అమెరికా గ్రీన్ కార్డుపై కొత్త ప్రతిపాదన.
* దరఖాస్తుదారుల నుంచి లక్ష డాలర్ల వరకు రీఫండబుల్ బాండ్కు యోచన.
* భారతీయులపై ప్రభావం ఉండొచ్చన్న అంచనా.
ఢిల్లీ, మహా.
అమెరికాలో శాశ్వత నివాస హోదా (గ్రీన్ కార్డు) పొందాలనుకునే విదేశీయులకు మరో కీలక మార్పు చోటు చేసుకుంటున్నాయి. అమెరికా అధ్యక్షుడు డొనాల్డ్ ట్రంప్ పరిపాలన పరిశీలిస్తున్న కొత్త ప్రతిపాదన ప్రకారం, విదేశాల నుంచి గ్రీన్ కార్డు కోసం దరఖాస్తు చేసుకునే కొందరు అభ్యర్థులు గరిష్ఠంగా ఒక లక్ష అమెరికన్ డాలర్లు వరకు రీఫండబుల్ బాండ్ (తిరిగి చెల్లించే డిపాజిట్) జమ చేయాల్సి రావచ్చని అంతర్జాతీయ మీడియా కథనాలు వెల్లడించాయి. ఈ ప్రతిపాదన అమల్లోకి వస్తే ఇప్పటికే సుదీర్ఘంగా, క్లిష్టంగా ఉన్న అమెరికా వలస ప్రక్రియలో మరో ఆర్థిక అడ్డంకి చేరే అవకాశం ఉందని పలువురు అభిప్రాయపడుతున్నారు.
ప్రస్తుతం అమెరికా విదేశాంగ శాఖ పరిశీలిస్తున్న పైలట్ కార్యక్రమం ప్రకారం, విదేశాల్లోని అమెరికా కాన్సులేట్ల ద్వారా ఇమ్మిగ్రెంట్ వీసా కోసం దరఖాస్తు చేసుకునే ఎంపిక చేసిన అభ్యర్థుల నుంచి ముందుగా బాండ్ రూపంలో డిపాజిట్ తీసుకునే విధానాన్ని అమలు చేయాలని యోచిస్తున్నట్లు సమాచారం. ఈ బాండ్ మొత్తం గరిష్ఠంగా ఒక లక్ష అమెరికన్ డాలర్ల వరకు ఉండే అవకాశం ఉందని తెలుస్తోంది. మొదట ఈ విధానాన్ని కొద్ది దేశాల్లో మాత్రమే ప్రయోగాత్మకంగా అమలు చేసి, అనంతరం ఫలితాలను సమీక్షించిన తర్వాత విస్తరణపై నిర్ణయం తీసుకునే అవకాశం ఉందని సమాచారం.
ప్రతిపాదన ప్రకారం దరఖాస్తుదారుల తరఫున అమెరికాలో నివసిస్తున్న కుటుంబ సభ్యులు లేదా స్పాన్సర్లు కూడా బాండ్ మొత్తాన్ని చెల్లించే అవకాశం ఉంటుంది. దరఖాస్తుదారు అనంతరం అమెరికా పౌరసత్వం పొందిన తర్వాత ఈ డిపాజిట్ను తిరిగి చెల్లించే విధానాన్ని కూడా పరిశీలిస్తున్నట్లు తెలుస్తోంది. అయితే ఈ కార్యక్రమంలో ఏ దేశాలను చేర్చుతారు, ఏ వర్గాల అభ్యర్థులకు ఇది వర్తిస్తుంది, తుది బాండ్ మొత్తం ఎంత ఉంటుందనే అంశాలపై ఇప్పటివరకు అమెరికా ప్రభుత్వం అధికారికంగా ఎలాంటి ప్రకటన చేయలేదు.
ఈ ప్రతిపాదన అమలైతే భారతీయులపై కూడా గణనీయమైన ప్రభావం ఉండే అవకాశం ఉందని వలస నిపుణులు భావిస్తున్నారు. ముఖ్యంగా ఉద్యోగ ఆధారిత గ్రీన్ కార్డుల కోసం దరఖాస్తు చేసుకునే భారతీయులు ఇప్పటికే ప్రపంచంలోనే అత్యధిక నిరీక్షణను ఎదుర్కొంటున్నారు. సమాచార సాంకేతిక, ఇంజినీరింగ్, వైద్య రంగాల్లో పనిచేస్తున్న వేలాది మంది భారతీయులు ఉద్యోగ ఆధారిత గ్రీన్ కార్డు కోసం సంవత్సరాలుగా వేచి చూస్తున్నారు.
అమెరికా వలస చట్టాల ప్రకారం ప్రతి ఆర్థిక సంవత్సరంలో జారీ చేసే ఉద్యోగ ఆధారిత గ్రీన్ కార్డుల్లో ఒక్కో దేశానికి గరిష్ఠంగా ఏడు శాతం మాత్రమే కేటాయించవచ్చు. ప్రతి ఏడాది సుమారు లక్షా నలభై వేల ఉద్యోగ ఆధారిత గ్రీన్ కార్డులు జారీ చేసినప్పటికీ, ఒక్కో దేశానికి సుమారు 9,800 కార్డులు మాత్రమే అందుబాటులో ఉండటంతో భారతీయుల కోసం భారీ పెండింగ్ జాబితా ఏర్పడింది. వివిధ అంచనాల ప్రకారం ప్రధాన దరఖాస్తుదారులు, వారి కుటుంబ సభ్యులు కలిపి పది లక్షలకు పైగా భారతీయులు ప్రస్తుతం ఉద్యోగ ఆధారిత గ్రీన్ కార్డు కోసం నిరీక్షిస్తున్నారు. వీరిలో చాలామందికి గ్రీన్ కార్డు పొందేందుకు దశాబ్దాల సమయం పట్టే పరిస్థితి కొనసాగుతోంది.
అయితే ప్రస్తుతం ఈ బాండ్ విధానం కేవలం ప్రతిపాదన దశలో మాత్రమే ఉందని గుర్తుంచుకోవాలి. దీనిపై ఇంకా అధికారిక నిర్ణయం వెలువడలేదు. పైలట్ కార్యక్రమం అమలు, దాని ఫలితాల ఆధారంగా తదుపరి చర్యలపై అమెరికా విదేశాంగ శాఖ నిర్ణయం తీసుకోనుంది. అయినప్పటికీ ఈ ప్రతిపాదన అమెరికా వలస విధానంలో మరో కీలక మార్పుకు సంకేతంగా మారింది. ముఖ్యంగా అమెరికాలో శాశ్వతంగా స్థిరపడాలని ఆశిస్తున్న భారతీయులతో పాటు ఇతర దేశాల అభ్యర్థులు ఈ పరిణామాలను ఆసక్తిగా గమనిస్తున్నారు.
