- విమానయాన దిగ్గజం చేతికి నూతన సారథ్యం.
- ఏవియేషన్లో సరికొత్త మార్పులే లక్ష్యం.
ఢిల్లీ, మహా.
దేశీయ విమానయాన రంగంలో అగ్రగామి సంస్థగా వెలుగొందుతున్న ఇండిగో (ఇంటర్గ్లోబ్ ఏవియేషన్) నూతన చీఫ్ ఎగ్జిక్యూటివ్ ఆఫీసర్ (సీఈఓ)గా అంతర్జాతీయ వైమానిక రంగ నిపుణుడు విలియమ్ వాల్ష్ను నియమించింది. గతంలో బ్రిటిష్ ఎయిర్వేస్, ఇంటర్నేషనల్ ఎయిర్లైన్స్ గ్రూప్ (ఐఏజీ) వంటి ప్రపంచ స్థాయి సంస్థలకు సారథ్యం వహించిన అపార అనుభవం ఆయన సొంతం. ఈ ప్రతిష్ఠాత్మక బాధ్యతలు చేపట్టడంపై విలియమ్ వాల్ష్ హర్షం వ్యక్తం చేస్తూ, ఇండిగో పునాదులు అత్యంత పటిష్టంగా ఉన్నాయని కొనియాడారు. ప్రస్తుతం ప్రపంచవ్యాప్తంగా ఏవియేషన్ రంగం కీలక మార్పులకు లోనవుతున్న తరుణంలో, అగ్రగామిగా నిలిచేందుకు ఇండిగోకు మెండుగా అవకాశాలు ఉన్నాయని ఆయన అభిప్రాయపడ్డారు. సంస్థ అభివృద్ధిలో భాగస్వామ్యం వహిస్తూ సిబ్బందితో కలిసి పనిచేసేందుకు తాను ఉత్సుకతతో ఉన్నానని ఈ సందర్భంగా ఆయన పేర్కొన్నారు.
విలియమ్ వాల్ష్ నియామకంపై ఇండిగో చైర్మన్ విక్రమ్ సింగ్ మెహతా తన సంతోషాన్ని వ్యక్తం చేశారు. వైమానిక రంగంలో ఆయనకున్న అసమానమైన నాయకత్వ లక్షణాలు, అద్భుతమైన ట్రాక్ రికార్డు సంస్థను మరింత ఉన్నత స్థానానికి తీసుకెళ్తాయని ఆయన ఆశాభావం వ్యక్తం చేశారు. ఇండిగోను భవిష్యత్తు సవాళ్ల దిశగా నడిపించేందుకు వాల్ష్ అన్ని విధాలా యోగ్యుడని కొనియాడారు. సంస్థ మేనేజింగ్ డైరెక్టర్ రాహుల్ భాటియా సైతం విలియమ్ ఎంపికను స్వాగతించారు. అంతర్జాతీయ స్థాయిలో విమానయాన రంగంలో వస్తున్న పెను మార్పులను అందిపుచ్చుకోవడంలో వాల్ష్ అనుభవం సంస్థకు కీలక ఆస్తిగా మారుతుందని యాజమాన్యం ధీమా వ్యక్తం చేస్తోంది. వాల్ష్ రాకతో ఇండిగో తన మార్కెట్ విస్తరణను మరింత వేగవంతం చేసే దిశగా అడుగులు వేయనుంది.
