అస్సాం నుంచి చొరబాటుదారుల ఏరివేతే లక్ష్యం: యూసీసీతో అక్రమ వివాహాలకు చెక్ పెడతామన్న అమిత్ షా!

అస్సాం విముక్తికి మరో ఐదేళ్లు ఇవ్వండి.
* గిరిజన మహిళల రక్షణే మా ప్రాధాన్యం.
* ‘యూసీసీ’తో అక్రమ వివాహాలకు బ్రేక్!
* చొరబాటుదారులను ఏరివేస్తామన్న కేంద్ర హోంమంత్రి అమిత్ షా.
గోల్‌పాడా, ఏప్రిల్ 3: అస్సాం గడ్డపై అక్రమ చొరబాటుదారుల ఆగడాలకు కాలం చెల్లిందని, వారిని రాష్ట్రం నుంచి తరిమికొట్టడమే తమ అంతిమ లక్ష్యమని కేంద్ర హోంమంత్రి అమిత్ షా ఉద్ఘాటించారు. అస్సాం అసెంబ్లీ ఎన్నికల ప్రచారంలో భాగంగా గోల్‌పాడా జిల్లాలో నిర్వహించిన భారీ బహిరంగ సభలో ఆయన ప్రసంగిస్తూ కాంగ్రెస్‌పై నిప్పులు చెరిగారు. చొరబాటుదారులు ఇక్కడి గిరిజన మహిళలను వివాహం చేసుకుని రాజకీయ పలుకుబడి సంపాదించాలని చూస్తున్నారని, ఇలాంటి అక్రమాలకు ఉమ్మడి పౌరస్మృతి (యూసీసీ) ద్వారా అడ్డుకట్ట వేస్తామని స్పష్టం చేశారు. అస్సాంలో యూసీసీని అమలు చేయడం ద్వారా చొరబాటుదారులు ఒకటి కంటే ఎక్కువ వివాహాలు చేసుకునే వెసులుబాటు లేకుండా చేస్తామని, తద్వారా స్థానిక సంస్కృతిని, డెమోగ్రఫీని కాపాడుతామని భరోసా ఇచ్చారు.
గిరిజన ప్రాంతాల్లో యూసీసీని బలవంతంగా రుద్దుతామంటూ కాంగ్రెస్ చేస్తున్న తప్పుడు ప్రచారాన్ని ప్రజలు నమ్మవద్దని అమిత్ షా కోరారు. ప్రధాని మోదీ నాయకత్వంలో గిరిజనుల అభివృద్ధి కోసం అద్భుతమైన రోడ్ మ్యాప్ సిద్ధమైందని, ఒక గిరిజన మహిళను దేశ ప్రథమ పౌరురాలిగా (రాష్ట్రపతి) చేసిన ఘనత బీజేపీకే దక్కుతుందని ఈ సందర్భంగా గుర్తు చేశారు. పొరుగున ఉన్న మేఘాలయలో ఇటీవల తలెత్తిన ఉద్రిక్తతలను ప్రస్తావిస్తూ.. చొరబాటుదారుల అక్రమ వివాహాల వల్ల స్థానిక ప్రజల హక్కులు, రాజకీయ ఉనికి హరించుకుపోతున్నాయని ఆందోళన వ్యక్తం చేశారు. కేవలం ఓటు బ్యాంకు రాజకీయాల కోసమే కాంగ్రెస్ ఈ సమస్యను విస్మరిస్తోందని మండిపడ్డారు.
రాబోయే ఐదేళ్లలో అస్సాంను అక్రమ చొరబాటుదారుల నుంచి పూర్తిగా విముక్తం చేసేందుకు తమకు మరో అవకాశం ఇవ్వాలని అమిత్ షా ప్రజలకు విజ్ఞప్తి చేశారు. అక్రమ వలసల విషయంలో తమ ప్రభుత్వం అత్యంత కఠినంగా వ్యవహరిస్తుందని, రాష్ట్ర సరిహద్దులను మరింత పటిష్టం చేస్తామని హామీ ఇచ్చారు. చొరబాటుదారుల బెడద లేని అస్సాంను నిర్మించడమే తమ సంకల్పమని, బీజేపీ అధికారంలోకి వస్తే రాష్ట్ర అస్తిత్వాన్ని, గిరిజన సంస్కృతిని కాపాడేందుకు కట్టుబడి ఉన్నామని ఆయన పునరుద్ఘాటించారు.