జనవరి 28 నుంచి మేడారం మహా కుంభమేళా.
* 2026 పోస్టర్ను ఆవిష్కరించిన సీఎం రేవంత్ రెడ్డి.
* జాతర షెడ్యూల్ విడుదల చేసిన ప్రభుత్వం.
* తెలంగాణ కుంభమేళాకు 3,495 ఆర్టీసీ బస్సులు, భారీ ఏర్పాట్లు.
హైదరాబాద్, మహా.
తెలంగాణ కుంభమేళా, ఆసియాలోనే అతిపెద్ద గిరిజన జాతరగా పేరొందిన “మేడారం సమ్మక్క-సారలమ్మ మహా జాతర-2026″కు ముహూర్తం ఖరారైంది. వచ్చే ఏడాది జనవరి 28 నుంచి 31 వరకు జరగనున్న ఈ మహా క్రతువుకు సంబంధించిన గోడ పత్రికను (పోస్టర్) ముఖ్యమంత్రి ఎ. రేవంత్ రెడ్డి ఆదివారం తన జూబ్లీహిల్స్ నివాసంలో ఆవిష్కరించారు. ఈ సందర్భంగా జూబ్లీహిల్స్ నివాసం ఆధ్యాత్మిక శోభను సంతరించుకుంది. మంత్రి సీతక్క ముఖ్యమంత్రి రేవంత్ రెడ్డికి సమ్మక్క తల్లి కంకణం కట్టి, నుదుట బొట్టు పెట్టి అమ్మవార్ల ఆశీస్సులు అందజేశారు. ఈ కార్యక్రమంలో రాష్ట్ర మంత్రులు కొండా సురేఖ, పొంగులేటి శ్రీనివాస్ రెడ్డి, అడ్లూరి లక్ష్మణ్ కుమార్ తదితరులు పాల్గొని జాతర ఏర్పాట్లపై చర్చించారు.
వనదేవతల దర్శనానికి వచ్చే భక్తుల సౌకర్యార్థం ప్రభుత్వం భారీ ఏర్పాట్లు చేస్తోంది. నాలుగు రోజుల పాటు సాగే ఈ జాతర షెడ్యూల్ను ప్రభుత్వం అధికారికంగా ప్రకటించింది. జాతరలో అత్యంత కీలకమైన ఘట్టం మొదటి రోజైన జనవరి 28 (బుధవారం) నాడు ప్రారంభమవుతుంది. ఆ రోజున కన్నెపల్లి నుంచి సారలమ్మ, కొండాయి నుంచి గోవిందరాజులు, పూనుగొండ్ల నుంచి పగిడిద్దరాజు మేడారంలోని గద్దెలపైకి చేరుకోనున్నారు. రెండో రోజైన జనవరి 29న చిలుకలగుట్ట నుంచి సమ్మక్క తల్లిని తీసుకొచ్చి గద్దెపై ప్రతిష్ఠిస్తారు. ఈ అపురూప ఘట్టాన్ని వీక్షించేందుకు లక్షలాది మంది భక్తులు తరలివచ్చే అవకాశం ఉంది.
మూడవ రోజైన జనవరి 30న భక్తులు అమ్మవార్లకు మొక్కులు సమర్పించుకోనున్నారు. నిలువెత్తు బంగారం (బెల్లం) సమర్పించి మొక్కులు తీర్చుకునే భక్తులతో మేడారం పరిసరాలు జనసంద్రం కానున్నాయి. చివరి రోజైన జనవరి 31న సాయంత్రం 6 గంటలకు అమ్మవార్లను తిరిగి వనప్రవేశం చేయించడంతో ఈ మహా జాతర ఘనంగా ముగియనుంది. భక్తుల రద్దీని దృష్టిలో ఉంచుకుని ఆర్టీసీ భారీ కార్యాచరణను ప్రకటించింది. జాతర కోసం ప్రత్యేకంగా 3,495 బస్సులను నడపనున్నట్లు స్పష్టం చేసింది. జనవరి 25వ తేదీ నుంచే ఈ ప్రత్యేక బస్సు సేవలు భక్తులకు అందుబాటులో ఉంటాయని, ఫిబ్రవరి 1వ తేదీ వరకు ఇవి కొనసాగుతాయని అధికారులు వెల్లడించారు.
మేడారంలో భక్తులకు ఎలాంటి అసౌకర్యం కలగకుండా 28 ఎకరాల విస్తీర్ణంలో భారీ బస్టాండ్ను ఏర్పాటు చేస్తున్నారు. అలాగే క్యూలైన్లు, భక్తులు వేచి ఉండే గదుల నిర్మాణాలు శరవేగంగా జరుగుతున్నాయి. తాగునీరు, పారిశుద్ధ్యం, భద్రత విషయంలో రాజీ పడకుండా పకడ్బందీ చర్యలు తీసుకోవాలని ముఖ్యమంత్రి అధికారులను ఆదేశించారు. కోట్లాది మంది ప్రజల నమ్మకానికి ప్రతీక అయిన మేడారం జాతరను అత్యంత వైభవంగా నిర్వహించేందుకు ప్రభుత్వం అన్ని విధాలా సిద్ధంగా ఉందని మంత్రులు ఈ సందర్భంగా పేర్కొన్నారు.
