సింగరేణి కార్మికులకు దసరా ధమాకా.

•  ఏకంగా రూ.1.10 లక్షల బోనస్!
•  గతేడాదితో పోలిస్తే రూ.7 వేల పెంపు.
• రికార్డు బోనస్‌తో మురిసిన బొగ్గు గని ప్రాంతాలు.

హైదరాబాద్, మహా.

దసరా, దీపావళి పండుగల వేళ సింగరేణి కార్మికులకు కోల్ ఇండియా యాజమాన్యం తీపికబురు అందించింది. పనితీరు ఆధారిత ప్రోత్సాహక బహుమతి (పీఎల్‌ఆర్) కింద ఒక్కో అర్హత కలిగిన కార్మికుడికి రూ.1,10,250 చెల్లించేందుకు నిర్ణయించింది. ఇటీవల కోల్‌కతాలో జరిగిన జాతీయ స్థాయి సమావేశంలో యూనియన్ ప్రతినిధులు తొలుత రూ.1.20 లక్షల పీఎల్‌ఆర్ బోనస్ ఇవ్వాలని గట్టిగా డిమాండ్ చేశారు. అయితే, యాజమాన్యం ప్రతిపాదనలతో సుదీర్ఘంగా సాగిన చర్చల అనంతరం చివరకు రూ.1,10,250 చెల్లించేందుకు ఏకాభిప్రాయం కుదిరినట్లు కార్మిక సంఘాలు వెల్లడించాయి. దీపావళికి ముందే ఈ మొత్తాన్ని కార్మికుల ఖాతాల్లో జమ చేయనున్నారు. గతేడాది ఈ బోనస్ రూ.1,03,000 కాగా, ఈసారి సుమారు ఏడు శాతం (రూ.7,250) పెరుగుదల నమోదైంది. ఈ నిర్ణయంతో సింగరేణిలో నాన్‌-ఎగ్జిక్యూటివ్‌ హోదాలో పనిచేస్తున్న సుమారు 40 వేల మందికి పైగా కార్మికులకు ప్రయోజనం చేకూరనుంది.

సింగరేణి కార్మికులకు భారీ బోనస్ ప్రకటించడం పట్ల కేంద్ర బొగ్గు, గనుల శాఖ మంత్రి జి.కిషన్‌రెడ్డి హర్షం వ్యక్తం చేస్తూ కార్మికులకు ముందస్తు పండుగ శుభాకాంక్షలు తెలిపారు. దేశానికి వెలుగులు పంచేందుకు భూగర్భంలో పగలు, రాత్రి కష్టపడి పనిచేస్తున్న కార్మికుల శ్రమ వెలకట్టలేనిదని ఆయన కొనియాడారు. సింగరేణి కేవలం బొగ్గు ఉత్పత్తి సంస్థ మాత్రమే కాదని, తెలంగాణ రాష్ట్రానికి ‘కొంగుబంగారం’ అని, లక్షలాది కుటుంబాలకు జీవనాధారమని అభివర్ణించారు. దేశ, రాష్ట్ర ప్రగతిలో కీలక భాగస్వామిగా ఉన్న సింగరేణి భవిష్యత్తు కోసం యాజమాన్యం, కార్మికులు మరింత సమన్వయంతో పనిచేయాలని కోరారు. ఇదే క్రమంలో రాష్ట్ర ప్రభుత్వంపై కేంద్ర మంత్రి కీలక వ్యాఖ్యలు చేశారు. సింగరేణి సంస్థకు తెలంగాణ ప్రభుత్వం వివిధ రూపాల్లో చెల్లించాల్సిన సుమారు రూ.60 వేల కోట్ల బకాయిలను తక్షణమే విడుదల చేయాలని ఆయన డిమాండ్‌ చేశారు. బకాయిలు చెల్లిస్తే సంస్థ ఆర్థిక పరిస్థితి మరింత బలోపేతం అవుతుందన్నారు.

భవిష్యత్తు అవసరాల దృష్ట్యా బొగ్గు ఉత్పత్తి సామర్థ్యాన్ని మరింతగా పెంచేలా వ్యూహాత్మక ప్రణాళికలు అమలు చేయాలని సింగరేణి యాజమాన్యానికి కిషన్‌రెడ్డి సూచించారు. ఉత్పత్తి పెంపుతో పాటే కార్మికుల సంక్షేమం, ఉద్యోగ భద్రతకు అత్యంత ప్రాధాన్యం ఇవ్వాలని స్పష్టం చేశారు. మరోవైపు, సాధారణ పండుగ బోనస్‌కు భిన్నంగా సంస్థ ఉత్పాదకత, ఆర్థిక ఫలితాలతో ముడిపడి ఉన్న ఈ పీఎల్‌ఆర్ బోనస్ రాకతో బొగ్గు గని ప్రాంతాల్లో ఆనందోత్సాహాలు వ్యక్తమవుతున్నాయి. రికార్డు స్థాయి బోనస్‌‌తో కొత్తగూడెం, మణుగూరు, గోదావరిఖని, రామగుండం, మంచిర్యాల, భూపాలపల్లి తదితర ప్రాంతాల్లోని కార్మిక కుటుంబాల్లో ముందస్తు పండుగ వాతావరణం నెలకొంది.