నీట్ పేపర్ లీకేజీ కేసులో 14 మందిపై అభియోగాలు నమోదు!
20 వేల పేజీల చార్జిషీట్.. నిందితులంతా నేరం అంగీకరించలేదు.
* నవంబర్ 25 నుంచి రోజువారీ విచారణ.
న్యూఢిల్లీ, మహా:
దేశవ్యాప్తంగా లక్షలాది మంది వైద్య విద్యార్థుల భవిష్యత్తుతో ముడిపడిన నీట్-యూజీ 2026 ప్రశ్నపత్రం లీకేజీ కేసు కీలక దశకు చేరుకుంది. దేశవ్యాప్తంగా సంచలనం సృష్టించిన ఈ వ్యవహారంలో ఢిల్లీలోని రౌస్ అవెన్యూ ప్రత్యేక ఫాస్ట్ట్రాక్ కోర్టు శనివారం మొత్తం 14 మంది నిందితులపై అధికారికంగా అభియోగాలు నమోదు చేసింది. ప్రత్యేక న్యాయమూర్తి అజయ్ గుప్తా ఎదుట హాజరైన నిందితులంతా తమపై వచ్చిన ఆరోపణలను తిరస్కరించి, విచారణను ఎదుర్కొంటామని ప్రకటించారు. ఈ నెల 25 నుంచి ప్రాసిక్యూషన్ సాక్షుల వాంగ్మూలాలను రోజువారీ ప్రాతిపదికన నమోదు చేయాలని కోర్టు ఆదేశించింది.
20 వేల పేజీల చార్జిషీట్.. 360 మంది సాక్షులు
ఈ కేసులో కేంద్ర దర్యాప్తు సంస్థ (సీబీఐ) సుమారు 20 వేల పేజీలతో కూడిన చార్జిషీట్ను దాఖలు చేసింది. తొలుత జూలై 28న 13 మందిపై ప్రధాన చార్జిషీట్ సమర్పించగా, అనంతరం శేషరావు బజరంగ్ సూర్యవంశీపై అనుబంధ చార్జిషీట్ దాఖలు చేయడంతో నిందితుల సంఖ్య 14కు చేరింది. సీబీఐ తన అభియోగాలకు మద్దతుగా 360 మంది సాక్షులు, 422 పత్రాలు, 43 వస్తు ఆధారాలను సేకరించింది.
ఎన్టీఏ నిపుణులే ప్రశ్నలు బయటకు తీశారా?
సీబీఐ దర్యాప్తు ప్రకారం.. నేషనల్ టెస్టింగ్ ఏజెన్సీ (ఎన్టీఏ) పరీక్షల నిర్వహణలో భాగంగా నియమించుకున్న ముగ్గురు సబ్జెక్టు నిపుణులు ప్రశ్నపత్రాలను బయటకు తీసుకెళ్లినట్లు ఆరోపణలు ఉన్నాయి. ప్రశ్నల ప్రూఫ్రీడింగ్, అనువాద బాధ్యతలు నిర్వహించే సమయంలో వారికి రహస్య ప్రశ్నపత్రాలు అందుబాటులో ఉండేవి.
వారిలో ఒకరు 135 కెమిస్ట్రీ ప్రశ్నలను సమాధానాల ఎంపికలతో సహా చిన్న కాగితపు చీటీలపై రాసుకుని బయటకు తీసుకెళ్లినట్లు సీబీఐ ఆరోపించింది. మరో ఇద్దరు ప్రశ్నలను గుర్తుంచుకుని, బయటకు వచ్చిన తర్వాత వాటిని రాసుకున్నట్లు పేర్కొంది. ఎన్టీఏ కార్యాలయంలోని రహస్య విభాగం నుంచి బయటకు వెళ్లే సమయంలో సరైన తనిఖీలు లేకపోవడాన్ని భద్రతా లోపంగా గుర్తించింది. ఈ ప్రశ్నలు మధ్యవర్తులు, కోచింగ్ సంస్థల నిర్వాహకుల ద్వారా అభ్యర్థులకు చేరినట్లు దర్యాప్తులో పేర్కొంది.
మే 3న పరీక్ష.. మే 12న రద్దు
2026 మే 3న దేశవ్యాప్తంగా నీట్-యూజీ పరీక్ష నిర్వహించగా సుమారు 22 లక్షల మంది విద్యార్థులు హాజరయ్యారు. ప్రశ్నపత్రం లీకేజీ ఆరోపణలు వెలుగులోకి రావడంతో మే 12న ఎన్టీఏ పరీక్షను రద్దు చేసింది. అనంతరం జూన్ 21న తిరిగి పరీక్ష నిర్వహించింది. ఇదే రోజు సీబీఐ కేసు నమోదు చేసి మహారాష్ట్ర, రాజస్థాన్, హరియాణా తదితర రాష్ట్రాల్లో దర్యాప్తు చేపట్టింది.
ఏయే చట్టాల కింద అభియోగాలు?
నిందితులపై భారతీయ న్యాయ సంహిత (బీఎన్ఎస్), అవినీతి నిరోధక చట్టం, పబ్లిక్ ఎగ్జామినేషన్స్ (ప్రివెన్షన్ ఆఫ్ అన్ఫెయిర్ మీన్స్) చట్టం-2024లోని నిబంధనలతోపాటు కాపీరైట్ చట్టంలోని సెక్షన్ 63 కింద అభియోగాలు నమోదు చేశారు. నేరపూరిత కుట్ర, మోసం, నమ్మకద్రోహం, సాక్ష్యాధారాల ధ్వంసం వంటి ఆరోపణలు కూడా ఉన్నాయి.
నిందితులుగా యశ్ యాదవ్, మంగీలాల్ బివాల్, దినేశ్ బివాల్, వికాస్ బివాల్, శుభమ్ ఖైర్నార్, ధనంజయ్ లోఖండే, ప్రహ్లాద్ కులకర్ణి, తేజస్ హర్షద్ కుమార్, డాక్టర్ మనోజ్ షిరురే, శివరాజ్ రఘునాథ్ మోటేగావంకర్, మనీషా వాఘ్మారే, మనీషా మాంధారే, మనీషా సంజయ్ హవాల్దార్, శేషరావు బజరంగ్ సూర్యవంశీ ఉన్నారు.
నవంబర్ 25 నుంచి ప్రారంభమయ్యే విచారణలో సీబీఐ సాక్షులను ప్రవేశపెట్టనుంది. నిందితుల తరఫు న్యాయవాదులు వారిని ప్రశ్నించనున్నారు. ప్రశ్నపత్రం ఎలా బయటకు వచ్చింది? ఎవరి పాత్ర ఎంత? అనే అంశాలపై న్యాయస్థానంలో విచారణ జరగనుంది. నిందితులు ఆరోపణలను తిరస్కరించిన నేపథ్యంలో తుది నేర నిర్ధారణ కోర్టు విచారణ అనంతరమే జరగనుంది.







