డీలిమిటేషన్పై భగ్గుమన్న రాజకీయం.
* నారా లోకేష్ లెక్కలు సరిచేసుకోవాలన్న చిదంబరం, షర్మిల.
*ఎన్డీఏకు వంతపాడుతున్నారంటూ మంత్రి లోకేష్పై విపక్షాల ఫైర్.
*జనాభా నియంత్రణ దక్షిణాదికి శాపమా?
* ఆర్టికల్ 81పై ఎక్స్ వేదికగా లోకేష్ వర్సెస్ కాంగ్రెస్ వార్.
హైదరాబాద్, మహా.
దేశ రాజకీయ ముఖచిత్రాన్ని సమూలంగా మార్చేయగల ‘నియోజకవర్గాల పునర్విభజన’ (డీలిమిటేషన్) అంశంపై ఇప్పుడు జాతీయ స్థాయిలో తీవ్ర చర్చ రగులుతోంది. ముఖ్యంగా దక్షిణాది రాష్ట్రాల ప్రాతినిధ్యంపై కేంద్ర మాజీ మంత్రి పీ. చిదంబరం, ఏపీసీసీ అధ్యక్షురాలు వైఎస్ షర్మిల, ఏపీ మంత్రి నారా లోకేష్ మధ్య సామాజిక మాధ్యమం ఎక్స్ (X) వేదికగా మాటల యుద్ధం నడుస్తోంది. 2026 జనాభా లెక్కల తర్వాత జరిగే పునర్విభజనలో దక్షిణాది రాష్ట్రాలు తమ రాజకీయ ప్రాధాన్యతను కోల్పోతాయనే ఆందోళనల నేపథ్యంలో, ఎన్డీఏ ప్రభుత్వ నిర్ణయాలను సమర్థిస్తూ లోకేష్ చేసిన వ్యాఖ్యలకు కాంగ్రెస్ సీనియర్ నేతలు దీటైన కౌంటర్లు ఇచ్చారు. ఒకసారి లెక్కలు సరిచేసుకోవాలంటూ లోకేష్కు చిదంబరం చురకలంటించగా, అసలు సమస్యను పక్కదోవ పట్టిస్తున్నారంటూ షర్మిల తీవ్రస్థాయిలో ధ్వజమెత్తారు.
**’లెక్కలు సరిచేసుకో మిత్రమా**
ఆర్టికల్ 81 ప్రకారం లోక్సభ సీట్ల కేటాయింపుపై నారా లోకేష్ చేసిన వ్యాఖ్యలను కాంగ్రెస్ సీనియర్ నేత పి. చిదంబరం తీవ్రంగా తప్పుపట్టారు. “నా యువ మిత్రుడు నారా లోకేష్ డీలిమిటేషన్ లెక్కలను మరోసారి సరిచేసుకోవాలి” అని ఆయన ఎక్స్ వేదికగా హితవు పలికారు. ఆర్టికల్ 81ని యథాతథంగా అమలు చేస్తే, ఆంధ్రప్రదేశ్కు లోక్సభ స్థానాలు పెరిగినప్పటికీ, జాతీయ స్థాయిలో దాని సాపేక్ష ప్రాతినిధ్యం (రిలేటివ్ రిప్రజెంటేషన్) ఖచ్చితంగా తగ్గిపోతుందని ఆయన స్పష్టం చేశారు. జనాభాను విజయవంతంగా నియంత్రించిన దక్షిణాది రాష్ట్రాలకు ఆ విషయమే రాజకీయ ప్రతికూలతగా మారకూడదనే ఉద్దేశ్యంతోనే డీలిమిటేషన్ ప్రతిపాదనను తాము గట్టిగా వ్యతిరేకిస్తున్నామని చిదంబరం కుండబద్దలు కొట్టారు.
**గందరగోళం సృష్టిస్తున్న లోకేష్**
చిదంబరం వ్యాఖ్యలకు ఏపీసీసీ అధ్యక్షురాలు వైఎస్ షర్మిల జతకలిశారు. ఏపీ మంత్రి నారా లోకేష్ ఉద్దేశపూర్వకంగానే లేని గందరగోళాన్ని సృష్టిస్తున్నారని ఆమె విమర్శించారు. జనాభా నియంత్రణను సమర్థవంతంగా అమలు చేసినందుకు దక్షిణాది రాష్ట్రాలను శిక్షించకూడదని కాంగ్రెస్ పార్టీ మొదటి నుంచి స్పష్టమైన వైఖరితో ఉందని ఆమె గుర్తుచేశారు. రాజ్యాంగపరమైన పక్కా గ్యారెంటీలు లేకుండా, పార్లమెంట్లో దక్షిణాది రాష్ట్రాల గొంతును నొక్కేసే ఏ పునర్విభజన ప్రణాళికనైనా కాంగ్రెస్ తీవ్రంగా వ్యతిరేకిస్తుందని ఆమె తేల్చిచెప్పారు. కేవలం లోక్సభ సీట్ల సంఖ్యను పెంచడం వల్ల దక్షిణాది రాష్ట్రాలకు రక్షణ దక్కదని, అధిక జనాభా ఉన్న ఉత్తరాది రాష్ట్రాలతో పోల్చినప్పుడు దామాషా ప్రకారం దక్షిణాది బలం తగ్గిపోవడమే ఇక్కడ ఉన్న అసలు సమస్య అని షర్మిల వివరించారు. ఒకప్పుడు ఫెడరలిజం కోసం పోరాడిన టీడీపీ, నేడు దక్షిణాదికి స్పష్టమైన రక్షణలు కోరకుండానే బీజేపీ వైఖరిని సమర్థించడం దారుణమని ఆమె ఆరోపించారు.
**కాంగ్రెస్ది కేవలం రాజకీయ డ్రామా**
వీరి విమర్శల కంటే ముందు, డీలిమిటేషన్ బిల్లును కాంగ్రెస్ వ్యతిరేకించడాన్ని నారా లోకేష్ సూటిగా ప్రశ్నించారు. 1971 జనాభా లెక్కల ఆధారంగా ఉన్న ఆర్టికల్ 81 ఫ్రీజ్ 2026 తర్వాత ముగియనుందని, అప్పుడు పునర్విభజన అనివార్యమని ఆయన స్పష్టం చేశారు. కేవలం జనాభా ప్రాతిపదికన సీట్ల పంపిణీ జరిగితే ఉత్తరాది రాష్ట్రాలతో పోలిస్తే ప్రతి దక్షిణాది రాష్ట్రం తమ ప్రాతినిధ్యాన్ని కోల్పోతుందనే ఆందోళన ఉందని, అయితే ఎన్డీఏ ప్రభుత్వం ఈ సమస్యను పరిష్కరించేందుకు అన్ని రాష్ట్రాలకు దామాషా ప్రకారం సీట్లు పెంచే ప్రతిపాదన తెచ్చిందని లోకేష్ వాదించారు. అయినప్పటికీ కాంగ్రెస్ పార్టీ పార్లమెంట్లో డీలిమిటేషన్ బిల్లును ఎందుకు వ్యతిరేకించిందని ఆయన నిలదీశారు. కేవలం రాజకీయ ప్రయోజనాల కోసమే కాంగ్రెస్ ఈ అంశంపై డ్రామాలు ఆడుతోందని ఆయన విమర్శించారు.
**తేలాల్సిన అసలు సమస్య.. ప్రజలకు దక్కాల్సిన జవాబు**
ఆర్టికల్ 81 కింద 2026 జనాభా లెక్కల తర్వాత ఏం జరుగుతుందో కాంగ్రెస్ నాయకత్వం ప్రజలకు స్పష్టం చేయాలని లోకేష్ డిమాండ్ చేశారు. ఉత్తరాది రాష్ట్రాలతో పోలిస్తే దక్షిణాది రాష్ట్రాలు నిజంగానే తమ సాపేక్ష ప్రాతినిధ్యాన్ని కోల్పోతాయా లేదా అన్నదానిపై కాంగ్రెస్ స్పష్టమైన సమాధానం చెప్పాలన్నారు. దక్షిణాది భవిష్యత్తుపై కాంగ్రెస్ తన వైఖరిని కుండబద్దలు కొట్టాలని ఆయన కోరారు. మొత్తం మీద డీలిమిటేషన్ వ్యవహారంలో జనాభా నియంత్రణ సాధించిన రాష్ట్రాలకు అన్యాయం జరగకుండా ఎలాంటి రాజ్యాంగబద్ధమైన హామీలు లభిస్తాయన్న దానిపైనే ఇప్పుడు రాజకీయ పార్టీల మధ్య భిన్న వాదనలు వినిపిస్తున్నాయి.
