.1 పాయింట్లతో సంతృప్తి పడిన భారత్, 2025 ఎడిషన్‌లో 40.0 స్కోరు నమోదు చేసి, తన సామర్థ్యాన్ని స్పష్టం చేసింది. ఈ వృద్ధి వెనుక ఆర్థిక, సైనిక సామర్థ్యాల పెంపు కీలకంగా ఉన్నాయి. ముఖ్యంగా అంతర్జాతీయ కనెక్టివిటీ, సాంకేతిక అభివృద్ధి మరియు సైనిక బలంపై పెట్టిన పెట్టుబడులు ఈ పురోగతికి దోహదపడ్డాయి. అమెరికా (80.5), చైనా (73.7) ‘సూపర్ పవర్స్’గా మొదటి రెండు స్థానాల్లో స్థిరంగా ఉన్నప్పటికీ, ఈ ప్రాంతంలో భారత్ తన స్థానాన్ని బలోపేతం చేసుకుంది.

పెరుగుతున్న సైనిక సామర్థ్యాలు

లోవీ ఇనిస్టిట్యూట్ అధ్యయనం ప్రకారం, భారతదేశ భౌగోళిక రాజకీయ ఔచిత్యం , అంతర్జాతీయ కనెక్టివిటీతో పాటు, భారతదేశ సైనిక సామర్థ్యాలు పెరుగుతున్నాయని స్పష్టం చేసింది. ఈ సైనిక బలోపేతం, ఆసియా పవర్ ఇండెక్స్ మూడవ స్థానాన్ని సాధించడంలో ప్రధాన పాత్ర పోషించింది. ఆపరేషన్ సిందూర్ వంటి వాటిలో దాని పనితీరు ఈ ర్యాంకింగ్‌కు మద్దతు ఇచ్చింది. అంతేకాక, పెట్టుబడుల ఆకర్షణ విషయంలో అమెరికా తర్వాత చైనాను కూడా భారత్ అధిగమించడం, ఆర్థిక రంగంలో దాని పెరుగుతున్న ఆకర్షణకు నిదర్శనం.

* గ్లోబల్ ఆధిపత్యం..మొదటి ఐదు స్థానాల్లో సూపర్ పవర్స్ , మేజర్ పవర్స్**

ఆసియా పవర్ ఇండెక్స్ – 2025లో ‘సూపర్ పవర్స్’గా అమెరికా (80.5 పాయింట్లు) మరియు చైనా (73.7 పాయింట్లు) మొదటి రెండు స్థానాల్లో నిలబడ్డాయి. అయితే, మేజర్ పవర్‌గా భారత్ (40.0) మూడవ స్థానంలో నిలవగా, 38.8 స్కోరుతో జపాన్ నాలుగవ స్థానంలో, 32.1 స్కోరుతో రష్యా ఐదవ స్థానంలో నిలిచాయి. ఇక్కడ గమనించదగ్గ విషయం ఏమిటంటే, భారత్ మూడవ స్థానంలో నిలిచినప్పటికీ, రెండో స్థానంలో ఉన్న చైనాతో (73.7) ఇప్పటికీ పెద్ద అంతరాన్ని కలిగి ఉంది, ఇది భారత్ మరింత పుంజుకోవాల్సిన అవసరాన్ని సూచిస్తుంది.

* ఆర్థిక, దౌత్య సంబంధాల విస్తృతి*

ఆసియా పవర్ ఇండెక్స్ అనేది కేవలం సైనిక శక్తిని మాత్రమే కాకుండా, దేశాల సమగ్ర శక్తిని అంచనా వేసే వార్షిక నివేదిక. దీని ఏడవ ఎడిషన్ (2025)లో 27 దేశాలు, భూభాగాలకు ఎనిమిది ప్రధాన కోణాల్లో (131 సూచికల ఆధారంగా) ర్యాంకులు ఇచ్చారు. ఆర్థిక సామర్థ్యం, సైనిక సామర్థ్యం, దౌత్య ప్రభావం, ఆర్థిక సంబంధాలు, రక్షణ నెట్‌వర్క్‌లు వంటి అంశాలు ఇందులో కీలకమైనవి. భారత్ సాధించిన మూడవ ర్యాంకు, ఈ అన్ని రంగాల్లోనూ దేశం సాధించిన సమతుల్య వృద్ధికి , విస్తరిస్తున్న గ్లోబల్ కనెక్టివిటీకి అద్దం పడుతోంది.

* పవర్ ఇండెక్స్‌లో టాప్ 10*

ఆసియా పవర్ ఇండెక్స్ – 2025లో టాప్ 10 దేశాలు వారి స్థానాలను నిలుపుకున్నాయి. ఈ జాబితాలో అమెరికా (80.4), చైనా (73.7), భారత్ (40.0), జపాన్ (38.8), రష్యా (32.1) మొదటి ఐదు స్థానాలను ఆక్రమించాయి. తర్వాతి స్థానాల్లో ఆస్ట్రేలియా (31.8), సౌత్ కొరియా (31.5), సింగపూర్ (26.8), ఇండోనేషియా (22.4), మలేషియా (20.5) ఉన్నాయి. ఈ జాబితా ఆసియా ప్రాంతంలో ప్రస్తుత శక్తి సమతుల్యతను, వివిధ దేశాల ఆర్థిక, సైనిక, దౌత్య బలాన్ని సూచిస్తుంది.