సౌరశక్తి నిల్వ.. సింగరేణికి సిరుల పంట.
*తొలిసారిగా ‘బీఈఎస్ఎస్’తో అద్భుత ప్రయోగాన్ని విజయవంతం చేసిన సింగరేణి.
* నాలుగు నెలల్లోనే రూ. 26 లక్షల ఆదా.
* పునరుత్పాదక ఇంధన రంగంలో సరికొత్త మైలురాయి.
హైదరాబాద్, మహా.
తెలంగాణ ప్రభుత్వ దూరదృష్టి, ముఖ్యమంత్రి ఎ. రేవంత్ రెడ్డి , ఉప ముఖ్యమంత్రి, ఇంధన శాఖ మంత్రి భట్టి విక్రమార్క మల్లుల చొరవతో సింగరేణి కాలరీస్ కంపెనీ లిమిటెడ్ (ఎస్సీసీఎల్) పునరుత్పాదక ఇంధన రంగంలో సరికొత్త సంచలనం సృష్టించింది. రాష్ట్రంలోనే తొలిసారిగా ప్రయోగాత్మకంగా ఏర్పాటు చేసిన ‘బ్యాటరీ ఎనర్జీ స్టోరేజీ సిస్టమ్’ ఊహించిన దానికంటే అద్భుతమైన సత్ఫలితాలను ఇస్తోంది. పగటిపూట ఉత్పత్తి అయ్యే మిగులు సౌర విద్యుత్తును ఉచితంగా గ్రిడ్కు వదిలేయకుండా, దానిని సమర్థవంతంగా నిల్వ చేసుకునే ఈ వినూత్న వ్యవస్థ ఇప్పుడు సింగరేణికి ఆర్థికంగానూ భారీ లాభాలను తెచ్చిపెడుతోంది.
**నిల్వ చేసుకుంటే.. నిధుల లాభం!**
సింగరేణి సంస్థ ఇప్పటికే రాష్ట్రవ్యాప్తంగా ఎనిమిది ప్రాంతాల్లో 245.5 మెగావాట్ల సామర్థ్యం గల భారీ సోలార్ ప్లాంట్లను ఏర్పాటు చేసింది. ఇందులో 147 మెగావాట్లు ‘ఓపెన్ యాక్సెస్’ ప్లాంట్లు కాగా, 98.50 మెగావాట్లు ‘ఇన్-హౌజ్’ ప్లాంట్లుగా ఉన్నాయి. అయితే, విద్యుత్ ఒప్పందాల ప్రకారం.. ఇన్-హౌజ్ ప్లాంట్ల నుంచి స్థానిక అవసరాలకు వాడగా మిగిలిన విద్యుత్తును డిస్కం గ్రిడ్లకు ఉచితంగానే సరఫరా చేయాల్సి వచ్చేది. దీనివల్ల వేలాది యూనిట్ల మిగులు విద్యుత్తు వృథాగా పోయేది. ఈ నష్టాన్ని అధిగమించి, ఆ మిగులు విద్యుత్తును సైతం సొమ్ము చేసుకోవాలన్న లక్ష్యంతో రాష్ట్ర ప్రభుత్వం సింగరేణిని ‘బీఈఎస్ఎస్’ దిశగా ప్రోత్సహించింది.
**మందమర్రిలో విజయవంతమైన ప్రయోగం**
ప్రభుత్వ ఆదేశాల మేరకు, మందమర్రి ఏరియాలోని 28 మెగావాట్ల సోలార్ ప్లాంట్కు అనుబంధంగా సింగరేణి యాజమాన్యం రూ. 2.5 కోట్ల వ్యయంతో 1 మెగావాట్ సామర్థ్యం గల ‘బీఈఎస్ఎస్’ యూనిట్ను ఈ ఏడాది జనవరిలో నెలకొల్పింది. మందమర్రి, శ్రీరాంపూర్ ఏరియాల్లోని గనులు, కాలనీల అవసరాలు తీరగా మిగిలే విద్యుత్తును వృథా చేయకుండా ఈ బ్యాటరీలలో నిల్వ చేయడం ప్రారంభించారు. అప్పటి నుంచి కేవలం నాలుగు నెలల వ్యవధిలోనే ఈ యూనిట్ 3,35,485 యూనిట్ల విద్యుత్తును నిల్వ చేసి, అవసరమైన సమయాల్లో వినియోగంలోకి తెచ్చింది. తద్వారా సింగరేణికి రూ. 25,66,460 మేర ప్రత్యక్ష ఆర్థిక లబ్ధి చేకూరింది.
**పునరుత్పాదక ఇంధనానికి బాటలు**
ఒక్క మెగావాట్ సామర్థ్యం గల ఒక చిన్న బ్యాటరీ వ్యవస్థ ద్వారా ఇంతటి ఆర్థిక ప్రయోజనం చేకూరడంపై సింగరేణి యాజమాన్యం హర్షం వ్యక్తం చేస్తోంది. పునరుత్పాదక ఇంధన వనరులను ప్రోత్సహించాలన్న ప్రభుత్వ లక్ష్యానికి అనుగుణంగా, భవిష్యత్తులో మరిన్ని ప్రాంతాల్లో ఇలాంటి అత్యాధునిక బ్యాటరీ నిల్వ కేంద్రాలను ఏర్పాటు చేసేందుకు సంస్థ సిద్ధమవుతోంది. విద్యుత్ వృథాను అరికడుతూనే, నిల్వ సామర్థ్యాన్ని పెంచుకోవడం ద్వారా ‘గ్రీన్ ఎనర్జీ’ వైపు సింగరేణి వేస్తున్న అడుగులు, రానున్న రోజుల్లో సంస్థను మరింత ఆర్థికంగా బలోపేతం చేయడమే కాకుండా, పర్యావరణ పరిరక్షణలోనూ ఆదర్శంగా నిలవనున్నాయి.
