వికసిత భారత్ దిశగా ‘జన్ విశ్వాస్’ విప్లవం: వెయ్యికి పైగా నేరాల నుంచి పౌరులకు విముక్తి!

* చట్టాలంటే భయం వద్దు.. నమ్మకం పెరగాలి.
* ‘జన్‌ విశ్వాస్‌’ బిల్లుకు పార్లమెంటు ఆమోదం!
* వ్యాపారాలకు విముక్తి.. సామాన్యులకు ఊరట.
* వేయికి పైగా నేరాల్లో శిక్షల తొలగింపు!
* బ్రిటిష్ కాలం నాటి నిబంధనలకు చెల్లుచీటి..
* విప్లవాత్మక రీతిలో 79 కేంద్ర చట్టాల సవరణ!
* మోదీ మార్క్ ‘ట్రస్ట్‌ బేస్డ్ గవర్నెన్స్‌’.
* నేర ముద్ర నుంచి పౌరులకు విముక్తి కల్పిస్తూ చారిత్రక నిర్ణయం!
* వికసిత భారత్ దిశగా మరో అడుగు.
* ఇక తప్పు చేస్తే జైలు కాదు.. హెచ్చరికలు, జరిమానాలే!
ఢిల్లీ, మహా.
ప్రధాని నరేంద్ర మోదీ నేతృత్వంలోని కేంద్ర ప్రభుత్వం దేశ పాలనా వ్యవస్థలో మరో భారీ సంస్కరణకు శ్రీకారం చుట్టింది. పౌరులు మరియు వ్యాపారవేత్తలపై ఉన్న అనవసరపు చట్టపరమైన భారాలను తొలగిస్తూ, పరిపాలనలో నమ్మకాన్ని పెంపొందించే దిశగా ‘జన్ విశ్వాస్ (నిబంధనల సవరణ) బిల్లు 2026’కు సభ ఆమోదముద్ర వేసింది. దేశ ఆర్థిక వ్యవస్థకు ఇంధనం లాంటి వ్యాపార వర్గాలను, సామాన్య పౌరులను చిన్నపాటి పొరపాట్లకు కూడా క్రిమినల్స్‌గా చూసే పాతకాలపు పద్ధతులకు ఈ బిల్లు స్వస్తి పలకనుంది. ముఖ్యంగా బ్రిటీష్ కాలం నాటి కాలం చెల్లిన నిబంధనలను పక్కన పెట్టి, ఆధునిక భారత్ అవసరాలకు అనుగుణంగా చట్టాలను తీర్చిదిద్దడమే ఈ బిల్లు ప్రధాన ఉద్దేశ్యం. 2023లో ప్రారంభమైన ఈ సంస్కరణల పరంపరను 2026 బిల్లు మరింత ఉన్నత స్థాయికి తీసుకువెళ్లింది.
ఈ చారిత్రక సంస్కరణ ద్వారా ఏకంగా 23 కేంద్ర మంత్రిత్వ శాఖలకు సంబంధించిన 79 చట్టాల్లోని 784 నిబంధనలను సవరించారు. దీని ఫలితంగా వెయ్యికి పైగా చిన్నపాటి ఉల్లంఘనలను నేరాల జాబితా నుంచి తొలగించారు. గతంలో కాపీరైట్ రిజిస్టర్‌లో చిన్నపాటి తప్పులు జరిగినా జైలు శిక్ష విధించే నిబంధన ఉండేది, దాన్ని ఇప్పుడు పూర్తిగా తొలగించారు. అలాగే టీ యాక్ట్ వంటి చట్టాల్లో తొలిసారి పొరపాటు చేస్తే కేవలం హెచ్చరికతో సరిపెట్టేలా, ఆ తర్వాత కూడా ఉల్లంఘనలు కొనసాగితేనే జరిమానా విధించేలా మార్పులు చేశారు. అంటే, ప్రభుత్వం పౌరులను అనుమానంతో కాకుండా నమ్మకంతో చూసే ‘ట్రస్ట్ బేస్డ్ గవర్నెన్స్’ శకానికి ఇది నాంది పలికింది. జైలు శిక్షలు మరియు భారీ జరిమానాల భయం లేకపోవడం వల్ల దేశంలో వ్యాపార నిర్వహణ మరింత సులభతరం కానుంది.
ఈ బిల్లు నాలుగు ప్రధాన స్తంభాలపై ఆధారపడి రూపొందించబడింది. మొదటిది శిక్షకు ముందు హెచ్చరిక ఇవ్వడం, రెండోది నేరం తీవ్రతకు తగినట్లుగా మాత్రమే జరిమానా విధించడం, మూడోది కోర్టుల చుట్టూ తిరగాల్సిన అవసరం లేకుండా స్వతంత్ర అధికారుల ద్వారా వివాదాలను త్వరగా పరిష్కరించడం, నాలుగోది మారుతున్న కాలానికి అనుగుణంగా జరిమానా నిబంధనలను సమీక్షించడం. ఇలాంటి సంస్కరణల వల్ల న్యాయస్థానాలపై భారం తగ్గడమే కాకుండా, పౌరుల జీవన ప్రమాణాలు కూడా మెరుగుపడతాయని ప్రభుత్వం విశ్వసిస్తోంది. మొత్తం మీద, పౌరులను సాధికారత వైపు నడిపిస్తూ, పారిశ్రామికవేత్తలకు భరోసా కల్పిస్తూ వికసిత భారత్ లక్ష్యానికి ఈ జన్ విశ్వాస్ బిల్లు ఒక బలమైన పునాదిగా నిలవనుంది.