- ప్రపంచ క్రికెట్ పగ్గాలు మళ్లీ జై షా చేతికే
- రెండోసారి ఐసీసీ ఛైర్మన్గా ఏకగ్రీవ ఎంపిక
- 2028 ఒలింపిక్స్లో క్రికెట్ ఎంట్రీపై కీలక ప్రకటన
మహా : అంతర్జాతీయ క్రికెట్ కౌన్సిల్ (ఐసీసీ) అత్యున్నత పీఠంపై భారత క్రికెట్ పరిపాలకుడు జై షా తన స్థానాన్ని మరింత సుస్థిరం చేసుకున్నాడు. రెండోసారి ఐసీసీ ఛైర్మన్గా జై షా నియమితులైనట్లు ఐసీసీ అధికారికంగా ప్రకటించింది. ఇండోనేషియాలోని బాలి వేదికగా జరిగిన ఐసీసీ బోర్డు, కమిటీ సమావేశాల్లో డైరెక్టర్లు ప్రతిపాదించిన తీర్మానం మేరకు ఈ కీలక నిర్ణయం తీసుకున్నారు. జై షా నాయకత్వ పటిమపై బోర్డు సభ్యులకు ఉన్న అపారమైన నమ్మకానికి ఈ పునర్నియామకం నిదర్శనమని ఐసీసీ పేర్కొంది. క్రికెట్ను ప్రపంచవ్యాప్తంగా విస్తరించడం, కొత్త అభిమానులను సంపాదించుకోవడం, వాణిజ్యపరంగా ఆటను మరింత బలోపేతం చేయడం వంటి కీలక దశలో స్థిరమైన నాయకత్వం అవసరమని బోర్డు భావించింది.
తనపై మరోసారి నమ్మకం ఉంచిన ఐసీసీ బోర్డు డైరెక్టర్లకు జై షా హృదయపూర్వక కృతజ్ఞతలు తెలిపాడు. ఐసీసీ ఛైర్మన్గా బాధ్యతలు నిర్వర్తించడం తనకు దక్కిన గౌరవంగా, పెద్ద బాధ్యతగా భావిస్తున్నట్లు చెప్పారు. “ఐసీసీ బోర్డు నాపై ఉంచిన విశ్వాసానికి ఎంతో గౌరవంగా భావిస్తున్నాను. ప్రపంచవ్యాప్తంగా క్రికెట్ ప్రయోజనాలను ముందుకు తీసుకెళ్లేందుకు సభ్య దేశాలతో కలిసి పనిచేయడానికి నేను కట్టుబడి ఉన్నాను. క్రికెట్ చరిత్రలోనే అత్యంత ఉత్సాహభరితమైన దశలోకి మనం అడుగుపెడుతున్నాం. ముఖ్యంగా 2028 లాస్ ఏంజెల్స్ ఒలింపిక్స్లో క్రికెట్ తిరిగి ప్రవేశించడం ఒక అద్భుతమైన మైలురాయి. ఇది కొత్త ప్రేక్షకులను ఆకర్షించడంతో పాటు భవిష్యత్ తరాల క్రీడాకారులకు గొప్ప స్ఫూర్తినిస్తుంది” అని జై షా ఒక ప్రకటనలో పేర్కొన్నారు.
టోర్నీల నిర్వహణకు మించి లక్ష్యాలు: ఆటగాళ్లు అభిమానుల సంక్షేమం
గతంలో బీసీసీఐ కార్యదర్శిగా విశేష సేవలందించిన జై షా, ఐసీసీ బాధ్యతలు కేవలం విజయవంతమైన టోర్నమెంట్లు నిర్వహించడానికే పరిమితం కాదని తెలిపారు. ఆటగాళ్లు, అభిమానులు, వాణిజ్య భాగస్వాములకు అండగా నిలుస్తూ క్రీడకు బలమైన, దీర్ఘకాలిక భవిష్యత్తును నిర్మించడమే తమ ప్రధాన ధ్యేయమని వివరించారు.
ఒలింపిక్స్ 2028పైనే దృష్టి: ఆశయాలను ఆచరణలోకి మార్చే ప్రణాళిక
ప్రజలను ఏకం చేసే అద్భుతమైన శక్తి క్రికెట్కు ఉందని జై షా అభిప్రాయపడ్డారు. బోర్డు సభ్యుల సహకారంతో పెద్ద ప్రణాళికలను వాస్తవ రూపంలోకి తీసుకువచ్చి, రాబోయే తరాలకు చిరస్థాయిగా నిలిచిపోయే వారసత్వాన్ని అందించేందుకు కృషి చేస్తామని తెలిపారు.







