Mahaa Daily Exclusive

  2027లో పట్టాలెక్కనున్న తొలి బుల్లెట్ రైలు!

Share

2027లో పట్టాలెక్కనున్న తొలి బుల్లెట్ రైలు!
* ముంబై–వాపి మధ్య తొలిదశ సర్వీసు.
* గంటకు 280 కి.మీ. వేగంతో ప్రయాణం.

న్యూఢిల్లీ, మహా:

భారతదేశం ఎన్నో ఏళ్లుగా ఎదురుచూస్తున్న బుల్లెట్ రైలు కల సాకారమయ్యే దిశగా అడుగులు పడుతున్నాయి. దేశంలో తొలి హైస్పీడ్ రైలు సర్వీసును 2027 నుంచి ప్రారంభించేందుకు రైల్వే శాఖ సన్నాహాలు చేస్తోంది. తొలుత ముంబై–వాపి మధ్య రైలు నడిపి, అనంతరం దశలవారీగా ముంబై–అహ్మదాబాద్ హైస్పీడ్ రైలు కారిడార్‌ను అందుబాటులోకి తీసుకురావాలని లక్ష్యంగా పెట్టుకుంది. రైల్వే మంత్రి అశ్విని వైష్ణవ్ ఈ ప్రాజెక్టు పురోగతిని వివరిస్తూ ఈ విషయాలను వెల్లడించారు.

ముంబై–అహ్మదాబాద్ మధ్య 508 కిలోమీటర్ల కారిడార్

దేశంలో తొలి బుల్లెట్ రైలు ప్రాజెక్టుగా చేపట్టిన ముంబై–అహ్మదాబాద్ హైస్పీడ్ రైలు కారిడార్ మొత్తం 508 కిలోమీటర్ల పొడవున నిర్మిస్తున్నారు. ఇందులో 12 స్టేషన్లు ఏర్పాటు చేస్తున్నారు. గుజరాత్‌లో 348 కిలోమీటర్లు, మహారాష్ట్రలో 156 కిలోమీటర్లు, దాద్రా నగర్‌ హవేలీలో 4 కిలోమీటర్ల మేర ఈ మార్గం విస్తరించి ఉంటుంది. ప్రాజెక్టు పూర్తయితే ముంబై నుంచి అహ్మదాబాద్‌కు ప్రయాణ సమయం గణనీయంగా తగ్గనుంది. పరిమిత స్టాప్‌లతో ప్రయాణ సమయం సుమారు 2 గంటల 7 నిమిషాలుగా ఉండనుంది.

నిర్మాణ పనుల్లో వేగం

రైల్వే మంత్రి వెల్లడించిన సెప్టెంబర్‌ 2026 నాటికి సంబంధించిన వివరాల ప్రకారం.. 456 కిలోమీటర్ల మేర పిల్లర్ల నిర్మాణం పూర్తయింది. 371 కిలోమీటర్ల మేర వయాడక్ట్‌ నిర్మాణం పూర్తయింది. 299 కిలోమీటర్ల మార్గంలో 6 లక్షల శబ్ద నిరోధక ప్యానెళ్లను ఏర్పాటు చేశారు. 206 కిలోమీటర్ల వయాడక్ట్‌పై 9,300 విద్యుత్‌ ఓవర్‌హెడ్‌ మాస్ట్‌లను అమర్చారు. నాలుగు పర్వత సొరంగాల తవ్వకాలు పూర్తికాగా, మహారాష్ట్రలోని 21 కిలోమీటర్ల సొరంగంలో 5 కిలోమీటర్ల మేర తవ్వకాలు జరిగాయి. ఎనిమిది స్టేషన్లలో నిర్మాణ పనులు పూర్తికాగా, మిగిలిన పనులు కొనసాగుతున్నాయి.

స్వదేశీ సాంకేతికతతో బీ28 రైలు

ఈ ప్రాజెక్టులో మరో కీలక పరిణామం స్వదేశీ బీ28 బుల్లెట్‌ రైలు తయారీ. బెంగళూరులోని బీఈఎంఎల్‌ సంస్థ, చెన్నైలోని ఇంటిగ్రల్‌ కోచ్‌ ఫ్యాక్టరీ (ఐసీఎఫ్‌) సహకారంతో ఈ రైలు తయారీ చేపట్టారు. సుమారు 202 మీటర్ల పొడవుండే ఈ రైలులో 8 కోచ్‌లు ఉంటాయి. ఒకేసారి సుమారు 557 మంది ప్రయాణించే సామర్థ్యం కల్పించారు. దివ్యాంగులు, చలన పరిమితులు ఉన్న ప్రయాణికుల కోసం ప్రత్యేక సౌకర్యాలు కూడా ఏర్పాటు చేస్తున్నారు. ఈ రైలు గరిష్ఠ పరీక్షా వేగం గంటకు 280 కిలోమీటర్లు కాగా, ప్రారంభ దశలో దీని నిర్వహణ వేగం గంటకు 249 కిలోమీటర్లుగా పేర్కొన్నారు.

2027లో తొలి ప్రయాణం

మొదట సూరత్‌–వాపి మధ్య బుల్లెట్‌ రైలు సేవలను ప్రారంభించాలని రైల్వే శాఖ లక్ష్యంగా పెట్టుకుంది. ఆ తర్వాత దశలవారీగా ముంబై వరకు పూర్తి కారిడార్‌ను అందుబాటులోకి తీసుకురానుంది. ఈ ప్రాజెక్టు భారతదేశంలో హైస్పీడ్‌ రైలు రవాణాకు నాంది పలకడమే కాకుండా, భవిష్యత్తులో ఇతర నగరాల మధ్య బుల్లెట్‌ రైలు కారిడార్ల ఏర్పాటుకు కూడా పునాదిగా నిలవనుంది.