శాసనసభలో ‘రాఘవ’ రణరంగం.
*అక్రమ మైనింగ్పై హరీశ్ రావు ధర్మసందేహం!
* నన్ను ఉరి తీయండి లేదా సస్పెండ్ చేయండి.
* మంత్రి సంస్థపై హౌస్ కమిటీ వేయాల్సిందేనని బీఆర్ఎస్ పట్టు.
* దశాబ్దకాలపు అక్రమాలపై సీబీసీఐడీ విచారణకు సీఎం ఆదేశం.
* మైనింగ్ మాఫియాపై ‘రేవంత్’ ఎదురుదాడి.
హైదరాబాద్ ,మహా.
తెలంగాణ శాసనసభ వేదికగా శనివారం అధికార, ప్రతిపక్షాల మధ్య సాగిన మాటల యుద్ధం పరాకాష్టకు చేరుకుంది. రాష్ట్ర రెవెన్యూ శాఖ మంత్రి పొంగులేటి శ్రీనివాస్ రెడ్డి కుటుంబానికి చెందిన ‘రాఘవ కన్స్ట్రక్షన్స్’ చుట్టూ అల్లుకున్న అక్రమ మైనింగ్ ఆరోపణలు సభను కుదిపేశాయి. ఇది కేవలం ఒక నిర్మాణ సంస్థకు సంబంధించిన వ్యవహారంగా కాకుండా, రాజకీయ అస్తిత్వ పోరాటంగా మారిపోయింది. “నేను ఆధారాలతో మాట్లాడుతున్నాను.. నా దగ్గర ఉన్న పత్రాలు తప్పని నిరూపిస్తే నన్ను ఉరి తీయండి, లేదా సభ నుంచి శాశ్వతంగా బహిష్కరించండి” అంటూ మాజీ మంత్రి హరీశ్ రావు విసిరిన సవాల్ సభలో నిశ్శబ్దాన్ని నింపగా, దానికి ధీటుగా ముఖ్యమంత్రి రేవంత్ రెడ్డి పదేళ్ల మైనింగ్ చరిత్రపై విచారణకు ఆదేశించడం రాజకీయ వర్గాల్లో పెను సంచలనంగా మారింది. శాసనసభ చరిత్రలో అరుదుగా కనిపించే ఇటువంటి సవాళ్లు, ప్రతిసవాళ్లతో శనివారం నాటి సమావేశాలు ఆద్యంతం ఉత్కంఠభరితంగా సాగాయి.
సభ ప్రారంభమైన కొద్దిసేపటికే హరీశ్ రావు ఈ అంశాన్ని లేవనెత్తుతూ ప్రభుత్వంపై విరుచుకుపడ్డారు. శంషాబాద్ పరిధిలోని కొత్వాల్గూడలో సర్వే నంబర్ 62, 63 పరిధిలో రాఘవ కన్స్ట్రక్షన్స్ ఎటువంటి అనుమతులు లేకుండా కొండలను పిండి చేస్తోందని ఆరోపించారు. మైనింగ్ శాఖ స్వయంగా నోటీసులు జారీ చేసినా, మంత్రి అండదండలతో ఆ సంస్థ కార్యకలాపాలు నిర్విఘ్నంగా కొనసాగుతున్నాయని విమర్శించారు. “ఒకవైపు సామాన్యులకు ఒక చట్టం, మంత్రులకు మరో చట్టమా? ప్రతిపక్ష ఎమ్మెల్యే గూడెం మహిపాల్ రెడ్డి సోదరుడిని అర్థరాత్రి అరెస్ట్ చేసిన ప్రభుత్వం, సొంత మంత్రిపై వచ్చిన ఆధారాలను ఎందుకు తొక్కి పెడుతోంది?” అని ఆయన నిలదీశారు. దీనిపై తక్షణమే హౌస్ కమిటీ వేయాలని, అప్పటి వరకు సభను సాగనివ్వబోమని బీఆర్ఎస్ సభ్యులు పట్టుబట్టారు. సభ్యులంతా స్పీకర్ వెల్లోకి దూసుకెళ్లి ప్లకార్డులతో నిరసన తెలపడం, చప్పట్లు కొడుతూ నినాదాలు చేయడంతో సభాపతి అసహనం వ్యక్తం చేశారు.
ఈ క్రమంలో ఉప ముఖ్యమంత్రి మల్లు భట్టి విక్రమార్క జోక్యం చేసుకుంటూ ప్రతిపక్ష సభ్యుల తీరును తప్పుబట్టారు. సభలో చర్చలు జరగాలే తప్ప అల్లరి చేయడం సంప్రదాయం కాదని హితవు పలికారు. మంత్రి పొంగులేటి శ్రీనివాస్ రెడ్డి తనపై వస్తున్న ఆరోపణలను ఖండించడమే కాకుండా, తాము ఏ విచారణకైనా సిద్ధమని ప్రకటించారు. అయితే, చర్చ జరుగుతున్న సమయంలో ముఖ్యమంత్రి రేవంత్ రెడ్డి జోక్యం చేసుకోవడంతో వాతావరణం మరింత వేడెక్కింది. ప్రతిపక్షం చేస్తున్న ఆరోపణలు కేవలం బ్లాక్ మెయిలింగ్ తంత్రమేనని ముఖ్యమంత్రి కొట్టిపారేశారు. రాఘవ కన్స్ట్రక్షన్స్ వ్యవహారంపై మాత్రమే కాకుండా, రాష్ట్రం ఏర్పడిన నాటి నుంచి అంటే 2014 జూన్ 2 నుంచి జరిగిన అన్ని మైనింగ్, ఇసుక అక్రమాలపై సీబీసీఐడీ (CBCID) చేత సమగ్ర విచారణ జరిపిస్తామని ఆయన ప్రకటించారు.
గత ప్రభుత్వ హయాంలో బీఆర్ఎస్ నేతలు గంగుల కమలాకర్, వద్దిరాజు రవిచంద్ర వంటి వారు మైనింగ్ మాఫియాను ఎలా నడిపారో తమ వద్ద సమాచారం ఉందని సీఎం పేర్కొన్నారు. మాజీ ముఖ్యమంత్రి బంధువులైన సంతోశ్ రావు, రవీందర్ రావుల ఇసుక దందాలను కూడా వదిలిపెట్టేది లేదని ఆయన హెచ్చరించారు. “ఒక సంస్థపై విచారణ కోరినందుకు సంతోషం.. కానీ ఇప్పుడు పదేళ్ల పాపాలన్నీ బయటకు వస్తాయి. ఎవరు ఎన్ని వేల కోట్లు దోచుకున్నారో, ఏ కొండలను గుట్టలను మింగేశారో నివేదికలు చెబుతాయి” అని రేవంత్ రెడ్డి వ్యాఖ్యానించారు. వచ్చే అసెంబ్లీ సమావేశాల నాటికే ఈ విచారణ నివేదికను సభ ముందు ఉంచుతామని ఆయన స్పష్టం చేశారు. ప్రభుత్వ ప్రకటనతో విస్తుపోయిన ప్రతిపక్ష సభ్యులు, తమ డిమాండ్ అయిన హౌస్ కమిటీని పక్కన పెట్టి దర్యాప్తు సంస్థతో విచారణ జరిపించడంపై అసంతృప్తి వ్యక్తం చేశారు. మొత్తం మీద, పొంగులేటి సంస్థపై మొదలైన వివాదం ఇప్పుడు తెలంగాణలోని మైనింగ్ మాఫియా మూలాలను వెలికితీసే దిశగా మలుపు తిరిగింది.
