Mahaa Daily Exclusive

  శ్రీవారికి రూ.160 కోట్ల బంగారు కానుక!

Share

శ్రీవారికి రూ.160 కోట్ల బంగారు కానుక!
• 121 కిలోల పసిడితో 45 ఆభరణాలు.
• 9 ప్రత్యేక సెట్ల రూపకల్పన.
• నవంబర్ 26న తిరుమలలో సమర్పణ.
• టీటీడీ చరిత్రలోనే వ్యక్తిగత భక్తుడి అతిపెద్ద కానుక.

తిరుమల, మహా .
కలియుగ ప్రత్యక్ష దైవం తిరుమల శ్రీవేంకటేశ్వర స్వామివారిపై తనకున్న అపారమైన భక్తిని ఓ భక్తుడు అపూర్వమైన కానుక రూపంలో చాటుకోనున్నారు. ఏకంగా 121 కిలోల బంగారంతో అత్యంత సుందరంగా తీర్చిదిద్దిన విలువైన ఆభరణాలను స్వామివారికి సమర్పించేందుకు సిద్ధమయ్యారు. వీటి విలువ ప్రస్తుత మార్కెట్ అంచనాల ప్రకారం రూ.150 కోట్ల నుంచి రూ.160 కోట్ల వరకు ఉంటుందని సమాచారం. ఈ నెల 26న తిరుమల శ్రీవారి ఆలయంలో ఈ బంగారు ఆభరణాలను తిరుమల తిరుపతి దేవస్థానం (టీటీడీ) అధికారులకు దాత అందజేయనున్నారు. టీటీడీ చరిత్రలోనే ఒక వ్యక్తిగత భక్తుడి నుంచి శ్రీవారికి అందనున్న అతిపెద్ద కానుకగా ఇది నిలవనుంది.

తొమ్మిది ప్రత్యేక సెట్లుగా 45 ఆభరణాలు.

ఈ భారీ కానుకలో మొత్తం 45 బంగారు ఆభరణాలు ఉన్నాయి. వీటిని తొమ్మిది ప్రత్యేక సెట్లుగా రూపొందించారు. శ్రీవారి నిత్య, ప్రత్యేక అలంకరణలకు అనువుగా ఉండేలా వివిధ రకాల ఆభరణాలను సంప్రదాయ పద్ధతుల్లో, అత్యంత నైపుణ్యంతో ప్రత్యేకంగా తయారు చేయించినట్లు తెలుస్తోంది. మొత్తం 121 కిలోల బంగారంతో రూపొందించిన ఈ ఆభరణాల విలువే సుమారు రూ.160 కోట్ల వరకు ఉండటం విశేషం. కాగా, ఒక్కో ఆభరణం రూపకల్పన, వాటి ప్రత్యేకతలు, సెట్ల వారీగా విభజనకు సంబంధించిన పూర్తి వివరాలు ఇంకా వెల్లడికావాల్సి ఉంది.

దాత వివరాలు గోప్యం.. ఏర్పాట్లపై టీటీడీ కసరత్తు.

ఈ బృహత్తర కానుక సమర్పణకు సంబంధించి సదరు దాత ఇప్పటికే టీటీడీ ఉన్నతాధికారులతో సంప్రదింపులు పూర్తి చేసినట్లు ప్రభుత్వ, దేవస్థానం వర్గాలు తెలిపాయి. ఆభరణాలను శాస్త్రోక్తంగా స్వీకరించే విధానం, భద్రతాపరమైన, ఇతర అవసరమైన ఏర్పాట్లపై అధికారుల స్థాయిలో చర్చలు జరిగినట్లు సమాచారం. అయితే, తమ పేరును బయటపెట్టేందుకు ఇష్టపడకపోవడంతో దాత ఎవరనే విషయాన్ని ఇప్పటివరకు అధికారికంగా బహిర్గతం చేయలేదు.
తిరుమల శ్రీవారి ఆలయానికి దేశవిదేశాల నుంచి భక్తులు నగదు, బంగారం, వెండి, విలువైన వజ్రాభరణాలను కానుకలుగా సమర్పించడం ఆనవాయితీగా వస్తోంది. అయితే, ఒకే వ్యక్తిగత భక్తుడు ఏకంగా 121 కిలోల బంగారంతో తయారు చేయించిన 45 ఆభరణాలను తొమ్మిది సెట్లుగా సమర్పించనుండటం ఆధ్యాత్మిక వర్గాల్లో విశేష ప్రాధాన్యతను సంతరించుకుంది. నవంబర్ 26న ఈ కానుకను అధికారికంగా స్వామివారికి సమర్పించిన అనంతరం ఆభరణాలకు సంబంధించిన మరిన్ని వివరాలు వెల్లడయ్యే అవకాశం ఉంది.