తెలంగాణలో ‘హీట్ వేవ్’ విలయం.
* రాష్ట్రవ్యాప్తంగా హై అలర్ట్.
* వడదెబ్బ మృతులకు రూ.4 లక్షల ఎక్స్గ్రేషియా.
* ఎండల తీవ్రతపై సచివాలయంలో అత్యవసర సమీక్ష.
* వచ్చే మూడు రోజులు మరింత డేంజర్.
* వడగాల్పులకు 16 మంది బలి.
* గంట గంటకు హెచ్చరికల జారీ.
* కలెక్టర్లకు మంత్రి పొంగులేటి శ్రీనివాసరెడ్డి అల్టిమేటం.
హైదరాబాద్, మహా.
రాష్ట్రవ్యాప్తంగా అసాధారణ స్థాయిలో పెరుగుతున్న ఉష్ణోగ్రతలు, తీవ్రస్థాయి ఎల్నినో ప్రభావం వల్ల తలెత్తిన వడగాల్పుల పరిస్థితుల నేపథ్యంలో తెలంగాణ ప్రభుత్వం అత్యంత కీలకమైన నిర్ణయం తీసుకుంది. ఉమ్మడి రాష్ట్రవ్యాప్తంగా ‘హీట్ వేవ్’ పై హై అలర్ట్ ప్రకటించినట్లు రాష్ట్ర రెవెన్యూ, సమాచార , పౌర సంబంధాల శాఖ మంత్రి పొంగులేటి శ్రీనివాసరెడ్డి శనివారం నాడు స్పష్టం చేశారు. రాష్ట్రంలో రోజురోజుకూ మండుతున్న ఎండల తీవ్రతపై ఆయన హైదరాబాద్ సచివాలయంలో ఉన్నతాధికారులతో ఒక అత్యవసర సమీక్షా సమావేశాన్ని నిర్వహించి, క్షేత్రస్థాయి పరిస్థితులపై జిల్లాల వారీగా నివేదికలను క్షుణ్ణంగా పరిశీలించారు. ఈ సందర్భంగా మంత్రి పొంగులేటి మాట్లాడుతూ, రాష్ట్రంలోని వివిధ కలెక్టర్ల నివేదికల ప్రకారం ప్రస్తుత వేసవి కాలంలో వడదెబ్బకు గురై 7 జిల్లాల పరిధిలో మొత్తం 16 మంది ప్రాణాలు కోల్పోవడం అత్యంత బాధాకరమని ఆవేదన వ్యక్తం చేశారు. ముఖ్యమంత్రి ఎ. రేవంత్ రెడ్డి ఆదేశాలు మరియు సూచనల మేరకు, మరణించిన సదరు 16 మంది మృతుల కుటుంబాలకు ప్రభుత్వం తరఫున తక్షణ సహాయంగా రూ.4 లక్షల చొప్పున భారీ ఎక్స్గ్రేషియా (నష్టపరిహారం) మంజూరు చేస్తున్నట్లు ఆయన అధికారికంగా ప్రకటించారు. ఇందుకు సంబంధించిన పరిహార పంపిణీ ప్రక్రియను జిల్లా అధికారులు త్వరితగతిన పూర్తి చేసి బాధితులకు అందజేయాలని ఆదేశించారు.
భారత వాతావరణ శాఖ హెచ్చరికల ప్రకారం రాబోయే మూడు రోజుల పాటు రాష్ట్రంలో వడగాల్పుల ప్రభావం మరింత తీవ్రంగా ఉండనుందని మంత్రి పొంగులేటి ఈ సందర్భంగా వెల్లడించారు. ముఖ్యంగా కరీంనగర్, పెద్దపల్లి, జయశంకర్ భూపాలపల్లి, ములుగు, ఖమ్మం, నల్గొండ, సూర్యాపేట, మహబూబ్నగర్, రంగారెడ్డి మరియు హైదరాబాద్ వంటి తీవ్ర ప్రభావం ఉన్న జిల్లాల కలెక్టర్లు, అధికార యంత్రాంగం నిరంతరం అత్యంత అప్రమత్తంగా ఉంటూ రక్షణ చర్యలు చేపట్టాలని మార్గనిర్దేశం చేశారు. ప్రజల ప్రాణ రక్షణే తమ కాంగ్రెస్ ప్రభుత్వ తొలి ప్రాధాన్యమని, ఎండల తీవ్రత వల్ల రాష్ట్రంలో ఇకపై ఒక్క ప్రాణం కూడా కోల్పోకూడదనే దృఢ సంకల్పంతో పనిచేయాలని అధికారులకు స్పష్టమైన ఆదేశాలు జారీ చేశారు. ఎండల ముప్పు ఎక్కువగా ఉన్న గ్రామాలను ముందుగానే గుర్తించి, స్థానిక మీడియా, సామాజిక మాధ్యమాలు మరియు ప్రజా ప్రతినిధుల ద్వారా ప్రజలకు గంట గంటకు హెచ్చరికలు, అవగాహన సమాచారాన్ని జారీ చేసేలా చర్యలు తీసుకున్నామని మంత్రి వివరించారు.
తీవ్రమైన ఎండ దెబ్బ నుండి తట్టుకోవడానికి ప్రజలంతా స్వీయ జాగ్రత్తలు పాటించాలని మంత్రి పొంగులేటి విజ్ఞప్తి చేశారు. ముఖ్యంగా ఉదయం 11:00 గంటల నుండి సాయంత్రం 4:00 గంటల వరకు అత్యవసరమైతే తప్ప సామాన్య ప్రజలెవరూ బయటకు రావొద్దని గట్టిగా సూచించారు. ఈ పీక్ అవర్స్లో వృద్ధులు, గర్భిణులు, చిన్నపిల్లలు మరియు అనారోగ్యంతో బాధపడుతున్న వారు ఇంటికే పరిమితమై ప్రత్యేక రక్షణ జాగ్రత్తలు తీసుకోవాలని దిశానిర్దేశం చేశారు. ఎండలోనే శ్రమించాల్సి వచ్చే వ్యవసాయ కార్మికులు, భవన నిర్మాణ కార్మికులు మరియు రోడ్డు కార్మికుల రక్షణ కోసం ఉపాధి హామీ పనుల వేళల్లో మార్పులు చేయడంతో పాటు, ఆయా పని స్థలాల వద్ద నీడ సౌకర్యం కల్పించాలని ఆదేశించారు. అత్యవసర చర్యల్లో భాగంగా రాష్ట్రంలోని అన్ని బస్టాండ్లు, ప్రధాన మార్కెట్లు, కూడళ్లు, కార్మికులు ఎక్కువగా గుమిగూడే ప్రాంతాలలో ప్రభుత్వం తరఫున ఉచిత తాగునీరు, మజ్జిగ కేంద్రాలు మరియు ఓఆర్ఎస్ ప్యాకెట్లను నిరంతరం అందుబాటులో ఉంచాలని స్పష్టం చేశారు.
గ్రామస్థాయి నుండి మున్సిపాలిటీల వరకు ప్రభుత్వ ఉద్యోగులంతా క్షేత్రస్థాయిలోనే ఉండి ఈ నివారణ చర్యలను పర్యవేక్షించాలని మంత్రి ఆదేశించారు. ఒకవేళ ఎవరైనా ఎండదెబ్బకు గురైతే, ఆయా పరిధిలోని ప్రాథమిక ఆరోగ్య కేంద్రాల నుండి జిల్లా ప్రధాన ఆసుపత్రుల వరకు వైద్య సిబ్బంది ఎల్లప్పుడూ సిద్ధంగా ఉండి వారికి తక్షణమే అత్యవసర వైద్య చికిత్స అందించాలని స్పష్టమైన ఉత్తర్వులు జారీ చేశారు. మానవ ప్రాణాలతో పాటు గ్రామీణ, పట్టణ ప్రాంతాలలో మూగజీవాలు, పక్షుల దాహార్తిని తీర్చేందుకు వీలుగా వీధులు, చెరువుల వద్ద నీటి తొట్లను మట్టి పాత్రలను ఏర్పాటు చేసి వాటికి కూడా నీటి వసతి కల్పించాలని స్థానిక సంస్థలను కోరారు. ప్రజలంతా ప్రభుత్వానికి సహకరిస్తూ, ఎండల తీవ్రత తగ్గే వరకు అప్రమత్తంగా ఉండాలని మంత్రి పొంగులేటి శ్రీనివాసరెడ్డి ఈ సందర్భంగా ఆకాంక్షించారు.
